Радовишко архијерејско намесништво

Радовишко архијерејско намесништво — архијерејско намесништво во Македонската православна црква - Охридска Архиепископија едно од четирите намесништва во Брегалничката епархија. Ова архијерејско намесништво го опфаќа градот Радовиш со околните села. На чело на Радовишкото архијерејско намесништво се наоѓа Иван Стојменов (сост. 2016).

Црквата „Св. Троица“ во Радовиш - симбол на радовишкото христијанство

Историја

Во црковната историја, Радовишкото архијерејско намесништво најчесто се наоѓало под јурисдикција на Струмичката епархија. До Балканските војни (1912-1913) и делбите на Македонија (1913), Радовишкото архијерејско намесништво се наоѓало во составот на Струмичката епархија. Така во крајот на XIX век и почетокот на XX век Струмичката епархија ја управувал патријаршискиот митрополит Јеротеј, а од 1897 година и егзархискиот владика Герасим, што значи во Епархијата владеело туѓо црковно двовластие. По Првата светска војна, кога Злетовско-струмичката епархија се нашла во составот на Српската православна црква егзистирало Радовишкото архијерејско намесништво. Таквата состојба се задржала до 1941 година. По возобновувањето на Светиклиментовата охридска архиепископија во лицето на Македонската православна црква, за време на митрополитот Злетовско-струмички г. Наум, Радовиш и неговите околни села се наоѓаат под власта на Штипското архијерејско намесништво. Во тоа време егзистираат две радовишки градски парохии и неколку селски (Иневско-воиславска, Конечка и Подарешка парохија). Во 1989 година од Злетовско-струмичката парохија се основаат одделно две епархии: Брегалничка на чело со митрополитот г. Стефан и Струмичката на чело со митрополитот г. Горазд. Со новата црковнотериторијална промена Радовиш со околните села влегуваат во составот на Струмичката епархија. Со одлука на САС на МПЦ таа година било основано Радовишкото архијерејско намесништво при црквата „Св. Пророк Илија“ во Радовиш. За прв архијерејски намесник бил избран куклишанецот протоерејставрофор Коста Донев. Во 1991 година доаѓа до нова трансформација, па Радовишкото архијерејско намесништво сега се нашло во составот на Брегалничката епархија. Тогаш постоеле три градски (радовишки) и три селски парохии. Од моментот кога на чело на Брегалничката епархија застанал митрополитот Агатангел, Радовишкото архијерејско намесништво било поделено на 4 градски (радовишки) и 3 селски парохии. Во 2001 година поради тоа што архијерејскиот намесник Коста Донев отишол во пензија, нов намесник станал прота Гоце Младеновски.

Парохии

Откако во 2006 година архимандритот Иларион бил хиротонисан за Брегалнички митрополит, на чело на Радовишкото архијерејско намесништво дошол свештеникот Иван Стојменов. Оттогаш до денес во Радовишкото архијерејско намесништво постојат следниве парохии:

• Прва радовишка парохија - се наоѓа на десната страна по течението на Радовишка Река и еден мал дел од левата страна до почетокот на населбата Куклевица. Во оваа парохија се наоѓа храмот „Св. Троица“, изграден со донаторство на радовишкиот стопанственик Ристо Гуштеров. Старешина на оваа парохија е Стојан Јановски (сост. 2016);
• Втора радовишка парохија - се простира на левата страна по течението на Радовишка река. Во оваа парохија влегува храмот „Св. Пророк Илија“, седиште на Радовишкото архијерејско намесништво. Старешина на оваа парохија е Гоце Младеновски (сост. 2016);
• Трета радовишка парохија - ја сочинува источниот дел на градот, кој се наоѓа десно од булеварот „Александар Македонски“, вклучително до населбата Раклиш, која и самата влегува во составот на парохијата. Во составот на парохијата влегува црквата „Св. Константин и Елена“ во село Раклиш.Старешина на црквата и на парохијата е архијерејскиот намесник Иван Стојменов (сост. 2016);
• Четврта радовишка парохија - ја сочинува населбата Куклевица. Свештеник на оваа парохија е Марјан Јанковиќ (сост. 2016). Седиштето на парохијата е во црквата во Раклиш;
• Подарешка парохија - ја сочинуваат селата: Подареш, Смиланци, Јаргулица, Покрајчево и Злеово. Старешина на парохијата е свештеникот Зоран Стојанов (сост. 2016) со седиште во село Подареш.
• Ораовичко-воиславска парохија - ја сочинуваат селата: Ораовица, Воиславци, Сулдурци, Калуѓерица, Погулево, Дамјан и Тополница. Парохиски свештеникот е Стојанче Илиев (сост. 2016) со седиште во Радовиш.
• Ињевско-конечка парохија - ја сочинуваат ридските села Ињево и Дедино и Лакавичките села: Конче, Долни Липовиќ, Горни Липовиќ, Ракитец, Загорци, Лубница, Габревци, Скоруша и Гавран. Парохиски свештеник е Златко Пуреовски (сост. 2016) со седиште во Радовиш;