РК Вардар

РК Вардар 1961 — професионален ракометен клуб од Скопје, Македонија. Вардар е најуспешен македонски ракометен клуб, со освоени 15 титули во македонската суперлига и 16 титули во купот на Македонија. Исто така, Вардар е најуспешен тим во регионалната СЕХА лига со освоени пет титули. Во европски рамки, Вардар е двократен европски шампион, со освоени титули во сезоните 2016–17 и 2018–19.

РК Вардар 1961
Целосен назив	Ракометен клуб „Вардар 1961“ - Скопје
Основан	1961
Игралиште	СЦ Јане Сандански, Скопје
Приемност	6.000
Престедател	Михајло Михајловски
Главен тренер	Владо Недановски
Лига	Супер лига на Македонија
2021–22	1. (шампион)
Бои
Клупски бои
Дресови
Домашен Гостински
Мреж. место Матична страница

Спортски клуб Вардар
Фудбал	Ракомет (мажи)	Ракомет (жени)

Клупска историја

Ракометниот клуб „Вардар“ е основан во 1961 година, како дел од спортското друштво „Вардар“ и во тоа време редовно настапувал во ракометнала лига на Македонија и во Втората југословенска лига. Најголемите успеси, клубот ги постигнал по осамостојувањето на Македонија, кога започнал напредокот на клубот. Во 1997 година започнале најголемите успеси на РК „Вардар“, кој е првиот клуб што успеал да ја прекине доминацијата на РК „Пелистер“ од Битола во македонската ракометна лига. РК „Вардар“ е убедливо најтрофејниот машки ракометен клуб во Македонија, со освоени бројни трофеи во првенството и во купот. Во сезоната 2013/2014, клубот добил нова раководна структура: Нов сопственик на клубот станал Сергеј Самсоненко, а Михајло Михајловски станал почесен претседател. Како признание на остварените успеси, во 2016 година „Вардар“ ја добил наградата „13 Ноември“ која ја доделува Сојузот на спортови на град Скопје.

Вардар отсекогаш бил интересен и за странските играчи и тренери. Повеќе познати тренерски имиња биле дел од Вардар, како што се: Зоран Живковиќ, Богољуб Периќ, Драган Ѓукиќ, Драган Нишевиќ, Веселин Вујовиќ. Исто така, клубот го воделе и повеќе домашни тренери, како: Ристо Трпчевски, Лефтер Бошковски, Стојан Петрушевски, Аце Станковски, Љубомир Савевски, Ванчо Јовановски и Кире Ивановски.

Во клубот играле најголемите ѕвезди на македонскиот ракомет, како што се: Пепи Манасков, Ванчо Јовановски, Данило Брестовац, Аце Станковски, Љубомир Савевски, Драган Маринковиќ, Зоран Петковски, Горан Андоновски, Александар Јовиќ, Игор Котевски, Стевче Алушевски, Бранислав Ангеловски, Марјан Колев, Кирил Атанасовски, Наумче Мојсовски, Ванчо Димовски, Петар Ангелов, Филип Лазаров, Стојанче Стоилов и многу други македонски репрезентативци.

На 4 јуни 2020 година, клубот се пререгистрирал под името Вардар 1961. Тогаш генерален раководител бил старо-новиот сопственик, компанијата Ватростална на чело со Михајло Михајловски, која со нова управна гарнитура го презела клубот.

Настапи во македонската ракометна лига

РК „Вардар“ е првиот неофицијален првак на Македонија, бидејќи во 1992 година, во времето на распадот на СФРЈ, во конкуренција на неколку македонски екипи, во турнирски систем го освои првото место. РК „Вардар“ е повеќекратен шампион на Македонија, освојувајќи го првенството 13 пати: 1998/1999, 2000/2001, 2001/2002, 2002/2003, 2003/2004, 2006/2007, 2008/2009, 2012/2013, 2014/2015, 2015/2016, 2016/2017, 2017/2018 и 2018/2019. Особено биле успешни периодот од 2000 до 2004 година, кога „Вардар“ четирипати по ред го освоил првенството на Македонија, како и периодот од 2014 до 2019 година, кога освоил пет шампионски титули по ред. Покрај тоа, клубот бил вице-првак на Македонија во сезоните: 1999/2000; 2005/2006, 2007/2008, 2009/2010, 2010/2011, 2011/2012 и 2013/2014. Клубот постигнал големи успеси и во Купот на Македонија, кој го освоил 13 пати: 1997, 2000, 2001, 2003, 2004, 2007, 2008, 2012, 2014, 2015, 2016, 2017 и 2018 година, а неколкупати бил и финалист: 2006, 2009, 2010, 2013 и 2019 година. Во неколку наврати, клубот ја освоил двојната круна (шампион и победник на Купот), и тоа во: 2000/2001; 2002/2003; 2003/2004, 2006/2007, 2014/2015, 2015/2016, 2016/2017 и 2017/2018. На тој начин, РК „Вардар“ е најуспешниот машки ракометен клуб во Македонија.

Сезона 2013/2014

Во сезоната 2013/2014, РК „Вардар“ не успеал да ја одбрани шампионската титула во македонското ракометно првенство. Во решавачките натпревари против РК „Металург“, најпрвин, на 2 мај 2014 година, РК „Вардар“ забележал победа од 25:24 (15:14), но подоцна, на 8 мај 2014 година, претрпел убедлив пораз од 21:30 (11:16), со што морал да се задоволи со втората позиција во првенството.

Сепак, подоцна, на 18 мај 2014 година, РК „Вардар“ го освоил Купот на Македонија, победувајќи го во финалето РК Металург со резултат 30:28 (14:11). Претходно, на патот до победничкиот пехар, РК „Вардар“ убедливо ги победил: РК „Тинекс Пролет“, со резултат 31:20 (12:9); РК „Металург Јуниор“, со резултат 36:20 (15:8); и РК „Охрид 2011“, со резултат 36:19 (18:8).

Сезона 2014/2015

И во сезоната 2014-2015, „Вардар“ го освоил купот на Македонија (десетти пат во клупската историја). Притоа, најпрвин, во полуфиналето бил победен тимот на „Зомимак“ со 46:25 (24:14), а во финалето, одиграно на 16 мај 2015, „Вардар“ бил подобар од „Металург“, победувајќи го со 26:22 (13:11). За најдобар играч на финалето бил прогласен Стојанче Стоилов, најдобар голман бил Петар Ангелов, а најдобар стрелец бил Алекс Душебаев. На 1 јуни 2015 година, „Вардар“ го одиграл последниот натпревар во првенството, победувајќи го „Радовиш“ со 35:23. На тој начин, и официјално, „Вардар“ ја освоил деветтата шампионска титула и по осумгодишна пауза, повторно ја освоил двојната круна. Истовремено, клубот се збогувал со шестмина ракометари: Стефан Терзиќ, Немања Прибак, Михаил Чипурин, Алексеј Растворцев, Добривое Марковиќ и Владимир Петриќ.

Сезона 2015/2016

И оваа сезона „Вардар“ ја освоил шампионската титула. Притоа, во плејоф фазата, клубот остварил десет победи од десет натпревари, освојувајќи го првото место во супер-лигата, со освоени 30 бодови. Во последното коло, на 31 мај 2016 година, во Прилеп, „Вардар“ ја победила домашната екипа со резултат 38:34 (18:15), а најефикасен ракометар бил Манасков, кој постигнал 12 гола.

Сезона 2016/2017

Во сезоната 2016/2017, „Вардар“ го освоил 12. Куп на Македонија (по четврти пат во низа) со триумфот од 31-26 (16-13) против „Еурофарм Работник“. Најефикасен ракометар во финалето бил Чупиќ со постигнати осум гола.

Сезона 2017/2018

Во оваа сезона, во фазата на доигрувањето, „Вардар“ ги постигнал следниве резултати:

Дата	Натпревар	Резултат
24.3.2018	Охрид - Вардар	14:27
30.3.2018	Вардар - Еурофарм Р.	38:29
30.4.2018	Пелистер - Вардар	28:43
2.5.2018	Пролет - Вардар	20:30
4.5.2018	Вардар - Металург	37:18
9.5.2018	Вардар - Охрид	34:18
12.5.2018	Еурофарм Р. - Вардар	22:39
14.5.2018	Вардар - Пелистер	44:23
15.5.2018	Вардар - Пролет	38:25
30.5.2018	Металург - Вардар	29:33

И оваа сезона, „Вардар“ го освоил Купот на Македонија. Притоа, во полуфиналето, одиграно на 18 мај 2018 година, ја победил екипата на „Пелистер“ со резултат 46:27, а утредента бил подобар од екипата на „Металург“ со резултат 30:24.

Сезона 2018/2019

Во доигрувањето за титулата во македонската лига, на 15 април, „Вардар“ бил подобар од „Пролет“ (33-26), утредента ја победил екипата на „Еурофарм Работник“ со резултат 30-28, а на 29 април бил подобар од „Металург“ (32-31). Во текот на мај, „Вардар“ остварил победи и против: „Пролет“ (36-33), „Бутел“ (43-31), „Пелистер“ (31-24), „Бутел“ (28-20), „Еурофарм Работник“ (36-29), „Пелистер“ (30-26) и „Металург“ (32-29) и така ја одбранил шампионската титула, освоена во претходната сезона.

Во борбата за освојување на Купот на Македонија, „Вардар“ играл во четвртата група. Притоа, на 20 април 2019 година, „Вардар“ убедливо ја победил екипата на „Прилеп“ со резултат 45-21, а утредента бил подобар и од екипата на „Струга“ со резултат 29-24 и така се пласирал на финалниот турнир. Во полуфиналето, одиграно на 10 мај, „Вардар“ ја победил екипата на „Еурофарм Работник“ со резултат 35-30, но утредента во финалето загубил од „Металург“ (33-32). Сепак, на 18 септември 2019 година, во Суперкупот на Македонија, „Вардар“ го совладал „Металург“ со резултат 26-24.

Сезона 2020/2021

Во сезоната 2020/2021, РК Вардар ги остварил следниве резултати во Супер лигата:

Резултати во Супер лигата, 2020/2021

Дата	Натпревар	Резултат
6.3.2021	Вардар 1961 - Еурофарм Пелистер 2	34 : 30
21.3.2021	Охрид - Вардар 1961	19 : 23
27.3.2021	Вардар 1961 - Еурофарм Пелистер	35 : 27
4.4.2021	Бутел - Вардар 1961	26 : 34
11.4.2021	Вардар 1961 - Струга	36: 22
14.4.2021	Вардар 1961 - Пролет	30 : 24
17.4.2021	Металург - Вардар 1961	27 : 31
23.4.2021	Еурофарм Пелистер 2 - Вардар 1961	26 : 33
8.5.2021	Вардар 1961 - Охрид	37 : 29
20.5.2021	Еурофарм Пелистер - Вардар 1961	29 : 25
22.5.2021	Вардар 1961 - Бутел	26 : 22
26.5.2021	Струга - Вардар 1961	22 : 32
31.5.2021	Пролет - Вардар 1961	22 : 28
2.6.2021	Вардар 1961 - Металург	39 : 27

На тој начин, со еден претрпен пораз, со освоени 39 бодови и со гол разлика од 443 : 332, РК Вардар ја освоил 14. титула во ракометното првенство на Македонија (шеста по ред).

