Весна Мојсова-Чепишевска

Весна Мојсова-Чепишевска (10 април 1967) — книжевен теоретичар, критичар и редовен професор на Универзитетот „Св. Кирил и Методиј“ во Скопје на Филолошкиот факултет „Блаже Конески“.

Весна Мојсова-Чепишевска
Занимање	професор
Националност	Македонка
Државјанство	македонско
Образование	Филолошки факултет, Универзитет „Св. Кирил и Методиј“ во Скопје
Предмет	Современа македонска книжевност; Книжевност за деца
Книжевно движење	македонска книжевност, книжевна теорија

Животопис

Весна Мојсова-Чепишевска е родена на 10 април 1967 година во Скопје. Tаа е ќерка на Љубица Мојсова (1945), родена Ивановска и на Сократ Мојсов (1942), познатиот фудбалер и е еден од неколкуте легенди на ФК Вардар (за кого дебитира во првиот тим со свои неполни осумнаесет години, а се издвојува со 362 одиграни натпревари и 166 голови), но и за францускиот ФК Рен (во сезоните 1971-73). Од својата десетта па сè до својата осумнаесетта година, таа е член на Детското драмско студио при Македонската радио-телевизија. Уште додека студира на Филолошкиот факултет во Скопје, работи како презентер и водител во истата телевизиска куќа.

Кариера како предавач / универзитетски професор

По дипломирањето, од 1990 година, Весна Мојсова-Чепишевска предава група предмети од областа на современата македонска книжевност, a од 2010 година ги предава и предметите Книжевност за деца 1 и 2, како и предмети од областа на македонската култура на Филолошкиот факултет „Блаже Конески“ при Универзитетот „Св. Кирил и Методиј“ во Скопје. Во 2012 година е избрана за редовен професор на истиот факултет, а во 2017 година и по вторпат за редовен професор во трајно звање. Од ноември 2004. до октомври 2008 година ја обавува функцијата продекан за настава на Филолошкиот факултет „Блаже Конески“ и надворешен член на Советот на Институтот за фолклор „Марко Цепенков”. Во периодот 2013- 2016 година, таа е раководител на Катедрата за македонска книжевност и јужнословенски книжевности на Филолошкиот факултет „Блаже Конески“, а од март 2014 година и член на Извршниот одбор на Универзитетскиот спортски сојуз на Универзитетот „Св. Кирил и Методиј“ во Скопје.

Од 2002 година, две децении работи и како лектор по македонска литература на школите на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје (МСМЈЛК при УКИМ). Од октомври 2019 година до септември 2023 година е директорка на МСМЈЛК при УКИМ.

Член е на Друштвото на писателите на Македонија (ДПМ) и на Македонскиот славистички комитет (МСК), од 2009 година. Од 2018 година е член на Претседателството на ДПМ. Била член и на Советот за македонски јазик при Министерството за култура на Р Македонија (2012-2016).

Творештво

Нејзиниот работен стаж на Универзитетот е во знакот на нејзиното учество на бројни научни и стручни конференции, семинари и симпозиуми, како и на над 400 објавени трудови во домашни и странски книжевни списанија, од кои голем дел со меѓународна редакција. Автор е на научните книги / монографски публикации (8):

• „Рацин и експресионизмот“ (Скопје: Менора, 2000, 232),
• „Литературни преокупации“ (Скопје: Менора, 2000, 294),
• „Лицето на зборовите“ (Скопје: Култура, 2004, 261),
• „Мал книжевен тестамент“ (Скопје: Македонска реч, 2007, 263),
• „Игра и симулации“ (Скопје: Галикул, 2011, 405),
• „Семеен албум“ (Скопје: Матица македонска, 2015, 232),
• „Клуч во клучалката на детството“ (Скопје: Матица македонска, 2019, 322) и
• „Конески како тестамент“ (Скопје: Матица македонска, 2021, 271).

како и на антологиите (3):

• „12. Жени. Гласови“ Архивирано на 17 октомври 2021 г. (Скопје: Македонска реч, 2008, 255),
• „Пишувачот“ (Скопје: Македонска реч, 2012, 268) и
• „VÍTR PŘINÁŠÍ HEZKÈ POČASÍ (Antologie nejmladší makedonské poezie). (Brno: Tribun EU, 2014, 244).

