Министерство за внатрешни работи на Македонија
Министерството за внатрешни работи на Република Македонија (скратено МВР на РМ, МВР) – државна институција во Република Македонија, едно од министерствата во Владата на Република Македонија задолжено за спроведување на законот во државата.[3] Според извештајот од 2015 година, министерството располага со 11.441 вработени.
| Министерство за внатрешни работи | |
|---|---|
| |
| Обележје на министерството | |
| Податоци за органот | |
| Основан | 6 август 1944 |
| Надлежност | Влада на Република Македонија |
| Седиште | Улица „Димче Мирчев“ бр. 9, Скопје,  Македонија
|
| Вработени | 11,656[1] (2017) |
| Годишен буџет | 10,241 милијарди MKD[2] (2018) |
| Надлежен министер | Панче Тошковски |
| Мрежно место | |
| mvr.gov.mk | |
Мисија и задачи
уредиМинистерството во рамките на својата надлежност им укажува стручна помош на граѓаните, правните лица и на државните органи во остварувањето на пропишаните права и обврски, заштитата на животот и личната сигурност на граѓаните и имотот. Министерството за внатрешни работи е одговорно за преземање на сите потребни мерки за откривање на сторителот на кривично дело или соизвршителот, со цел да ги спречи да се скријат или да избегаат, да открие и да обезбеди траги и предмети што можат да служат како доказ за кривичното дело, како и сите информации што би можеле да бидат корисни за успешното спроведување на кривичната постапка.
Организациска поставеност
уредиОрганизациската структура на министерството ја сочинуваат организациски единици за потребите на министерството и органи во состав на министерството. Организациските единици за потребите на министерството се организациски единици надлежни за вршење на стручни работи во врска со вршењето на внатрешните работи, за потребите на целото министерство. Органи во состав на министерството се: Бирото за јавна безбедност и Управата за безбедност и контраразузнавање. Бирото за јавна безбедност ги врши полициските работи во министерството и чија организација и надлежност е уредена со Законот за полиција. Управата за безбедност и контраразузнавање (УБК) ги извршува активностите за заштита од шпионажа, тероризам или други активности насочени кон загрозување или уривање на демократските институции утврдени со Уставот на Република Македонија со насилни средства, како и заштита од потешки форми на организиран криминал.
Според органограмот на МВР, најголем орган е Бирото за јавна безбедност.[4] Министерството е поделено на осум подрачни единици, односно сектори за внатрешни работи,[5] кои претставуваат организациски единици во рамките на Бирото за јавна безбедност. Тие се распоредени во најголемите градови во државата, како Скопје, Битола, Куманово и други. Секој сектор има свои полициски станици и канцеларии, а за покачување на безбедноста во руралните средини, во 2014 година биле воспоставени и мобилни полициски станици.[6]
Историја
уредиДФ Македонија
уредиНа 2 август 1944 година, во манастирот „Св. Отец Прохор Пчински“, неофицијално се формирало министерството со нужен број оддели на чело со назначен началник, и одлуката траела до формирањето на Народното правителство на македонската држава при Президиумот на АСНОМ.[7] Официјално, на 6 август 1944 година, во селото Рамно, за време на Првото заседание на АСНОМ биле создадени 8 поверенства, меѓу кои и Поверенството за внатрешни работи, под раководство на Киро Петрушев, повереник за внатрешни работи,[8] кој на 16 април 1945 станал министер за внатрешни работи.
СР Македонија
уредиВо времето на СФР Југославија како дел од федералниот план за јавна безбедност, во Македонија и во останатите републики дејствувала милиција. На 13 март 1981 година, поради потребата од обезбедување на јавни личности, справување со кризи и други специјални задачи за кои не била подготвена тогашната милиција, во рамките на тогашниот републички секретаријат на СР Македонија се формирала Единицата за специјални задачи „Тигар“, првата специјална единица во Македонија.
Република Македонија
уредиВо 1991 година, со осамостојувањето на Македонија бил прифатен западниот модел и милицијата била преименувана во полиција. Со започнувањето на воениот конфликт во 2001 година, министерството активно се вклучило во одбраната на територијалниот интегритет, во соработка со АРМ. Откако поминале неколку месеци од почетокот на конфликтите, во рамките на МВР се формирала специјалната единица од доброволци, Единицата за брза интервенција „Лавови“. Две години по завршувањето на војната оваа единица била расформирана при што во рамките на министерството се формирала „Специјалната единица за брзо распоредување“, во која преминале поголем дел од доброволците, а која потоа била преименувана во Единица за брзо распоредување (ЕБР).