Во Купот на Македонија, РК Вардар најпрвин ги победил екипите на РК Текстилец (47-11), ГРК Тиквеш (42-24) и РК Радовиш (35-32), а во полуфиналето ја совладал екипата на РК Металург со резултат 27-22 (14-12). Најефикасни во редовите на РК Вардар биле Чупиќ и Дисингер, кои постигнале по седум и шест гола, соодветно. Во финалето, РК Вардар бил подобар од екипата на РК Еурофарм Пелистер со резултат 26-24 (16-10) и така го своил 14. Куп на Македонија. Најефикасни во редовите на РК Вардар биле Чупиќ и Дисингер, кои постигнале по седум и шест гола, соодветно. Чупиќ бил прогласен за најдобар играч на финалниот турнир, додека Борко Ристовски за најдобар голман. На 11 август 2021, РК Вардар играл во Супер купот на Македонија каде бил поразен од екипата на Еурофарм Пелистер со резултат 22-31.

Сезона 2021/2022

Во сезоната 2021/2022, РК Вардар ги остварил следниве резултати во Супер лигата:

Резултати во Супер лигата, 2021/2022

Дата	Натпревар	Резултат
12.9.2021	Вардар 1961 - Скопје	48 : 24
17.9.2021	Вардар 1961 - Радовиш	40 : 26
19.9.2021	Охрид - Вардар 1961	29 : 31
26.9.2021	Вардар 1961 - Еурофарм Пелистер	29 : 25
2.10.2021	Бутел - Вардар 1961	27 : 34
9.10.2021	Вардар 1961 - Металург	38 : 30
16.10.2021	Пролет - Вардар 1961	26 : 35
23.10.2021	Вардар 1961 - Прилеп	41 : 24
30.10.2021	Еурофарм Пелистер 2 - Вардар 1961	27 : 26
10.11.2021	Вардар 1961 - ГРК Тиквеш	34 : 27
21.11.2021	Струга - Вардар 1961	28 : 37
28.11.2021	Скопје - Вардар 1961	27 : 32
4.12.2021	Радовиш - Вардар 1961	20 : 37
11.12.2021	Вардар 1961 - Охрид	33 : 26
15.12.2021	Еурофарм Пелистер - Вардар 1961	27 : 27
17.12.2021	Вардар 1961 - Бутел	36 : 21
2.2.2022	Металург - Вардар 1961	0 : 10
6.2.2022	Вардар 1961 - Пролет	34 : 22
10.2.2022	Прилеп - Вардар 1961	20 : 34
12.2.2022	Вардар 1961 - Еурофарм Пелистер 2	32 : 20
20.2.2022	ГРК Тиквеш - Вардар 1961	25 : 30
26.2.2022	Вардар 1961 - Струга	35 : 22

По завршувањето на редовниот дел од сезоната, во плеј-оф натпреварите, Вардар 1961 ја освоил својата 15. шампионска титула (седма по ред) при што ги остварил следниве резултати:

Резултати во Супер лигата, 2021/2022

Дата	Натпревар	Резултат
3.3.2022	Вардар 1961 - Охрид	28 : 26
26.3.2022	Вардар 1961 - Еурофарм Пелистер	23 : 24
2.4.2022	Еурофарм Пелистер 2 - Вардар 1961	19 : 22
20.4.2022	ГРК Тиквеш - Вардар 1961	24 : 28
23.4.2022	Вардар 1961 - Бутел	25 : 21
27.4.2022	Охрид - Вардар 1961	21 : 28
1.5.2022	Еурофарм Пелистер - Вардар 1961	23 : 26
8.5.2022	Вардар 1961 - Еурофарм Пелистер 2	34 : 23
21.5.2022	Бутел - Вардар 1961	23 : 33
26.5.2022	Вардар 1961 - ГРК Тиквеш	37 : 25
10.11.2021	Вардар 1961 - ГРК Тиквеш	34 : 27
21.11.2021	Струга - Вардар 1961	28 : 37
28.11.2021	Скопје - Вардар 1961	27 : 32
4.12.2021	Радовиш - Вардар 1961	20 : 37
11.12.2021	Вардар 1961 - Охрид	33 : 26
15.12.2021	Еурофарм Пелистер - Вардар 1961	27 : 27
17.12.2021	Вардар 1961 - Бутел	36 : 21
2.2.2022	Металург - Вардар 1961	0 : 10
6.2.2022	Вардар 1961 - Пролет	34 : 22
10.2.2022	Прилеп - Вардар 1961	20 : 34
12.2.2022	Вардар 1961 - Еурофарм Пелистер 2	32 : 20
20.2.2022	ГРК Тиквеш - Вардар 1961	25 : 30
26.2.2022	Вардар 1961 - Струга	35 : 22

Во Купот на Македонија, на 11 март 2022 година, Вардар 1961 ја совладал екипата на Јуниор Кисела Вода, со резултат 40 : 23, а утредента бил подобар и од ГРК Тиквеш (33 : 23). Потоа, на 13 мај, Вардар 1961 ја совладал екипата на Еурофарм Пелистер 2, со резултат 28 : 24, а во финалето бил подобар од екипата на Еурофарм Пелистер, со резултат 23 : 22 и така ја своил двојната круна.

На 11 септември 2022 година, во Суперкупот на Македонија, РК Вардар загубил од екипата на Еурофарм Пелистер со резултат 22: 23.

Сезона 2022/2023

Главна статија: РК Вардар сезона 2022-23

Во сезоната 2022/2023, РК Вардар ги остварил следниве резултати во Супер лигата:

Резултати во Супер лигата, 2022/2023

Дата	Натпревар	Резултат
3.9.2022	Вардар Неготино - Вардар 1961	25 : 38
14.9.2022	Вардар 1961 - Бутел	30 : 21
17.9.2022	Прилеп - Вардар 1961	19 : 34
24.9.2022	Вардар 1961 - Алкалоид	28 : 25
1.10.2022	Охрид - Вардар 1961	22 : 27
6.10.2022	Куманово - Вардар 1961	18 : 31

Меѓународни настапи

РК „Вардар“ има богато учество на меѓународните ракометни натпреварувања. На европската ракометна сцена, „Вардар“ дебитирал во сезоната 1993/1994, во натпреварите од Купот на ЕХФ. Притоа, „Вардар“ трипати играл во полуфиналето на КПК (1998/1999, 2004/2005 и 2010/2011), а во сезоната 2006/2007 играл во четврт-финалето на ова натпреварување. Исто така, во сезоната 2005/2006, „Вардар“ играл во чеврт-финалето на Челинџ-купот. Во своето прво европско полуфинале во сезоната 1998/1999, „Вардар“ загубил од „Адемар Леон“ (27:29, 20:35); во второто полуфинале во КПК (2004/2005) загубил од РК „Загреб“ (23:21, 26:34), а во третиот обид (2010/2011) бил поразен од „Гумерсбах“ (21:33, 29:38). Во рангирањето на ЕХФ, „Вардар“ двапати бил меѓу 14. најдобри екипи во Европа. Исто така, „Вардар“ е првата македонска екипа што настапувала во Лигата на шампионите, како и првиот победник во Регионалната лига „СЕХА“.

Регионална лига СЕХА

2011-2012

РК „Вардар“ е првиот освојувач на трофејот на Регионалната лига СЕХА. Во првата сезона на Регионалната лига (2011/2012), во конкуренција на 12 екипи од шест земји (Македонија, Хрватска, Србија, БиХ, Црна Гора и Словачка), Вардар го освоил пехарот, откако на финалниот турнир во Загреб, ги победил домаќинот РК „Загреб“, а потоа и РК „Металург“. Претходно, во натпреварите од Лигата СЕХА, РК „Вардар“ загубил само три натпревари: против „Загреб“, „Борац“ и „Татран“.

2013-2014

Во сезоната 2013/2014, клубот по вторпат станал шампион во лигата СЕХА, освојувајќи го трофејот на завршниот турнир, одигран во Нови Сад. Таму, во полуфиналето, одиграно на 11 април 2014 година, РК „Вардар“ го победил РК „Кроација Осигурање Загреб“ со 30:22 (12:10), а два дена подоцна, во финалето остварил победа против РК „Мешков Брест“ од 29:27 (14:15). Претходно, во натпреварите од лигата СЕХА, РК „Вардар“ остварил 12 победи, 5 порази и еден нерешен резултат, завршувајќи го првенството како третопласиран, со 37 бодови и со гол-разлика од 530:458.

2014-2015

Во сезоната 2014-2015, двајца членови на РК „Вардар“, Штербик и Дибиров, се нашле во идеалниот тим за месец октомври, а Раул Гонсалес бил избран за најдобар тренер. На 10 декември 2014 година, во големото градско дерби, „Вардар“ го победил „Металург“ со 26:20, благодарение на голманот Петар Ангелов, кој имал 18 одбрани. Најдобри стрелци за „Вардар“ биле Стефан Терзиќ, со 10 гола и Сергеј Горбок, со 7 постигнати гола. Во претпоследното коло, на гостувањето во Прешов, „Вардар“ го победил тимот на „Татран“ со 34:29 (12:12) и така предвреме го обезбедил второто место во основниот дел од лигата „СЕХА“. Најефикасни во редовите на „Вардар“ биле Добривое Марковиќ со осум гола, и Стојанче Стоилов и Сергеј Горбок со шест гола. Во последното коло, одиграно на 7 март 2015 година, „Вардар„ успеал да го победи водечкиот тим во лигата „Веспрем“ со 28-21. На крајот од првиот дел на лигата, „Вардар„ се пласирал на второто место, со учинок од 15 победи и три порази, со освоени вкупно 45 бодови и со гол разлика 531:462. На тој начин, клубот се квалификувал за завршниот турнир на четирите најдобри екипи.
На завршниот турнир, на 27 март 2015 година, „Вардар“ бил поразен во полуфиналето од „Брест Мешков“ со 28:32, така што играл во борбата за третото место со тимот на „ППД Загреб“. Меѓутоа, и во овој натпревар, „Вардар“ бил поразен со 23:26 (10:11), а најефикасни ракометари кај „Вардар“ биле Стоилов, Марковиќ, Карачиќ и Шишкарев, сите со по четири голови. На тој начин, сезоната во лигата СЕХА тимот на „Вардар“ ја завршил на четвртото место.

2015-2016

Во сезоната 2015-2016, во ноември, „Вардар“ одиграл само еден натпревар, кога се изборил за нерешен резултат (24-24) на гостувањето кај унгарската екипа „Веспрем“. Најефикасен во редовите на „Вардар“ бил Дибиров кој постигнал седум голови и бил прогласен за најдобро лево крило во лигата за ноември.

Според магазинот на лигата СЕХА, еден гол на Лука Циндриќ постигнат на гостувањето кај екипата на „Нексе“ бил прогласен за трет најубав гол во натпреварите одиграни во февруари, а една одбрана на Страхиња Милиќ била избрана на петтото место на списокот на најубавите одбрани. Исто така, Циндриќ и Дибиров биле избрани во идеалната екипа на лигата за месец февруари.