Се јавува и како соавтор на антологиите (4):

• Vesna Mojsova-Čepiševska, Boguslaw Zieliński, Lech Miodyński. ŽEGLARZE PAMIĘCI (Antologija wspólczesnej literatury macedońskiej). Poznań: Uniwesytet Im. Adama Mickiewicza, 2009, 500.
• Angelina Banović-Markovska / Vesna Mojsova-Čepiševska. DON’T YOU FYROM ME (Suvremena makedonska pričа) vo Književna revija. Osijek: Matica Hrvatska, 2009, god.49, br.2-3, 243.
• Весна Мојсова-Чепишевска / Иван Антоновски. „Ветерот носи убаво време“ (Антологија на најмладата македонска поезија и проза). Скопје: Матица македонска, 2012, 337.
• Весна Мојсова-Чепишевска / Иван Антоновски. „Од чежње до ероса“ (Антологија македонске љубавне лирике). Ниш: Нишки културни центар, 2014, 312.
• Весна Мојсова-Чепишевска / Иван Антоновски „Ново раѓање на зборот: антологија на младата македонска поезија“. Скопје: ПНВ Публикации, 2023, 208. [1]

Мојсова-Чепишевска е авторка и на првиот и досега единствен учебник по македонска литература и култура за странци „Везилка“ Архивирано на 23 април 2022 г. (Скопје: Универзитет „Св. Кирил и Методиј“ во Скопје, 2019, 158). Во 2022 година е објавено второ, дополнето и изменето издание на учебникот „Везилка“ (Скопје: Универзитет „Св. Кирил и Методиј“ во Скопје, 2022, 188).

Второто издание на учебникот по македонска литература и култура за странци „Везилка“ е достапно и како аудиокнига.

Соавторка е и на една белетристичка книга:

• Весна Мојсова-Чепишевска / Елена Атанасиу. „101 живот“ (роман во писма). Скопје: Матица македонска, 2018, 370.

Оваа книга, во 2021 година е поставена на платформата „Самоглас“ во аудиоформа.

Награди

За антологијата „Од чежње до ероса“ во февруари 2015 година ја добива наградата „Светосавски печат“ за посебна книга како исклучителен авторски и издавачки потфат на XI Светосавскиот саем на книга во Ниш. Во мај 2015 година ја добива и меѓународна награда „Ана Франк“ за афирмација на литературата за деца и млади на фондацијата „Македонија презент“ и на издавачкатата куќа „Феникс“. Во февруари 2016, за нејзината книга „Семеен албум“ е наградена со наградата „Димитар Митрев“ на ДПМ за најдобра книга критики и есеи.

Во 2022 година, на Весна Мојсова-Чепишевска ѝ е доделена наградата „13 Ноември“ на Град Скопје, за монографската публикација „Конески како тестамент“ и континуираните остварувања во областа на културата.

Приватен живот

Весна Мојсова-Чепишевска е сопруга на Стефан Чепишевски кој во јавниот живот е познат како Стево, македонски машки (придружен) вокал кој има голем број музички снимки и јавни радио и ТВ настапи, како и настапи на голем број на живи свирки и на концерти на познати македонски бендови и пејачи, еден од ретките кој има дури три настапи на Евровизија. Весна Мојсова-Чепишевска е мајка на Сара Чепишевска-Витларова, некогашната голема ТВ ѕвезда од музичката серија на МРТ „Дајте музика’ (1993), а потоа и во емисијата „Сител бамбини“. Денес таа како дипломиран дефектолог-логопед и магистер по филолошки науки од областа на психолингвистиката и македонистиката, работи на Универзитетската клиника за детски болести во Скопје .Весна Мојсова-Чепишевска е мајка и на Горазд Чепишевски, инженер-металург и познат пливач кој како член на ПК Вардар и на македонската репрезентација сè уште држи некои рекорди во помалите категории на 50, 100 и 200 метри грбно во мали и големи базени и е апсолутен рекордер на Р Македонија во истите дисциплини. Мојсова-Чепишевска е и горда баба на Илина и Дарија, ќерките на Сара Чепишевска-Витларова.

Наводи

Македонска книжевност