Една од поважните операции во поновата историја на министерството била „Планинска бура“ од 2007 година, кога била совладана вооружена група од 90-тина терористи без никакви загуби за министерството. Следната голема акција на полицијата се случила во мај 2015 година, кога во полициска акција во Куманово, по 28-часовна вооружена улична борба, загинале 8 специјалци вработени во министерството.[9]
Список на министри
уредиСледува список на сите министри за внатрешни работи по осамостојувањето на Македонија:
| # | Име (роден–починал) |
Мандат | |
|---|---|---|---|
| 1 | Јордан Мијалков (1932–1991) |
20 март 1991 | 19 декември 1991 |
| 2 | Љубомир Фрчковски (1957-) |
10 јануари 1992 | 23 февруари 1996 |
| 3 | Томислав Чокревски (1934-) |
23 февруари 1996 | 30 ноември 1998 |
| 5 | Павле Трајанов (1952-) |
30 ноември 1998 | 27 декември 1999 |
| 6 | Доста Димовска (1954-2011) |
27 декември 1999 | 13 мај 2001 |
| 7 | Љубе Бошкоски (1960- |
13 мај 2001 | 1 ноември 2002 |
| 8 | Хари Костов (1959-) |
1 ноември 2002 | 2 јуни 2004 |
| 9 | Силјан Аврамовски (1960-) |
2 јуни 2004 | 17 декември 2004 |
| 10 | Љубомир Михајловски (1954-) |
17 декември 2004 | 26 август 2006 |
| 11 | Гордана Јанкулоска (1975-) |
26 август 2006 | 12 мај 2015 |
| 12 | Митко Чавков (1963-) |
13 мај 2015 | 11 ноември 2015 |
| 13 | Оливер Спасовски (1976-) |
11 ноември 2015 | 19 мај 2016 |
| 14 | Митко Чавков (1963-) |
20 мај 2016 | 31 август 2016 |
| 15 | Оливер Андонов (1971-) |
1 септември 2016 | 2 септември 2016 |
| 16 | Оливер Спасовски (1976-) |
2 септември 2016 | 29 декември 2016 |
| 17 | Агим Нухиу (1977-) |
29 декември 2016 | 1 јуни 2017 |
| 18 | Оливер Спасовски (1976-) |
1 јуни 2017 | 3 јануари 2020 |
| 19 | Наќе Чулев
(1972-) |
3 јануари 2020 | 31 август 2020 |
| 20 | Оливер Спасовски (1976-) |
31 август 2020 | 29 јануари 2024 |
| 21 | Панче Тошковски
(1982-) |
29 јануари 2024 | Во служба |
Наводи
уреди- ↑ „Извештај за следењето на примената на начелото на соодветна и правична застапеност за 2017 година“ (PDF). Народен правобранител на Република Македонија. јуни 2018. Архивирано од изворникот (PDF) на 2019-04-18. Посетено на 2019-06-09.
- ↑ „Буџет на Република Македонија за 2018 година“. Министерство за финансии на Република Македонија. Архивирано од изворникот на 2019-10-19. Посетено на 2018-11-22.
- ↑ Закон за полиција, I. Општи одредби, Член 3.
- ↑ Органограм на Министерството за внатрешни работи.
- ↑ Сектори за внатрешни работи и ПС.
- ↑ МРТ, „Поблиску до службите на МВР преку мобилната полициска станица“, 26.06.2014
- ↑ Акти на Првото заседание на АСНОМ, Решение на Антифашисткото собрание на народното ослободуење на Македонија како врховно законодателно и исполнително народно претставително тело и највисок орган на државната власт на Демократска Македонија (АСНОМ), стр. 2, Член 10.
- ↑ Акти на Првото заседание на АСНОМ, Решение за организација поверенства при Президиумот на АСНОМ и именување на нивните раководители, стр. 5, Член 1, точка 2 и Член 2.
- ↑ „Осум загинати полицајци во Куманово“. Кајгана. 10 мај 2015. Архивирано од изворникот на 2016-04-08. Посетено на 2 јануари 2018.
Надворешни врски
уреди- Официјално мрежно место (македонски)