На последниот натпревар одигран на домашен терен, на 8 март, „Вардар“ повторно одиграл нерешено со „Веспрем“, овојпат со резултат 30:30 (13:12), а најефикасни ракометари биле Циндриќ и Дибиров, кои постигнале по шест гола. На тој начин, „Вардар“ се пласирал на финалниот натпревар во Вараждин при што во полуфиналето, одиграно на 1 април, се сретнал со хрватската екипа „ППД Загреб“, остварувајќи победа со резултат 26:24 (12:10). Најефикасен ракометар на „Вардар“ бил Дејан Манасков, кој постигнал шест гола.

Во финалниот натпревар, одигран на 3 април, „Вардар“ загубил од „Веспрем“ со резултат 26:28 (15:14), со што вторпат станал вице-шампион на лигата. Најефикасен во редовите на „Вардар“ бил Циндриќ, кој постигнал пет гола. Истовремено, Циндриќ и Душејбаев биле избрани во идеалната екипа на лигата, како најдобар среден бек и најдобар десен бек.

2016-2017

На отворањето на сезоната, на домашен терен, „Вардар“ одиграл нерешено со екипата на „Мешков“ 34:34 (15:18), а најефикасен играч бил Дибиров, со постигнати девет гола. Во второто коло, на 6 септември 2016 година „Вардар“ му гостувал на „Металург“ при што остварил тесна победа од 25:24 (13:13). Потоа, во третото коло, одиграно на 10 септември, „Вардар“ убедливо ја победил екипата на „Веспрем“ со резултат 29:22, а три дена подоцна ја совладал и екипата на „ППД Загреб“ со резултат 32:31. Успешната серија продолжила и во петтото коло, одиграно на 17 септември, кога на гостински терен убедливо била совладана екипата на Цеље (40:29), со што „Вардар“ се искачил на првото место во лигата. Во шестото коло, „Вардар“ бил убедливо подобар од екипата на „Татран“, совладувајќи ја со резултат 38:21 (20:13). Најдобрите поединци во „Вардар“ биле голманот Милиќ, кој одбранил 15 удари плус два седмерци, како и Душејбаев и Деревен, кои постигнале по пет гола. На 5 февруари 2017 година, во натпреварот одигран во Велење, „Вардар“ ја победил екипата на „Горење“, со што го обезбедил првото место во лигата. Истовремено, „Вардар“ станал најсупешната екипа во шестгодишната историја на „СЕХА“-лигата, со одиграни 111 натпревари во регуларната сезона, во кои постигнал 83 победи и освоил 259 бодови, со гол-разлика 3458:2908. Ако кон тоа се додадат и настапите на финалните турнири, тогаш „Вардар“ одиграл 121 натпревар, во кои постигнал 89 победи, 10 пати играл нерешено и претрпел 22 порази.
На финалниот турнир на „СЕХА“, одигран во Брест, на 7 април 2017 година „Вардар“ бил подобар од екипата на „ППД Загреб“, со резултат 36:28 (19:12), со што по петти пат се пласирал во финалето. Два дена подоцна, на 9 април, „Вардар“ бил подобар од „Веспрем“, со резултат 26:21 (11:11), со што ја освоил својата трета титула во ова натпреварување. Како признание на добрите игри на „Вардар“, дури четворица ракометари биле избрани во најдобрата екипа на турнирот, и тоа: Дибиров, Чупиќ, Борозан и Кањелас, кој бил прогласен за најкорисен играч на турнирот.

2017-2018

„Вардар“ ја започнал сезоната убедливо, остварувајќи четири победи по ред во првите четири кола, и тоа против: „Металург“ (32:23), „Горење“ (32:19), „Мешков Брест“ (31:23) и „Татран Прешов“ (32:28). Оттука, во идеалниот тим на лигата за септември имало тројца ракометари на Вардар (Тимур Дибиров, Вуко Борозан и Иван Чупиќ), додека Раул Гонсалес бил прогласен за најдобар тренер. Убедливите настапи на „Вардар“ продолжиле и во следните натпревари, така што по осум одиграни кола имал осум победи. Оттука, и во ноември, Гонсалес бил прогласен за тренер на месецот, а Марсениќ бил избран за најдобар пикер.

Финалниот турнир на лигата СЕХА се одржал од 13 до 15 април 2018 година, во Скопје. Притоа, на 13 април, во полуфиналниот натпревар „Вардар“ го победил „Мешков Брест“ со резултат 33:24 (17:14), со што се пласирал во шестото финале во низа. Најефикасен ракометар бил Лука Циндриќ, кој постигнал шест гола, а Арпад Штербик имал вкупно 18 одбрани (од кои два пенала). Со оваа победа, „Вардар“ постигнал нов рекорд во лигата СЕХА, остварувајќи ја најубедливата победа во финалните турнири (разлика од девет гола). Истовремено, „Вардар“ ја постигнал 18. победа во сезоната и својата 110. победа во лигата, зацврстувајќи се на врвот како единствената екипа која остварила над 100 победи во лигата СЕХА. Во регуларниот дел, „Вардар“ постигнал 17 победи и освоил 52 бода, што исто така претставуваат рекорди во лигата. На 15 април, во финалето, „Вардар“ се сретнал со екипата на „ППД Загреб“ и забележал победа од 26:24 (14:13), со што ја освоил четвртата титула во ова натпреварување. Притоа, Штербик, Циндриќ и Дибиров биле избрани во идеалниот состав на турнирот, Абутовиќ бил прогласен за најдобар одбранбен играч, додека Циндриќ бил прогласен за најкорисен играч.

2018-2019

Во редовната сезона на лигата СЕХА, „Вардар“ ги остварил следниве резултати:

Дата	Натпревар	Резултат
29.8.2018	Вардар - Металург	34:28
4.9.2018	Вардар - Железничар Ниш	35:20
9.9.2018	Татран Прешов - Вардар	26:27
18.9.2018	Вардар - Стеауа	27:21
2.10.2018	Вардар - Војводина	33:26
16.10.2018	ППД Загреб - Вардар	26:23
30.10.2018	Мешков Брест - Вардар	35:20
6.11.2018	Вардар - Нексе	31:26
28.11.2018	Вардар - Извиѓач	38:27
5.12.2018	Металург - Вардар	26:27
8.12.2018	Железничар Ниш - Вардар	22:24
12.12.2018	Вардар - Татран Прешов	23:21
17.12.2018	Стеауа - Вардар	30:34
31.1.2019	Војводина - Вардар	23:26
27.2.2019	Вардар - ППД Загреб	28:26
5.3.2019	Вардар - Мешков Брест	30:32
10.3.2019	Нексе - Вардар	24:21
12.3.2019	Извиѓач - Вардар	28:31

Финалниот турнир на лигата СЕХА се одржал на 2 и 3 април 2019 година, во Брест.На 2 април, во полуфиналето, „Вардар“ бил подобар од „Мешков“, со резултат 25:23 (14:10) и така се пласирал во своето седмо финале. Голманот Милосављев имал дури 18 одбрани, а најефикасен ракометар бил Стоилов, кој постигнал седум гола. Утредента, „Вардар“ ја освоил петтата титула во лигата СЕХА (трета по ред), откако во финалето ја совладал екипата на „ППД Загреб“ со резултат 26:23.

2019-2020

Во редовната сезона на лигата СЕХА, „Вардар“ ги остварил следниве резултати:

Дата	Натпревар	Резултат
3.9.2019	Вардар - Пекинг СУ	37:23
7.9.2019	Мотор Запорожје - Вардар	32:31
24.9.2019	Вардар - Нексе	27:25
1.10.2019	Татран Прешов - Вардар	22:29
29.10.2019	Пекинг СУ - Вардар	28:36
4.11.2019	Вардар - Војводина	26:23
13.11.2019	Вардар - Мотор Запорожје	44:37
3.12.2019	Војводина - Вардар	33:35
9.12.2019	Вардар - Татран Прешов	28:26
15.12.2019	Нексе - Вардар	42:26

На 8 март 2020 година, во Нашице, Хрватска, „Вардар“ го одиграл првиот натпревар од четвртфиналето при што ја победил екипата на „Нексе“ со резултат 31-30 (15-15). Најефикасен ракометар на натпреварот бил Дибиров, кој постигнал 12 гола. По големата пауза поради епидемијата со „Ковид-19“, на 29 август 2020 година, во Скопје се одржал вториот натпревар од четвртфиналето во кој „Вардар 1961“ (новото име на екипата) загубил од „Нексе“ со резултат 25-26 (13-13), но сепак успеал да пласира на завршниот турнир во Задар. Таму, во полуфиналето, по изведувањето на пеналите, „Вардар 1961“ го совладал „ПДП Загреб“ со резултат 30-29, откако претходно натпреварот завршил нерешено 26-26 (13-16). На тој начин, „Вардар“ се пласирал во осмото финале во деветте учества на финалниот турнир на СЕХА. Во финалето, „Вардар 1961“ бил поразен од екипата на „Веспрем“ со резултат 27-35 (12-15).

2020-2021

Во редовната сезона на лигата СЕХА, „Вардар“ играл во групата А и ги остварил следниве резултати:

Дата	Натпревар	Резултат
28.1.2021	Вардар - Војводина	25:21
1.2.2021	Вардар - Нексе	27:26
27.2.2021	Мотор Запорожје - Вардар 1961	30:23
17.3.2021	Нексе - Вардар 1961	36:32
19.3.2021	Вардар 1961 - Мотор Запорожје	32:27
27.4.2021	Војводина - Вардар 1961	33:24

Во плеј-офот, РК Вардар играл против екипата на Металопластика при што во првиот натпревар, одигран на 7 јуни, победил со резултат 39-31 (19-14), а утредента извојувал уште една победа со резултат 26-23 (14-11). Инаку, тој бил последниот натпревар за неколку ракометари на РК Вардар: Шеваљевиќ, Кантегрел, Јотиќ, Кизиќ, Дисингер, Калараш и Чупиќ, како и за тренерот Стевче Алушевски. На тој начин, РК Вардар се пласирал во четвртфиналето каде се сретнал со екипата на ППД Загреб. Притоа, во првиот натпревар, одигран во Скопје, РК Вардар победил со резултат 24-20 (14-12), додека во вториот натпревар загубил со резултат 22-25 (10-12). На тој начин, РК Вардар изборил пласман на завршниот турнир, меѓутоа извршниот комитете на лигата го исклучил клубот од натамошните натпревари поради тоа што еден играч бил заразен со вирусот КОВИД-19.

Лига на шампионите

РК „Вардар“ има повеќе учества во Лигата на шампионите на ЕХФ: 2001/2002, 2002/2003, 2003/2004, 2004/2005, 2007/2008, 2009/2010, 2013/2014, 2014/2015, 2015/2016 и 2016/2017. Своето прво учество во групната фаза од Лигата на шампионите „Вардар“ го остварил во сезоната 2001/2002, кога во квалификациите ја победил турската екипа „АСКИ Анкара“ со резултат 37:31, а на гостувањето загубил со 27:28. Така, „Вардар“ станал втората македонска екипа што се квалификувала во групната фаза на Лигата на шампионите. Притоа, „Вардар“ играл во група со „Магдебург“, „Веспрем“ и „Шамбери“, при што првата победа во групната фаза на Лигата на шампионите ја остварил во натпреварот против „Шамбери“ (32:30). Потоа, четири сезони по ред „Вардар“ играл во Лигата на шампионите, по што следувала пауза од две сезони. Во сезоната 2009/2010, „Вардар“ повторно изборил учество во Лигата на шампионите, каде одиграл 10 натпревари.

