Рид

Рид или брдо — земјиштен облик што се издава над околниот терен и има свој врв, иако тој може да биде благ и неизразен.

Панорамски поглед на големиот рид Гроот кај Велес

Поглед на Зајчев Рид кај Скопје

Чоколадните Ридови во покраината Бохол на Филипините

Образба и терминологија

Разликата помеѓу рид и планина не е секогаш јасна и честопати е субјективна. Начелно се смета дека ридот е понизок и поблаг, а планината е пострмна.

Ридови во Јудејската Пустина

Ридовите се образуваат со геоморфни појави како раседи, ерозија на поголеми земјишни облици и со седимент донесен од ледници. Во случај да е седиментен, ридот настанува поради појавата на морени и друмлини или пак со ерозија на карпите, кои со абење стануваат ридови. Заобленоста кај ридовите се јавува поради дифузивното надолно движење на почвата и реголитниот материјал.

Постојат повеќе називи за разни водови на природни и вештачки ридови, зависно од нивниот изглед и начин на образба. Такви се хумката, тумбата, чуката, тумулот, друмлинот и др. Најголем вештачки рид на светот е Блекстрепскиот Скијачки Рид (Blackstrap Ski Hill, 45 м) во околината на Саскатун во покраината Саскачеван, Канада, направен за скијање.

Историско значење

Ридовите играат значајна улога во историјата на човештвото. Многу населби и градови во праисторијата стариот век се изградени токму на ридови заради безбедност од природни непогоди и непријателски напади. Познато наоѓалиште во Македонија е Вардарски Рид, но во земјата постојат голем број други археолошки подрачја на ридови. Историјата на Рим започнува со неговиот развој на седум рида. Од слични причини, ридовите имале клучно значење во војувањето, како во минатото, така и денес. Доказ за ова се бројните тврдини изградени на ридовите.

Ридот како тема во уметноста и во популарната култура

• „Светиот рид“ - поетска збирка на францускиот писател Андре Бретон од 1919 година.
• „Под Бен Балбен“ (Under Ben Bulben) - песна на ирскиот поет Вилијам Батлер Јејтс од 1938 година.
• „Дрво на ридот“ - песна од истоимената книга на македонскиот поет Ацо Шопов од 1980 година.
• „Ридови“ (Bregovi) - циклус песни во проза на српскиот писател Иво Андриќ од 1920 година.
• „Волшебниот рид“ - роман на германскиот писател Томас Ман од 1924 година.
• „Куќа на ритчето“ (La casa in collina) - книга на италијанскиот писател Чезаре Павезе од 1959 година.
• „Белите ридови на татковината“ - песна на македонскиот поет Анте Поповски.
• „Шупливи ридови“ (Hollow Hills) - песна на британската рок-група „Баухаус“ од 1981 година.
• „Рид со едно дрво“ (One Tree Hill) - песна на ирската рок-група „У2“ (U2) од 1987 година.
• „Ридот Менсфорт“ (Mensforth Hill) - песна на англиската рок-група „Клеш“ (The Clash) од 1980 година.
• „Англичанецот кој се качил на рид, а слегол од планина“ (англиски: The Englishman Who Went Up a Hill but Came Down a Mountain) - британски филм од 1995 година, во режија на Кристофер Монгер.

Поврзано

• Тумба
• Тумул
• Хумка
• Чука
• Дина
• Тел
• Друмлин
• Ридски велосипедизам
• Брдски топ
• Ридови во Македонија

Надворешни врски

• Вајарството на Земјата: Настанокот на земјишните облици (англиски)