Циркумбореален регион

Циркумбореален регион или евросибирско-канадски регион на бореалното царство — голем флористички регион. На југ навлегува во Европа (со исклучок на оној дел кој се однесува на Средоземната област), северна Анадолија, Кавказ (со исклучок на аридните области и Талиш), Урал, Сибир, Далечниот Исток (со исклучок на југоисточните делови по средното течение на р. Амур), Камчатка, северен Сахалин, северните Курилски Острови, Алеутските Острови, Алјаска, поголем дел од Канада и мал дел од САД. Многу голем дел од овој регион е заземен од широколисни и иглолисни шуми, но и тундри и степи.

Најчести видови

Од иглолисните растенија најчести се: борот (Pinus), смрчата (Picea), елата (Abies), аришот (Larix), а во Канада и цугата (Tsuga) и тујата (Thuja). Од листопадните родови, најсреќавани се дабот (Quercus), буката (Fagus), брезата (Betula), евлата (Alnus), јаворот (Acer), габерот (Carpinus), тополата (Populus), врбата (Salix), јасенот (Fraxinus), брестот (Ulmus), липата (Tilia), оревот (Juglans), каркасот (Celtis), црниот габер (Ostrya), дренот (Cornus).
Од другите дрвенести растенија карактеристични се сливите и вишните (Prunus), малините (Rubus), глогот (Crataegus), крушата (Pyrus), јаболкото (Malus), оскорушата (Sorbus), спирејата (Spiraea), стафилејата (Staphylea), рододендронот (Rhododendron), анамската рака (Lonicera), удиката (Viburnum), бозелот (Sambucus), крушината (Rhamnus), боровинката (Vaccinium).
Покрај шумите, карактеристични се и ливадите, кои во јужните делови на европска Русија и Сибир преоѓаат во степи. За северните реони се својствени пространи блата и тундри. Во планините, шумската растителност образува појас кој најчесто се состои од иглолисни шуми. Над шумскиот појас се наоѓа високопланинската (субалпска и алпска) растителност, која се одликува со богати и ендемски форми.

Ендемизам

Во флората на циркумбореалниот регион нема ендемски фамилии, но има многу ендемски или речиси ендемски родови, во кои се вбројуваат крстоцветните Lunaria (средна и југоисточна Европа), Borodinia (источен Сибир), Gorodkovia (североисточен Сибир), Redowskia (Јакутија); потоа родот Soldanella од фамилијата на јаглики (јужна и средна Европа), па штитоцветните Physospermum, Astrantia и Thorella (последниот род само во Европа), родот Pulmonaria од фамилијата Boraginaceae, родот Erinus од Scrophulariaceae, три рода од претежно тропската фамилија Gesneriaceae – Ramonda (централни и источни Пиринеи и планините на североисточна Шпанија, Балкански Полуостров) и Haberlea и Jankaea (и двата на Балканот), потоа родот Stratiotes од фамилијата Hydrocharitaceae, Telekia од Asteraceae, како и многу ендемски видови во планинските региони – Пиринеи, Алпи, Карпати, Кавказ, планините на Сибир и Канада.

Големиот циркумбореален регион е разделен на неколку провинции кои ги обединува составот на флората и ендемизмот.