Сезона 2013-2014

Во сезоната 2013/2014, РК „Вардар“ играл во групата Ц, заедно со: РК Металург, „Динамо“ - Минск, „ПСЖ Хандбал“, „Барселона“ и „Вакер Тун“. Притоа, РК „Вардар“ го освоил четвртото место, со вкупно 10 бодови од 10 натпревари, со што се пласирал во осминафиналето. РК „Вардар“ ги постигнал следниве резултати во групната фаза: На 21 септември 2013, во натпреварот против „Барселона“, одигран во Скопје во рамките на првото коло, РК „Вардар“ одиграл нерешено 29:29 (15:19); во второт коло, одиграно на 25 септември 2013 во Минск, РК „Вардар“ изгубил 26:24 (11:11); во третото коло, одиграно на 13 октомври 2013, РК „Вардар“ го пречекал во Скопје тимот на „ПСЖ Хандбал“, одигрувајќи нерешено 24:24 (9:12); на 19 октомври 2013, во рамките на четвртото коло, РК „Вардар“ победил убедливо на гостувањето кај „Вакер Тун“ со 37:24 (19:11); на 14 ноември 2013, во Скопје, РК „Вардар“ го победил РК „Металург“ со 27:22 (14:9); подоцна, на 24 ноември 2013, во рамките на шестото коло, овие два тима повторно се сретнале во Скопје при што РК „Вардар“, овојпат во улогата на домаќин, изгубил убедливо со 18:26 (12:10); на 30 ноември 2013, РК „Вардар“ гостувал кај „Барселона“ и изгубил со 30:23 (14:11); во осмото коло, одиграно на 9 февруари 2014, РК „Вардар“ го пречекал „Динамо“ - Минск и забележал убедлива победа од 30:22 (14:11); во деветтото коло, одиграно на 16 февруари 2014, РК „Вардар“ пак бил домаќин, победувајќи го „Вакер Тун“ со 32:25 (17:11); и во последното коло, на 22 февруари 2014, РК „Вардар“ му гостувал на „ПСЖ Хандбал“ при што изгубил со 35:25 (15:12).
Во осминафиналето на Лигата на шампионите, РК „Вардар“ се сретнал со европскиот шампион РК „Хамбург“. Првиот меч, одигран на 22 март 2014 во Скопје, завршил нерешено 28:28 (14:16), а на реваншот, одигран на 30 март 2014 во Хамбург, РК „Вардар“ направил големо изненадување, остварувајќи победа од 30:29 (17:15) и така се пласирал во четврфиналето на Лигата на шампионите. Во четвртфиналето, РК „Вардар“ се сретнал со германскиот клуб РК „Фленсбург“. Притоа, на првиот натпревар, одигран на 21 април 2014 година во Германија, РК „Вардар“ загубил со 22:24 (14:13), а во вториот натпревар, одигран на 26 април 2014 година во Скопје, победил со 27:25 (10:15). Сепак, и покрај победата, РК „Вардар“ не успеал да се пласира на завршниот турнир во Келн, порaди тоа што во гости постигнал помалку голови од противникот.

Сезона 2014-2015

Во сезоната 2014-2015, РК „Вардар“ играл во групата „Ц“. Својот прв натпревар од групната фаза, РК „Вардар“ го одиграл на 27 септември 2014 година, на гости против Цеље, каде остварил тесна победа од 27:26 (12:12). Најзаслужни за победата биле голманот Арпад Штербик, кој имал дури 22 одбрани, како и Тимур Дибиров и Алекс Душебаев, со постигнати 11 и осум голови, соодветно. Во второто коло, одиграно на 4 октомври 2014 година, РК „Вардар“ играл на домашен терен против тимот на „Чеховски медведи“. Натпреварот се играл во новата сала СЦ „Јане Сандански“ при што „Вардар“ остварил убедлива победа од 39:28 (24:12). Најзаслужни за победата биле Дибиров и Душебаев, со постигнати осум и седум голови, соодветно. Во третото коло, на домашен терен, „Вардар“ го победил германскиот тим „Рајн Некар Ловен“ со 28:25 (13:13). Притоа, голманот Арпад Штeрбик, со 14 одбрани, бил најдобриот играч на „Вардар“, додека најдобри стрелци биле Матјаж Брумен со шест, како и Алекс Душебаев и Игор Карачиќ со по пет гола.

Во четвртото коло, одиграно на 19 октомври 2014 година, РК „Вардар“ му гостувал на францускиот клуб „Монпелје“ и одиграл нерешено 34:34 (17:19). Најефикасен во тимот на „Вардар“ бил Дибиров, со постигнати девет гола, поради што се нашол во идеалниот тим за четвртото коло на Лигата на шампионите. Втор стрелец бил Игор Карачиќ, со постигнати осум гола. На 15 ноември 2014 година, во рамките на петтото коло, на домашен терен, „Вардар“ изгубил од тимот на „Веспрем“ со 23:24 (11:13). По натпреварот со „Веспрем“, клубот соопштил дека потпишал договор со шпанскиот ракометар Хорхе Македа, со важност до јуни 2017 година. Една недела подоцна, на 22 ноември 2014 година, „Вардар“ му гостувал на „Веспрем“, каде доживеал убедлив пораз од 24:32 (10:16). Во седмото коло, одиграно на 29 ноември 2014 година, во Скопје, „Вардар“ го победил тимот на „Цеље“ со 34:32 (19:17), додека на 6 декември, во рамките на осмото коло, на гостински терен бил совладан тимот на „Чеховски медведи“ со 39:34 (19:16). Во деветтото коло, одиграно на 14 февруари 2015 година на домашен терен, „Вардар“ го совладал тимот на „Монпелје“ со 30:26 (18:13), во натпреварот во кој Дибиров дал дури 12 голови. Најпосле, на 21 февруари 2015 година, во десеттото коло, „Вардар“ му гостувал на тимот на „Рајн Некар Левен“, остварувајќи победа од 35:28 (20:13). На тој начин, „Вардар“ завршил како второпласиран во групата, со седум победи, еден нерешен резултат и два пораза. Притоа, клубот освоил 15 бодови од 10 одиграни натпревари, со гол разлика од 313:289. Со тоа, „Вардар“ се пласирал во осминафиналето на Лигата на шампионите.

Во осминафиналето на Лигата на шампионите, „Вардар“ се сретнал со полскиот тим „Висла Плок“. На првиот натпревар, одигран на 14 март 2015 година, „Вардар“ загубил со 26-32. Најефикасен ракометар во редовите на „Вардар“ бил Алекс Душејбаев, кој постигнал 10 голови. Меѓутоа, во вториот натпревар, одигран на 21 март 2015 година во Скопје, „Вардар“ остварил убедлива победа до 31:20 и со тоа се пласирал меѓу осумте најдобри клуба во Европа. И на овој натпревар, најдобар стрелец бил Душејбаев, со постигнати девет голови, додека голманот Штербик, кој се истакнал со своите одлични одбрани, од страна на навивачите на ЕХФ бил избран за играч на колото.

Во четвртфиналето, „Вардар“ играл против полскиот „Келце“. Во првиот натпревар, одигран во Скопје, на 11 април 2015 година, „Вардар“ бил поразен со 20:22, при што пикерот Стојанче Стоилов бил избран за дел од најдобриот тим на колото, додека голманот Штербик влегол во изборот на петте најдобри одбрани. Нешто подоцна, според гласовите на гледачите на Лигата на шампионите, Стоилов бил прогласен за најдобар играч во првото коло од четвртфиналето. Во вториот натпревар, одигран на 19 април 2015 година, „Вардар“ повторно претрпел пораз, овојпат со 31:33. Притоа, повторно, неколку ракометари на „Вардар“ се истакнале со својата игра, па во изборот на ЕХФ, Алекс Душејбаев (кој постигнал 9 голови) бил избран во тимот на колото, голманот Страхиња Милиќ ја имал втората најдобра одбрана, додека крилото Матјаж Брумен го дал петтиот најубав гол.

