Џибути

Република Џибути
Република Џибути; جمهورية جيبوتي ; Jumhūriyyat Jībūtī; Jamhuuriyadda Jabuuti; République de Djibouti
Знаме	Coat of arms
	Гесло: "Unité, Égalité, Paix" (превод); „Единство, еднаквост, мир“
	Химна: Djibouti; ;
	Местоположба на Џибути
Главен град	Џибути; 11°36′N 43°10′E / 11.600° СГШ; 43.167° ИГД
Најголем град	главниот град
Службен јазик	арапски и француски
Признаени регионални јазици	афарски, сомалиски
Демоним	Џибутјани (Џибутјанец/Џибутјанка)
Уредување	полупретседателски систем
Независност	од Франција
Површина
Население
БДП (ПКМ)	проценка за 2008 г.
БДП (номинален)	проценка за 2008 г.
ИЧР (2007)	0.516; низок · 149-та
Валута	франк (DJF)
Часовен појас	EAT (UTC+3)
Се вози на	десно
НДД	.dj
Повик. бр.	253

Џибути (арапски: جيبوتي Jībūtī, сомалиски: 'Jabuuti') или официјално Република Џибути — држава во Источна Африка. Државата се граничи со Еритреја на север, Етиопија на запад и југ и со Сомалија на југозапад. На исток државата излегува на Црвеното Море, поточно на Аденскиот Залив и на значајниот проток Баб ел-Мандеб. Вкупната површина на Џибути изнесува 23.200 км² со вкупно население од 864.000 жители. Главен град на државата е истоимениот град Џибути.

Потекло на поимот

Името на Џибути е добиено по најдолната точка на заливот Таџура. Денес се претпоставува дека потекнува од афарскиот збор gabouti и тоа значи еден вид бришалка за пред врата изработена од палмово дрво. Покрај оваа, постои и уште една непотврдена теза која вели дека Џибути значи „земја на Техути“ или „земја на Тот“, по староегипетскиот бог. Колонијалните имиња на Џибути биле Француска територија на Афарите и Исаите (двете најголеми етнички групи) и Француски Сомалиленд (види Сомалија).

Историја

Историјата на Џибути главно е пренесена усно, преку фолклорот, поезијата и песните на номадскиот народ. Историските усни преданија посочуваат илјадници години историја, уште од времето на подемот на стариот Египет, Индија или Кина. Поради блискоста со Арапскиот Полуостров, Афарите и Сомалијците се меѓу првите етнички африкански групи кои го прифатиле исламот, а регионот меѓу првите африкански региони со исламска религија. Француските интереси за овој регион се појавиле во 19 век. Џибути била француска колонија од 1896 до 27 јуни 1977 кога станала независна држава.

Географија и клима

Областа Лак Асал.

Џибути се наоѓа во Источна Африка, поточно на Рогот на Африка. Државата граничи со Сомалија на југозапад, Етиопија на запад и југ и со Еритреја на север. На исток државата излегува на Црвеното Море, односно на протокот Баб ел Мандеб и Аденскиот Залив. Преку протокот се наоѓа Јемен. Вкупната површина на Џибути изнесува 23.200 км² каде живеат околу 864.000 жители. Главен и најголем град е истоимениот град Џибути. Поголем дел од територијата на Џибути е полупустинска.

Политички систем

Џибути е полупретседателска република, каде извршната власт е во рацете на владата, а законодавната е во рацете на владата и собранието. Моментален претседател на Џибути е Исмаил Омар Гуелех. Политичкиот живот е доминиран од една партија, бидејќи опозицијата ги бојкотираше изборите во 2005 и 2008 година и уставот на Џибути, кој е усвоен во 1992 година.

Владата ја контролира сомалиската групата Иса. Скоро државата излегла од еднодецениската граѓанска војна помеѓу Афарите и Иса.

Административна поделба

Карта на регионите во Џибути

Џибути се дели на 5 региони и еден град. Тие потоа се поделени на вкупно 11 окрузи.

Регион	француски	Админ. центaр	Површина (км²)	Население (2009)	Густина (жит/км²)
Али Сабје	Region d’Ali Sabieh	Али Сабје	2.200	86.949	39,52
Арта	Region d’Arta	Арта	1.800	42.380	23,54
Дихил	Region de Dikhil	Дихил	7.200	88.948	12,35
Обок	Region d’Obock	Обок	4.700	37.856	8,05
Таџура	Region de Tadjourah	Таџура	7.100	86.704	12,21
Џибути (град)	Ville de Djibouti	Џибути	200	475 332	2376,66

Стопанство

Економијата на Џибути се заснова воглавно на овозможување на услуги поради стратешката географска положба на државата и статусот на слободна трговска зона во североисточна Африка. Две третини од населението живее во главниот град, додека остатокот е номадско население. Голем дел од храната во Џибути е увезена, додека се одгледува само одредени видови овошје. Во април 2005 година, се проценило дека во Џибути има 30.000 жители кои имаат недостаток на храна. Овој недостаток е како последица на сувата клима во Џибути. Главен економски проблем е невработеноста која изнесува 40% до 50% од работоспособното население.

Население, јазик и религија

Религија^[3]
религија			процент
Ислам			94 %
Христијанство			6 %

Вкупниот број на население на Џибути брои околу 864.000 жители. Две главни етнички групи во Џибути се Сомалијците и Афарите. Покрај овие староседелски народи, во Џибути живеат и мали групи на Французи, Италијанци, Арапи и Етиопјани. Поради тензии помеѓу Афарите и кланот сомалиски Иса во 1990-те години во Џибути имало војна. Сомалијците се воглавно припадници на групата Иса. Иако службени јазици се францускиот и арапскиот јазик, најмногу се зборувани афарски јазик и сомалиски јазик.

Најбројна религија во Џибути е исламот, кој е застапен со 94%. Како втора религија се јавува христијанството.^[4]

Култура

Културата на Џибути е под силно влијание на сушниот и топол регион и културната средина. Облеката зависи од временските услови, така може луѓето да облекуваат стандардна облека или традиционална облека наречена макави. Културното наследство е денес зачувано по пат на оралната традиција. Исто така, покрај локалната традиција, можат да се забележат француски, исламски или отомански културни елементи.

Наводи

↑ ^1,0 ^1,1 „Djibouti“. World Factbook. Central Intelligence Agency. 2007-09-06. Архивирано од изворникот (HTML) на 2014-07-02. Посетено на 2007-09-18.
↑ ^2,0 ^2,1 ^2,2 ^2,3 „Djibouti“. International Monetary Fund. Посетено на 2009-04-22.
↑ the World Factbook^{[мртва врска]}
↑ „CIA World Factbook – Djibouti“. Архивирано од изворникот на 2014-07-02. Посетено на 2010-03-02.

Поврзано

Надворешни врски

Повеќе за Djibouti на збратимените проекти на Википедија
	Дефиниции и преводи на Викиречник ^?
	Податотеки на Ризницата ^?
	Образовни ресурси на Викиуниверзитет ^?
	Новинарски известувања на Викивести ^?
	Мисли на Викицитат ^?
	Изворни текстови на Викиизвор ^?
	Прирачници на Викикниги ^?
^?	Информации за патување во Википатување ^? ^?