Сезона 2015-2016

Во сезоната 2015-2016, РК „Вардар“ играл во групата „Б“. Својот прв натпревар од групната фаза, РК „Вардар“ го одиграл на 20 септември 2015 година, на гости против екипата на „Монпелје, каде остварил победа од 30:25 (9:12). Најефикасни во редовите на „Вардар“ биле Дибиров и Македа, кои постигнале по шест голови., а одлично издание имал и Штербик, кој, благодарение на своите 18 одбрани, бил прогласен за најдобар голман во првото коло на Лигата на шампионите. Во второто коло, одиграно во Скопје на 27 септември 2015 година, „Вардар“ остварил победа над унгарскиот „МОЛ-ПИК Сегед (MOL-PICK Szeged)“ со резултат 27:23 (11:11). Најдобри стрелци за „Вардар“ биле Карачиќ, кој постигнал пет гола, и Дујшебаев и Лука Циндриќ, кои постигнале по четири гола, додека Штербик имал 13 одбрани. На овој натпревар, за првпат во Лигата на шампионите, во дресот на „Вардар“ настапил Дејан Манасков, кој постигнал два гола. Во третото коло, одиграно на 4 октомври 2015 година, „Вардар“ остварил победа над шведската екипа „Кристијанштад“ со резултат 30:25 (15:13). Најдобри стрелци за „Вардар“ биле Алем Тоскиќ (кој бил избран во идеалниот тим на колото, како најдобар пикер) и Тимур Дибиров, кои постигнале по седум гола, а Штербик имал 18 одбрани.
Успешниот поход на „Вардар“ продолжил и во четвртото коло. На 10 октомври 2015 година, на домашен терен, „Вардар“ ја победил германската екипа „Рајн Некар“ со 25:19 (11:10). Најефикасни ракометари во „Вардар“ биле Душејбаев и Дибиров, кои постигнале седум и шест гола, соодветно, но вистинскиот пресврт во натпреварот настапил со влегувањето во игра на голманот Петар Ангелов, кој бранел извонредно во клучните моменти. Како признание на добрата игра на „Вардар“, една одбрана на Ангелов се пласирала на петтото место на најдобрите одбрани, а „цепелинот“ на Данил Шишкарев и Тимур Дибиров бил прогласен за трет најубав гол на колото.
На 18 октомври, во петтото коло, на гостински терен, „Вардар“ претрпел неочекуван пораз од последнопласираната екипа во групата „КИФ Колдинг“ од 31:33 (15:17), а најефикасни во екипата на „Вардар“ биле Дибиров и Македа кои постигнале по седум голови. Притоа, „цепелинот“ на Игор Карачиќ и Тимур Дибиров бил проглаен за најубав гол на колото. На 24 октомври, во рамките на шестото коло, „Вардар“ забележал убедлива победа над „Келце“ од 34:24 (18:14), во натпревар во кој повторно се истакнал голманот Арпад Штербик, кој имал процент од 37% одбранети удари, поради што бил избран за најдобар голман на колото. Исто така, една негова одбрана била прогласена за четврта најдобра одбрана. Покрај него, во идеалниот состав на шестото коло се нашол и Тимур Дибиров, кој постигнал осум голови, а исто толку постигнал и Сергеј Горбок.
На 14 ноември, во рамките на седмото коло, „Вардар“ бил поразен на гостувањето кај „Барселона“ со резултат 30:31 (13:16) при што најефикасен во редовите на „Вардар“ бил Горбок со постигнати осум гола, додека една интервенција на Штербик била прогласена за петта најдобра одбрана на колото. Инаку, во 55. минута од натпреварот Карачиќ го постигнал 2.000 гол на „Вардар“ во групната фаза од Лигата на шампионите. Во осмото коло, одиграно на 22 ноември, на домашен терен „Вардар“ ја пречекал екипата на „Барселона“ при што повторно претрпел пораз од 25:27 (15:12). Најефикасен во редовите на „Вардар“ бил Горбок кој постигнал пет гола. И покрај поразот, Штербик бил прогласен за најдобар голман, а еден гол на Дибиров бил прогласен за трет најубав гол на колото. Лошата серија на „Вардар“ продолжила и во следното коло кога клубот го претрпел третиот последователен пораз. Во деветтото коло,одиграно на 28 ноември, „Вардар“ загубил и на гостувањето кај „Келце“ со резултат 20:23 (6:10). Најефикасни во редовите на „Вардар“ биле Мијајло Марсениќ и Сергеј Горбок, кои постигнале по пет голови, додека голманот Милиќ имал 15 одбрани. Во последниот натпревар одигран во 2015 година, во рамките на десеттото коло, на 5 декември во Скопхје „Вардар“ остварил убедлива победа над екипата на „Колдинг“ од 34:24 (18:8). Најефикасни во редовите на „Вардар“ биле Циндриќ и Дибиров, кои постигнале по четири гола, додека Штербик, иако не го одиграл целиот натпревар, имал 14 одбрани.
Во првиот натпревар одигран во 2016 година, на 11 февруари, во рамките на 11. коло, „Вардар“ загубил на гостувањето кај „Рајн-Некар“ со резултат 27:28 (15:14). Најефикасен ракометар во редовите на „Вардар“ бил Горбок, кој постигнал седум гола. Подоцна, на 20 февруари, „Вардар“ ја пречекал екипата на „Кристијанштад“ при што остварил победа од 38:36 (21:19), а најдобри стрелци биле Лука Циндриќ и Горбок, кои постигнале по осум и седум гола, соодветно. Во претпоследното коло одиграно на 28 февруари, „Вардар“ ѝ гостувал на екипата на „ПИК Сегед“ при што остварил победа од 31:29 (13:14). Најефикасен во редовите на „Вардар“ бил Македа со постигнати осум гола, а голманот Милиќ имал 13 одбрани, со што бил избран за најдобар голман на 13. коло на Лигата на шампионите, а една од неговите одбрани била прогласена за втора најубава во колото. Во последниот натпревар од грушната фаза, на 5 март, на домашен терен, „Вардар“ ја совладал екипата на „Монпелје“ со резултат 34:26 (17:17), а најефикасни ракометари биле Дејан Манасков и Душејбаев, кои постигнале по седум гола. На тој начин, по одиграни 14 кола, „Вардар“ завршил на третото место во групата „Б“, со 18 освоени бодови (девет победи и пет порази) и со гол разлика од 416:373 (петта најдобра разлика во Лигата на шампионите во сезоната 2015-2016. Со тоа, по завршувањето на групната фаза од лигата, „Вардар“ одиграл вкупно 82 натпревари во Лигата на шампионите и забележал 30 победи, девет нерешени натпревари и 43 порази. Со остварените 30 победи, „Вардар“ станал најуспешната македонска екипа во Лигата на шампионите, надминувајќи го „Металург“, кој имал 27 победи.
Во осминафиналето на Лигата на шампионите, „Вардар“ се сретнал со полската екипа „Висла Плок“. Во првиот натпревар, одигран на 16 март, „Вардар“ одиграл нерешено, со резултат 30:30 (14:16), во натпревар во кој Штербик имал 11 одбрани, а најефикасни стрелци биле Караџиќ и Циндриќ кои постигнале по шест и пет гола, соодветно. На 26 март се одиграл вториот натпревар на домашен терен, во кој „Вардар“ остварил тесна победа од 25:24 (13:15). Најефикасен во редовите на „Вардар“ бил Тоскиќ, кој постигнал осум гола, а се истакнал и голманот Штербик со неговите 17 одбрани. Така, „Вардар“ третпат по ред се пласирал во четврфиналето на Лигата на шампионите, во кое играл против „Веспрем“. Првиот натпревар, одигран на 23 април во Скопје, „Вардар“ го загубил со резултат 26:29 (9:12), а најефикасни во редовите на „Вардар“ биле Дибиров и Карачиќ, кои постигнале по шест голови. На 30 април се одиграл возвратниот натпревар кој завршил со нерешен резултат 30:30, иако „Вардар“ водел во првото полувреме со 14:12. Така, „Вардар“ не успеал трипати по ред да се пласира на финалниот турнир во Келн. Инаку, најефикасен во редовите на „Вардар“ бил Душејбаев, кој постигнал пет гола. Притоа, Душејбаев и Данил Шишкарев биле прогласени за ракометари кои го дале 3. и 5. најубав гол во ова коло на Лигата на шампионите.

Сезона 2016-2017

Пречек на ракометарите од „Вардар“ во Скопје, 6 јуни 2017

Во сезоната 2016-2017, РК „Вардар“ играл во групата „Б“, заедно со екипите на Рајн Некар, Келце, Пик Сегед, ППД Загреб, Мешков, Цеље и Кристијанштад. Во рамките на првото коло, на 25 септември, како гостин, „Вардар“ ја победил екипата на „Кристијанштад“ со резултат 28:23 (15.12), во натпревар во кој Штербик имал 19 одбрани, а Душебаев постигнал седум гола. Според изборот на ЕХФ-тв, Душебаев се нашол во идеалниот тим на првото коло, на позицијата десен бек. Потоа, во второто коло, на домашен терен, „Вардар“ ја победил екипата на „Мешков“ со резултат 31:27 (13:13), а најдобри стрелци во редовите на „Вардар“ биле Душејбаев (со девет гола) и Вуко Борозан (со седум гола). Во третото коло, одиграно на 9 октомври во Цеље, „Вардар“ бил подобар од домашната екипа со резултат 32:26 (15:15) при што најефикасни биле Марсениќ и Дибиров, со постигнати шест, односно пет гола, соодветно. Во четвртото коло, „Вардар“ ја продолжил победничката серија, со победата над „ПИК Сегед“ со резултат 30:27 (16:15) при што најефикасен ракометар бил Дибиров, кој постигнал осум гола.

Сепак, во петтото коло, на гостувањето во Загреб, „Вардар“ бил поразен од „ППД Загреб“ со 27:28 (17:12). На 12 ноември, „Вардар“ ја победил екипата на актуелниот европски шампион „Келце“ со резултат 40:34 (18:18). Притоа, Карачиќ постигнал девет, а Душебаев и Дибиров по осум гола, додека Штербик одбранил 14 топки и два пенала. Оттука, Штербик и Карачиќ биле избрани во најдобрата екипа на шестото коло, а одбраната на Штербик на пеналот во второто полувреме била прогласена за најдобра одбрана на колото. На 17 ноември, „Вардар“ гостувал кај екипата на „Рајн Некар“, каде остварил нова победа од 33:27 (17:16), а најзаслужен биле Хоан Канељас кој постигнал 10 гола, Циндриќ со постигнатите седум гола и Штербик, кој одбранил 13 удари и два пенала. Притоа, тие двајца се нашле во идеалниот тим на колото. Во осмото коло, одиграно на 26 ноември во Скопје, „Вардар“ повторно играл со екипата на „Рајн Некар“, но овојпат бил поразен со резултат 26:29 (15:15), а најефикасни во домашната екипа биле Борозан и Канељас, кои постигнале по шест гола. На 4 декември, во рамките на деветтото коло, „Вардар“ ѝ гостувал на екипата на „Келце“ при што бил поразен, со резултат 24:27 (12:15). Во редовите на „Вардар“ се истакнал голманот Милиќ, кој имал 13 одбрани плус три одбранети пенали, а најефикасни биле Душебаев и Карачиќ, кои постигнале по пет гола. Како признание на добрата игра, Милиќ бил избран во идеалниот тим, како најдобар голман на колото. Инаку, натпреварот портив „Келце“ започнал со една минута молчење по повод смртта на долгогодишниот секретар на „Вардар“, Бранко Дилберов.

Првиот натпревар по зимската пауза „Вардар“ го одиграл на 11 февруари 2017 година, кога на домашен терен ја победил екипата на „ППД Загреб“ со резултат 25:20 (14:8), со што повторно се вратил на првото место во групата, со освоени 14 бодови. Најефикасен ракометар во редовите на „Вардар“ бил Дујшебаев, кој постингал седум гола. Како резултат на добрата игра, Дујшебаев бил избран во идеалниот тим на колото, на позицијата десен бек; еден гол на Циндриќ бил избран за трет најубав гол на колото; а Штербик ја имал четвртата најдобра одбрана на колото. На 18 февруари 2017 година, „Вардар“ извојувал многу важна победа на гостински терен, против „ПИК Сегед“, со резултат 23:21. Најефикасен ракометар во редовите на „Вардар“ бил Дибиров, со постогнати шест гола, додека голманот Штербик се истакнал со своите 13 одбрани, меѓу кои и три седмерци. на 25 февруари, „Вардар“ остварил уште една победа, овојпат против екипата на „Цеље“, со резултат 35:30 (20:15). На тој начин, „Вардар“ ја остварил својата 40. победа во Лигата на шампионите, а Дујшебаев (кој постигнал осум голови) бил прогласен за најдобар десен бек на колото. Во 13. коло, одиграно на 4 март 2017 година, „Вардар“ загубил на гостувањето против „Мешков Брест“ со резултат 26:30 (13:15). Најефикасни во редовите на „Вардар“ биле Карачиќ и Чупиќ, кои постигнале по пет гола. Најпосле, во последното коло, одиграно на 12 март 2017 година во Скопје, „Вардар“ остварил победа над шведската екипа „Кристијанштад“, со резултат 32:29 (17:13) Најефикасен во редовите на „Вардар“ бил Борозан, кој постигнал шест гола, а Штербик имал дури 19 одбрани. Инаку, ова бил јубилејниот 100. настап на „Вардар“ во Лигата на шампионите при што била остварена 41. победа. Со тоа, „Вардар“ ги завршил настапите на првото место во својата група, со 10 победи и четири порази, со своени 20 бодови и со гол разлика од 412:378. Така, како победник во групата, „Вардар“ директно се пласирал во четврфиналето (четврти пат по ред).

Во четврфиналето, „Вардар“ се сретнал со германската екипа „Флензбург“. Притоа, во првиот натпревар, одигран на 22 април на гостински терен, „Вардар“ победил со резултат 26:24 (15:9). Потоа, на 27 април, „Вардар“ извојувал уште една победа, со резултат 35:27 (15:10) и така за првпат се пласирал на завршниот натпревар во Келн. Пред почетокот на завршниот турнир, Алекс Душебаев бил избран во најдобрата екипа на Лигата на шампионите, како најдобар десен бек, додека Раул Гонсалес бил прогласен за најдобар тренер. На 3 јуни 2017 година, „Вардар“ играл во полуфиналето против екипата на „Барселона“ и извојувал победа од 26:25 (13:12), со голот на Лука Циндриќ постигнат три секунди пред крајот на натпреварот. Утредента, „Вардар“ играл во финалето против „ПСЖ“ и на сличен начин, со голот на Иван Чупиќ во последната секунда, извојувал победа со резултат 24:23 (11:12) и ја освоил шампионската титула, со што го постигнал најголемиот успех во својата историја. Најефикасен ракометар во финалето бил Тимур Дибиров со шест гола, а Арпад Штербик со своите 16 одбрани бил прогласен за најкорисен играч (MVP) на финалниот турнир, како прв голман во историјата што го освоил ова признание. Како признание за шампионската титула, ракометарите на „Вардар“ биле одликувани од претседателот на Македонија Ѓорге Иванов со „Медал за заслуги за Македонија“, а на клубот му го доделил признанието „Повелба на Република Македонија“, како прва спортска екипа во Македонија која го добила ова признание.

Сезона 2017-2018

Во сезоната 2017-2018, РК „Вардар“ играл во групата „А“, заедно со екипите на „Барселона“, „Пик Сегед“, „ППД Загреб“, „Рајн Некар“, „Нант“, „Кристијанштад“ и „Висла Плоцк“. „Вардар“ ја почнал новата сезона во Лигата на шампионите со победата над „Висла Плоцк“, на гостински терен, со резултат 26:22 (13:9). Во второто коло, одиграно на домашен терен, „Вардар“ ја совладал екипата на „Нант“, со резултат 27:23 (14:10). Благодарение на десетте одбрани (плус два пенала), Штербик бил избран за најдобар голман на второто коло. Во третото коло, одиграно на 1.10.2017, на домашен терен, „Вардар“ ја совладал екипата на „ППД Загреб“, со резултат 28:21 (13:10). Најдобри стрелци за “Вардар“ биле Борозан и Македа, кои постигнале по четири гола, додека Штербик имал 13 одбрани. На тој начин, „Вардар“ ја остварил својата најдолга победничка серија во Лигата на шампионите, со осум последователни победи. Во следното коло, „Вардар“ ѝ гостувал на екипата на „ПИК Сегед“, каде што одиграл нерешено 26:26 (13:14). Борозан постигнал осум гола, Циндриќ седум, додека Штербик имал 14 одбрани. На 14 октомври, „Вардар“ ја пречекал „Барселона“ на домашен терен и остварил победа од 27:24 (16:12), а повторно најефикасен ракометар на „Вардар“ бил Борозан, со постигнати шест гола, додека Штербик имал 15 одбрани. Благодарение на извонредните одбрани, Штербик бил прогласен за најдобар ракометар во Лигата на шампионите во октормври.

Во следното коло, одиграно на 4 ноември 2017 година, „Вардар“ ја победил екипата на „Кристијанштад“ на гостински терен, со резултат 26:23 (15:10), а најефикасни ракометари биле Борозан, Дибиров и Криштопанс со по седум голови. Потоа, на 11 ноември, на гостински терен, „Вардар“ ја победил екипата на „ПДП Загреб“ со резултат 29:23 (15:10). На 18 ноември, на домашен терен, „Вардар“ бил подобар од „Рајн Некар“, со резултат 30:26 (17:13), а најдобар стрелец бил Борозан, кој постигнал седум гола. Во рамките на деветтото коло, на 26 ноември, „Вардар“ гостувал кај „Рајн Некар“, каде одиграл нерешено, 21:21 (11:11), а најефикасен ракометар бил Дибиров, кој постигнал пет гола.

Во последниот натпревар во календарската година, на 2 декември, „Вардар“ ја победил екипата на Кристијанштад со резултат 31:15 (14:8). На тој начин, „Вардар“ постигнал неколку рекорди во клупската историја: највисоката победа во Лигата на шампионите, низа до 15 натпревари без пораз во Лигата на Шампионите и 20 натпревари без пораз во сите меѓународни натпревари. Притоа, и овојпат се истакнал голманот Штербик, кој во првото полувреме имал повеќе одбрани (девет) отколку што противникот постигнал голови (осум), а на крајот стигнал до вкупно 17 одбрани. Најефикасен ракометар во редовите на „Вардар“ бил Дибиров, кој постигнал седум гола. Притоа, една одбрана на Штербик била прогласена меѓу петте најдобри во колото.

На 10 февруари 2018 година, „Вардар“ го претрпел првиот пораз во сезоната, и тоа на гостински терен кај „Барселона“, со резултат 28:29 (14:15). Штербик имал 14 одбрани, најефикасен ракометар бил Криштопанс, кој постигнал седум гола, а еден гол на Дибиров бил избран меѓу најдобрите пет гола на колото. Во следното коло, „Вардар“ ја победил екипата на „ПИК Сегед“ со 34:30 (16:14), а најефикасен ракометар бил Дибиров кој постигнал 11 гола, со што бил избран за најдобро лево крило на колото. Истовремено, еден гол на Марсениќ бил избран за втор најубав гол на колото. На 25 февруари, на гостувањето во Нант „Вардар“ го претрпел вториот пораз во групата, овојпат со резултат 26:27 (12:18), а најефикасен во редовите на „Вардар“ бил Дибиров, со постигнати шест гола. На 4 март, во рамките на последното коло во групната фаза, „Вардар“ одиграл нерешено со „Висла“, 31:31 (16:16) и така, завршувајќи на првото место во својата група, директно се пласирал во четвртфиналето, каде се сретнал со екипата на „Кил“. Притоа, во првиот натпревар, одигран на 22 април, „Вардар“ остварил победа со резултат 29:28. Во вториот натпревар, одигран во Скопје на 29 април, „Вардар“ загубил со резултат 27:28 (13:13), но сепак се пласирал за завршниот турнир во Келн. Притоа, Штербик бил избран за најдобар голман во Лигата на шампионите во сезоната 2017-2018.

На финалниот турнир во Келн, во полуфиналето одиграно на 26 мај 2018 година, „Вардар“ се сретнал со екипата на „Монпелје“ и претрпел минимален пораз од 27:28 (11:14), а најефикасни во редовите на „Вардар“ биле Борозан и Циндриќ кои постигнале по шест гола. Утредента, во натпреварот за бронзениот медал, „Вардар“ бил поразен од екипата на „ПСЖ“ со резултат 28:29 и така сезоната ја завршил на четвртото место во Лигата на шампионите.

Сезона 2018-2019

Во сезоната 2018-2019, РК „Вардар“ играл во групата „А“, заедно со екипите на „Барселона“, „Келце“, „Мешков Брест“, „Рајн Некар“, „Веспрем“, „Кристијанштад“ и „Монпелје“. „Вардар“ ја почнал новата сезона во Лигата на шампионите со победата над европскиот шампион „Монпелје“, на гостински терен, со резултат 27:24 (12:11), а најефикасен ракометар бил Борозан, со постигнати осум гола. Во второто коло, на домашен терен, „Вардар“ ја победил екипата на „Кристијанштад“, со резултат 33:25 (19:10), а најефикасен во редовите на „Вардар“ бил Чупиќ, кој постигнал седум гола. „Вардар“ остварил победа и во третото коло, на гостувањето кај „Веспрем“, со резултат 27:25 (13:11), а најефикасен ракометар бил Тимур Дибиров, со постигнати шест гола. Потоа, на домашен терен, „Вардар“ ја победил екипата на „Рајн Некар“ со резултат 29:27 (13.15), а повторно најефикасен ракометар бил Тимур Дибиров, кој постигнал осум гола. Поради прикажаната игра, тој бил прогласен за најдобро лево крило на четвртото коло, а една одбрана на голманот Дејан Милосављев влегла во изборот на петте најдобри одбрани на колото. Меѓутоа, во следното коло, на гостувањето кај „Келце“, „Вардар“ го претрпел првиот пораз, со резултат 27:31 (15:16), а најефикасни во редовите на „Вардар“ биле Скубе и Дибиров, кои постигнале по шест гола. Во шестото коло, „Вардар“ бил подобар од екипата на „Мешков“ од Брест, со резултат 30:23 (14:14), а најефикасен ракометар бил Игор Карачиќ, кој постигнал 11 гола. И во седмото коло, „Вардар“ играл на домашен терен при што бил поразен од „Барселона“, со резултат 26:30 (9:13). Во редовите на „Вардар“, најефикасен бил Дибиров, со постигнати шест гола. На 17 ноември, „Вардар“ повторно играл против „Барселона“, овојпат на гостински терен, и претрпел убедлив пораз од 26:34 (15:16) при што Чупиќ, со постигнатите пет гола, бил најдобриот стрелец на „Вардар“. Една недела подоцна, на 24 ноември, „Вардар“ одиграл нерешено, 31:31 (13:14), на гостувањето против екипата на „Мешков“ во Брест, а најефикасен ракометар на „Вардар“ бил Даинис Криштопанс, кој постигнал 8 гола. Во десеттото коло, одиграно на 1 декември во Скопје, „Вардар“ бил подобар од „Келце“ со резултат 28:27 (14:11). На 16 февруари 2019 година, „Вардар“ повторно играл на домашен терен, овојпат против „Веспрем“, но го загубил натпреварот со резултат 27:29 (16:11), а најефикасен ракометар во редовите на „Вардар“ бил Дисингер, кој постигнал пет гола. Во претпоследното коло, „Вардар“ бил подобар од „Кристијанштад“, со резултат 32:30 (16:17), а најефикасен ракометар бил Криштопанс, кој постигнал осум гола и поради тоа бил избран за најдобар десен бек на колото, еден гол на Дибиров бил избран во најубавите пет гола, додека една одбрана на Калифа Гедбан се нашла во петте најубави одбрани на колото. Најпосле, во последното коло, одиграно на 2 март, „Вардар“ ја совладал екипата на „Монпелје“ со резултат 33:27 (16:13). Повторно, најефикасен ракометар бил Криштопанс, кој постигнал седум гола, додека голманот Милосављев имал 15 одбрани.

На 23 март, во Загреб, „Вардар“ го одиграл првиот натпревар од осминафиналето во кој го победил домаќинот „ППД Загреб“ со резултат 27:18 (14:6). Втората средба од осминафиналето се одиграла во Скопје, на 30 март, а „Вардар“ повторно победил, овојпат со резултат 32:30 (19:13), а најефикасен ракометар бил Иван Чупиќ, кој постигнал девет гола. На тој начин, шеста сезона по ред, „Вардар“ се пласирал во осумте најдобри екипи во Европа.

На 25 април, во Скопје, „Вардар“ го одиграл првиот четврфинален натпревар против екипата на „ПИК Сегед“ и забележал убедлива победа од 31:23 (14:12). Во реваншот, одигран на 5 мај, „Вардар“ претрпел пораз од 25:29, но сепак, третпат по ред, се пласирал на финалниот турнир во Келн. Пред почетокот на финалниот турнир бил избран идеалниот тим на Лигата на шампионите во кој влегле тренерот Роберто Парондо и дури четворица ракометари на „Вардар“, и тоа: Милосављев, Дибиров, Криштопанс и Чупиќ.

На финалниот турнир во Келн, во полуфиналето, одиграно на 1 јуни 2019 година, „Вардар“ ја победил екипата на „Барселона“ со резултат 29:27 (9:16). Во второто полувреме, „Вардар“ прикажал одлична игра, постигнувајќи 20 голови со висок процент од дури 83% прецизни шутеви на голот, голманот Дејан Милосавлев имал 15 одбрани, а Криштопанс постигнал 10 гола.

Утредента, во финалето, „Вардар“ ја победил екипата на „Веспрем“ со резултат 27:24 (16:11) и така по вторпат станал шампион на Европа. Притоа, за најкорисен играч на финалниот турнир бил прогласен Игор Карачиќ, а најефикасен ракометар во финалето бил Рожерио Мораеш, кој постигнал шест гола.

Сезона 2019-2020

Во сезоната 2019-2020, РК „Вардар“ играл во групата „Б“, заедно со екипите на „Кил“, „Келце“, „Мешков Брест“, „Мотор Запорожје“, „Веспрем“, „Порто Софарма“ и „Монпелје“. на 14 септември, во првото коло, „Вардар“ гостувал во Монпелје и победил со резултат 33-31 (16-17), а со тоа ја остварил 70. победа во групната фаза од Лигата на шампионите. Најефикасен ракометар на „Вардар“ бил Скубе кој постигнал седум гола, а Дибиров постигнал шест гола. Во второто коло, одиграно на 22 септември во Скопје, „Вардар“ бил подобар од екипата на „Порто Софарма“ со резултат 32-27 (14-16), а најефикасен ракометар бил Кристопанс кој постигнал седум гола. На 29 септември, на гостински терен, „Вардар“ остварил победа против „Мотор Запорожје“ со резултат 31-30 (16-18), а најефикасни ракометари биле Дибиров и Кристопанс кои постигнале десет и седум гола, соодветно. Победничката низа на „Вардар“ била прекината на 12 октомври, со поразот од „Кил“ на домашен терен со резултат 20-31 (4-16), а во петтото коло „Вардар“ уште еднаш бил убедливо поразен, овојпат од „Веспрем“, со резултат 30-39 (17-21). Најефикасен ракометар на „Вардар“ бил Дибиров, кој постигнал осум гола.

На 3 ноември, на домашен терен, „Вардар“ ја совладал екипата на „Мешков Брест“ со резултат 36-31 (19-17), а најефикасен ракометар во редовите на „Вардар“ бил Криштопанс, кој постигнал девет гола. Така „Вардар“ ја остварил својата 73. победа во Лигата на шампионите, со што се искачил на 12. место на списокот на најуспешните екипи, според бројот на победите. На 9 ноември, „Вардар“ повторно играл на домашен терен, овојпат против екипата на „Келце“ при што натпреварот завршил нерешено, 28-28 (17-16). Најефикасен во редовите на „Вардар“ бил Скубе со постигнати седум гола. Една недела подоцна, „Вардар“ повторно играл со „Келце“, овојпат на гостински терен, при што претрпел убедлив пораз, со резултат 25-35 (14-17), а најефикасен ракометар на натпреварот бил Дибиров, кој постигнал девет гола. Во деветтото коло, „Вардар“ го претрпел четвртиот пораз во сезоната, овојпат од екипата на „Мешков“ од Брест со резултат 22-31 (13-12). Најефикасен ракометар на „Вардар“ бил Стоилов, кој постигнал шест гола. Во следното коло, „Вардар“ повторно бил поразен, овојпат од „Веспрем“, со резултат 29-38 (15-22). Најефикасен ракометар на „Вардар“ бил Павел Атман, кој постигнал седум гола.

Во 11. коло, „Вардар“ гостувал во Кил каде повторно претрпил убедлив пораз, овојпат со резултат 23-34 (14-18). Најефикасни во редовите на „Вардар“ биле Криштопанс (шест гола) и Стоилов (пет гола). Во следното коло (15 февруари 2020 година), „Вардар“ играл на домашен терен при што остварил победа против екипата на „Мотор Запорожје“ со резултат 38-28 (16-11) и така седми пат по ред се пласирал во осминафиналето на Лигата на шампионите. Најефикасни во редовите на „Вардар“ биле Скупе и Чупиќ, кои постигнале осум и шест гола, соодветно. На 22 февруари, „Вардар“ ѝ гостувал на екипата на „Порто Софарма“ при што претрпел убедлив пораз, со резултат 22-30. Во последното коло од групната фаза, на 29 февруари, „Вардар“ ја пречекал екипата на „Монпелје“ и бил поразен со резултат 27-31 (13-14) и така го освоил шестото место во групата. Најефикасен ракометар во „Вардар“ бил Стоилов, кој постигнал седум гола.

Сезона 2020-2021

Во оваа сезона „Вардар“ играл во групата „А“, заедно со екипите на РК ПСЖ, РК Келце, РК Мешков Брест, РК Флензбург, РК „Пик Сегед“, РК Порто и РК Елверум. Во првото коло, на гостински терен, „Вардар“ бил поразен од „Мешков Брест“ со резултат 22-24 (10-12), а најефикасен ракометар во редовите на „Вардар“ бил Марко Вујин со постигнати шест гола. Откако натпреварите од второто и третото коло биле одложени, во рамките на четвртото коло, „Вардар“ ја пречекал во Скопје екипата на „Флензбург“ и остварил победа со резултат 31-26 (17-15), а во следното коло одиграл нерешено со екипата на Порто, 25-25 (13-12). Со своите 18 одбрани на овој натпревар, голманот Борко Ристовски бил избран во идеалниот тим на петтото коло. Во следниот натпревар, одигран на 19 ноември во Скопје, „Вардар“ бил поразен од „Келце“ со резултат 29-33 (13-15), а на 25 ноември, повторно претрпел пораз од оваа екипа со резултат 29-36. На 4 февруари 2021 година, „Вардар“ ѝ гостувал на екипата на „Порто“ при што претрпел пораз, 24-27 (13-13).

На 14 февруари 2021, „Вардар“ претпрпел пораз на домашен терен од ПИК Сегед со резултат 26-28 (15-13), а четири дена подоцна бил повторно поразен од истата екипа со резултат 33-34. На 21 февруари, на домашен терен, „Вардар“ одиграл нерешено со екипата на Елверум, 34-34 (20-21), а три дена подоцна ја победила истата екипа со резултат 35-32 (17-20). Најпосле, на 4 март 2021 година, „Вардар“ бил поразен од екипата на Мешков Брест со резултат 32-36. Истовремено, ЕХФ му доделила на „Вардар“ три службени бодови за трите неодиграни натпревари поради пандемијата и на тој начин „Вардар“ ја завршил групната фаза со освоени девет бода.

На 1 април, „Вардар“ го одиграл првиот натпревар од осминафиналето при што бил поразен на гостински терен од екипата на „Веспрем“ со резултат 27-41 (11-21). Најефикасен ракометар во редовите на „Вардар“ бил Чупиќ, кој постигнал девет голови. Потоа, во вториот натпревар, „Вардар“ претрпел уште еден пораз, овојпат со резултат 30-39 (10-15), и така го завршил својот настап во Лигата на шампионите.

Сезона 2021-2022

Во оваа сезона РК Вардар 1961 играл во групата „А“, заедно со екипите на Елверум, Мешков Брест, Алборг, Кил, ПИК Сегед и Монпелје. Во првото коло, на гостински терен, Вардар 1961 одиграл нерешено со екипата на Елверум со резултат 27-27 (13-13), а најефикасен во редовите на Вардар бил Жереми Тото, кој постигнал шест гола. Во второто коло, на домашен терен, Вардар ја совладал екипата на Мешков Брест со резултат 35-27 (19-13). Во третото коло, РК Вардар 1961 остварил победа и против екипата на Алборг 30-28 (16-16), а во овој натпревар посебно се истакнале голманот Ристовски, кој имал 12 одбрани плус три одбранети пенали, како и Оливие Њокас (со постигнати седум гола), Дибиров (шест гола) и Жереми Тото (пет гола). Во четвртото коло, РК Вардар 1961 претрпел пораз на домашен терен од екипата на Монпелје 25-31, во петтото коло бил поразен на гости од екипата на Алборг (29-33), а во шестото коло дома загубил од Кил 26-29 (13-10). Во следното коло, Вардар 1961 загубил на гостувањето кај ПИК Сегед со резултат 31:34, а потоа претрпел пораз од истата екипа, но овојпат на домашен терен, со резултат 27-30 (9-16). Најефикасни ракометари на Вардар 1961 биле Анте Гаџа и Тимур Дибиров кои постигнале по пет гола, а пред почетокот на натпреварот Дибиров добил подароци од клубот како признание за постигнатите илјада голови во Лигата на шампионите. На 2 декември, Вардар 1961 го претрпел и шестиот пораз во низа, овојпат од екипата на Кил, со резултат 30-32, а во следното коло бил поразен и од екипата на ППД Загреб со резултат 22:23. Потоа, Вардар 1961 успеал да победи во следните два натпревари, и тоа: најпрвин на гостински терен против екипата на Монпелје (28-25), а потоа на домашен терен против екипата на ППД Загреб (20-19). Откако го добил натпреварот против Мешков Брест со службен резултат 10-0, Вардар 1961 на домашен терен ја совладал екипата на Елверум со резултат 39-30.

На 31 март 2022 година, РК Вардар 1961 го одиграл првиот натпревар од осминафиналето на Лигата на шампионите при што загубил од екипата на Веспрем со резултат 22-30 (11-15). Најефикасни ракометари во екипата на РК Вардар 1961 биле Филип Талески и Тимур Дибиров, кои постигнале по шест гола. Вториот натпревар, одигран на 6 април, завршил со нерешен резултат 31-31 (13-18) и така екипата на РК Вардар го завршил својот настап во Лигата на шампионите.

Супер Глоуб

Како европски шампион, во август „Вардар“ настапил на турнирот „Супер Глоуб 2017“, неформалното светско клупско првенство. Притоа, по победата над „Гашаран“ (30:22), „Вардар“ загубил од „Барселона“ (29:32), а потоа бил убедливо подобар од „Ал Сад“ (37:19). Две години подоцна, „Вардар“ настапил и на „Супер Глоуб 2019“, каде најпрвин ја победил екипата на „Ал Мудхаб“ со резултат 34:27, но во полуфиналето бил поразен од „Кил“ со резултат 30:34 (17:19). Притоа, најефикасни ракометари во екипата на „Вардар“ биле Чупиќ, Дибиров и Шишкарев, кои постигнале по пет гола. Во натпреварот за третото место, „Вардар“ бил подобар од „Ал Вахда“ со резултат 30:26 (16:16), а најефикасни во редовите на „Вардар“ бил Иван Чупиќ, кој постигнал седум гола.

Состав

Состав за сезоната 2024–25

Голмани 01 Марко Богдановски 12 Мигел Еспиња Фереира 99 Васил Гогов Леви крила 02 Марио Стојановски 10 Хансер Родригез 27 Марко Срдановиќ Десни крила 09 Гоце Георгиевски (к) 70 Мигел Пинто 77 Ален Ќосевски Пивоти 07 Михаел Аларов 15 Ларс Коиј 18 Милан Лазаревски

Леви бекови 08 Томче Стојановски 24 Дмитро Горига 29 Матија Николиќ 33 Стефан Петриќ 87 Вуко Борозан 96 Нилтон Мело Средни бекови 11 Младен Крсманчиќ 14 Марио Танкоски Десни бекови 04 Томислав Јагуриновски 17 Кристијан Стаменковиќ 66 Ашраф Маргели

Поранешни состави

Сезона 2020/2021

Во сезоната 2020-2021, во екипата на РК Вардар 1961 настапувале следниве ракометари: 1 Борко Ристовски (МКД) / 77 Робин Кантегрел (ФРА) / 98 Марко Кизиќ (МКД) / 4 Томислав Јагуриновски (МКД) / 11 Мартин Карапалевски (МКД) / 15 Кристијан Дисингер / 18 Ловро Јотиќ (ХРВ) / 24 Анте Гаџа (ХРВ) / 28 Филип Талевски (МКД) / 41 Марко Вујин (СРБ) / 44 Јосип Векиќ (ХРВ)/ 97 Марко Мишевски (МКД) / 3 Патрик Валчак (ПОЛ) / 5 Стојанче Стоилов (МКД) / 9 Давид Гашоски (МКД) / 21 Глеб Калараш / 8 Димитар Димитриоски (МКД) / 9 Гоце Георгиевски (МКД) /27 Иван Чупиќ (ХРВ) / 31 Тимур Дибиров (РУС).

Сезона 2019/2020

Во сезоната 2019/2020, екипата на РК Вардар ја сочинувале следниве ракометари: 31 Дибиров Тимур (РУС) / 33 Шишкарев Даниил (РУС) / 5 Стоилов Стојанче (МКД) / 27 Чупиќ Иван (ХРВ) / 10 Криштопанс Даинис (ЛАТ) / 15 Кристијан Дисингер (ГЕР) / 22 Калифа Гедбане (АЛЖ) / 32 Сергеј Горбок (РУС) / 21 Глеб Калараш (РУС) / 98 Марко Кизиќ (МКД) / 97 Марко Мишевски (МКД) / 20 Сташ Скубе (СЛО) / 29 Жозе Де Толедо (БРА) / 8 Димитар Димитриоски (МКД) / 11 Мартин Карапалевски (МКД) / 7 Дејан Кукуловски (МКД) / 14 Домен Сикошек Пелко (СЛО) / 87 Сергеј Горпишин (РУС) / 92 Артурс Кугис (ЛАТ) / 77 Ален Ќошевски (МКД) / 55 Стефан Атанасовски (МКД) / 99 Васил Гогов (МКД) / 19 Павел Атман (РУС) / 9 Давид Гашовски (МКД) / 16 Борко Ристовски (МКД).

Сезона 2018/2019

Во сезоната 2018/2019, екипата на РК Вардар ја сочинувале следниве ракометари: 31 Дибиров Тимур (РУС) / 18 Караџиќ Игор (ХРВ) / 34 Борозан Вуко (ЦГ) / 7 Недановски Владо (МКД) / 33 Шишкарев Даниил (РУС) / 5 Стоилов Стојанче (МКД) / 27 Чупиќ Иван (ХРВ) / 13 Рожерио Фереира Мораеш (БРА) / 10 Криштопанс Даинис (ЛАТ) / 16 Ѓорѓевски Даниел (МКД) / 9 Поповски Мартин (МКД) / 37 Војводиќ Јања (СРБ) / 15 Кристијан Дисингер (ГЕР) / 22 Калифа Гедбане (АЛЖ) / 32 Сергеј Горбок (РУС) / 21 Глеб Калараш (РУС) / 98 Марко Кизиќ (МКД) / 97 Марко Мишевски (МКД) / 20 Сташ Скубе (СЛО) / 50 Дмитри Кисељев (РУС) / 96 Дејан Милосављев (СРБ) / 8 Грегор Оцвирк (СЛО).

Сезона 2017/2018

Во сезоната 2017/2018, екипата на РК Вардар ја сочинувале следниве ракометари: 20 Абутовиќ Илија (СРБ) / 25 Циндриќ Лука (ХРВ) / 31 Дибиров Тимур (РУС) / 18 Караџиќ Игор (ХРВ) / 34 Борозан Вуко (ЦГ) / 21 Жоан Канелас (ШПА) / 15 Македа Пена Жорге (ШПА) / 93 Марсениќ Мијајло (СРБ) / 12 Милиќ Страхиња (СРБ) / 7 Недановски Владо (МКД) / 33 Шишкарев Даниил (РУС) / 1 Штербик Арпад (ШПА) / 5 Стоилов Стојанче (МКД) / 27 Чупиќ Иван (ХРВ) / 13 Рожерио Фереира Мораеш (БРА) / 10 Криштопанс Даинис (ЛАТ) / 16 Ѓорѓевски Даниел (МКД) / 77 Ончев Тоше (МКД) / 9 Поповски Мартин (МКД) / 37 Војводиќ Јања (СРБ).

Сезона 2016/2017

Во сезоната 2016/2017, екипата на РК Вардар ја сочинувале следниве ракометари: 20 Абутовиќ Илија (СРБ) / 26 Ангелов Петар (МКД) / 25 Циндриќ Лука (ХРВ) / 17 Деревен Александер (РУС) / 31 Дибиров Тимур (РУС) / 19 Душебаев Алекс (ШПА) / 18 Караџиќ Игор (ХРВ) / 34 Борозан Вуко (ЦГ) / 21 Жоан Канелас (ШПА) / 15 Македа Пена Жорге (ШПА) / 93 Марсениќ Мијајло (СРБ) / 12 Милиќ Страхиња (СРБ) / 7 Недановски Владо (МКД) / 33 Шишкарев Даниил (РУС) / 1 Штербик Арпад (ШПА) / 5 Стоилов Стојанче (МКД) / 27 Чупиќ Иван (ХРВ) / 13 Рожерио Фереира Мораеш (БРА).

Сезона 2015/2016

Во сезоната 2015/2016, екипата на РК Вардар ја сочинувале следниве ракометари: 20 Абутовиќ Илија (СРБ) / 26 Ангелов Петар (МКД) / 25 Циндриќ Лука (ХРВ) / 17 Деревен Александер (РУС) / 31 Дибиров Тимур (РУС) / 19 Душебаев Алекс (ШПА) / 18 Караџиќ Игор (ХРВ) / 23 Лазаров Филип (МКД) / 11 Манасков Дејан (МКД) / 15 Македа Пена Жорге (ШПА) / 93 Марсениќ Мијајло (СРБ) / 12 Милиќ Страхиња (СРБ) / 7 Недановски Владо (МКД) / 33 Шишкарев Даниил (РУС) / 1 Штербик Арпад (ШПА) / 5 Стоилов Стојанче (МКД) / 7 Матијаж Брумен (СЛО) / 32 Горбок Сергеј (РУС) / 10 Тоскиќ Алем (СРБ) / 6 Лацковиќ Блаженко (ХРВ).

Сезона 2014/2015

Во сезоната 2014/2015, екипата на РК Вардар ја сочинувале следниве ракометари: 20 Абутовиќ Илија (СРБ) / 26 Ангелов Петар (МКД) / 31 Дибиров Тимур (РУС) / 19 Душебаев Алекс (ШПА) / 18 Караџиќ Игор (ХРВ) / 23 Лазаров Филип (МКД) / 12 Милиќ Страхиња (СРБ) / 33 Шишкарев Даниил (РУС) / 1 Штербик Арпад (ШПА) / 5 Стоилов Стојанче (МКД) / 7 Матијаж Брумен (СЛО) / 32 Горбок Сергеи (РУС) / 10 Тоскиќ Алем (СРБ) / 6 Лацковиќ Блаженко (ХРВ) / 80 Чипурин Михаил (РУС) / 15 Марковиќ Добривоје (СРБ) / 13 Петриќ Владимир (СРБ) / 8 Прибак Немања (СРБ) / 25 Растворцев Алексеј (РУС) / 9 Терзиќ Стефан (СРБ).

Поранешни играчи

Во екипата на „Вардар“ настапувале голем број македонски и странски ракометари, како:

• Илија Абутовиќ
• Стевче Алушевски
• Петар Ангелов
• Бранислав Ангеловски
• Горан Андоновски
• Павел Атман
• Вуко Борозан
• Матјаж Брумен
• Јосип Векиќ
• Јања Војводиќ
• Калифа Гедбан
• Васил Гогов
• Сергеј Горбок
• Сергеј Горпишин
• Александар Деревен
• Ванчо Димовски
• Кристијан Дисингер
• Алекс Душебаев
• Даниел Ѓорѓески
• Ванчо Јовановски
• Ловро Јотиќ
• Глеб Калараш
• Жоан Канељас
• Игор Карачиќ
• Марко Кизиќ
• Димитри Кисељев
• Даинис Криштопанс
• Артурс Кугис
• Дејан Кукуловски
• Филип Лазаров
• Блаженко Лацковиќ
• Хорхе Македа
• Пепи Манасков
• Добривое Марковиќ
• Мијајло Марсениќ
• Страхиња Милиќ
• Дејан Милосављев
• Марко Мишевски
• Наумче Мојсовски
• Фереира Мораес Рожерио
• Владо Недановски
• Андреј Петковски
• Зоран Петковски
• Владимир Петриќ
• Мартин Поповски
• Немања Прибак
• Алексеј Растворцев
• Љубомир Савевски
• Домен Сикошек Пелко
• Сташ Скубе
• Аце Станковски
• Стефан Терзиќ
• Жозе Толедо
• Алем Тоскиќ
• Лука Циндриќ
• Михаил Чипурин
• Иван Чупиќ
• Данил Шишкарев
• Арпад Штербик

Статистики

Најдобрите 10 голгетери во Лигата на шампионите До сезоната 2018–19 Место Име Сезони Голови 1 Тимур Дибиров 6 447 2 Игор Карачиќ 6 351 3 Алекс Душебаев 4 261 4 Иван Чупиќ 3 178 5 Лука Циндриќ 3 176 6 Данил Шишкарев 5 157 7 Вуко Борозан 3 156 8 Даинис Криштопанс 2 148 9 Стевче Алушевски 5 121 10 Алем Тоскиќ 3 111

Најмногу настапи во Лигата на шампионите До сезоната 2018–19 Место Име Сезони Настапи 1 Тимур Дибиров 6 101 2 Игор Карачиќ 6 95 3 Стојанче Стоилов 6 89 4 Данил Шишкарев 5 88 5 Илија Абутовиќ 5 79 6 Арпад Штербик 4 65 7 Алекс Душебаев 4 60 8 Страхиња Милиќ 5 59 9 Иван Чупиќ 3 53 Лука Циндриќ 3 53 Хорхе Македа 3 53 Мијајло Марсениќ 3 53

Поединечни награди во Лигата на шампионите

Сезона	Играч	Награда
2013–14	Тимур Дибиров	Тим на ѕвездите (најдобро лево крило)
2014–15	Алекс Душебаев	Најдобар млад играч
2016–17	Алекс Душебаев	Тим на ѕвездите (најдобар десен бек)
	Раул Гонсалес	Најдобар тренер
	Арпад Штербик	Финална четворка (најценет играч)
2017–18	Арпад Штербик	Тим на ѕвездите (најдобар голман)
2018–19	Дејан Милосављев	Тим на ѕвездите (најдобар голман)
	Иван Чупиќ	Тим на ѕвездите (најдобро десно крило)
	Даинис Криштопанс	Тим на ѕвездите (најдобар десен бек)
	Тимур Дибиров	Тим на ѕвездите (најдобро лево крило)
	Роберто Гарсија Парондо	најдобар тренер
	Игор Карачиќ	Финална четворка (најценет играч)

Надворешни врски

• Официјално мрежно место