Никола Пандески

Никола Пандески (роден на 27 ноември 1948 година во Охрид - починал на 18 август 2006 година во Охрид) — македонски математичар и редовен професор на Природно-математичкиот факултет во Скопје.

Никола Пандески
Роден	27 ноември 1948 Охрид, СФРЈ
Починал	18 август 2006 Скопје, Македонија
Националност	Македонец
Занимање	математичар професор

Животопис

Образование

Никола Пандески е роден во 1948 година во Охрид, а починал во Охрид во 2006 година. Основно и средно образование завршил во Охрид. Во 1971 година дипломирал на Групата за математика при Природно-математичкиот факултет во Скопје. Во 1972 година бил избран за асистент на Институтот за математика при ПМФ во Скопје, а во 1971 година се запишал на постдипломски студии на Институтот. Магистерскиот труд „Лиеви групи и петтиот проблем на Хилберт" го одбранил во јануари 1977 година. Во 1984 година ја одбранил докторската дисертација „Максимални идеали на алгебрата Н∞ од ограничени аналитички функции во единичната топка од Sp.“

Работен век

Во 1984 година бил избран во звањето доцент по математичка ана­лиза, во 1993 година за избран за вонреден професор, а во 1998 година за редовен професор по математичка анализа на Институтот за математика при Природно-математичкиот факултет во Скопје. Изведувал настава по комплексни функции, бројчена анализа за групата математика математика I и II за физичари, математика I за групата математика-физика, диференцијално и интегрално сметање за информатика. Изведувал настава и по математика I на Шумарскиот факултет, а учествувал и во спроведувањето на наставата по математика на Педагошкиот факултет во Штип. На постдипломските студии по математичко образование одржувал настава по споредбено образование и современи образовани системи, а на постдипломците по теориска математика им одржувал стручни семинари од областа дистрибуции, конформни пресликувања, Hp простори. Бил ментор на осум магистерски трудови и на две докторски дисертации, а бил член на комисија на уште неколку магистерски трудови и седум докторски дисертации. Бил ментор и на повеќе од 100 дипломски работи.

Научен интерес на Пандески биле проблемите од аналитички функции, теоријата на дистрибуции-обопштени функции, интерполациони проблеми. Учествувал со свои соопштенија на меѓународни конференции во Аранѓеловац, Белград, Будва, Херцег Нови, Петровац, Ниш, Нови Сад, Пловдив, Софија и Варна (Бугарија) и во Охрид. Во 1973 година бил на студиски престој во Загреб (Хрватска), а во 1977-78 година бил на студиски престој на Универзитетот Беркли - Калифорнија, САД. Во периодот 2002-2005 година бил продекан за меѓународна соработка на ПМФ, кога биле остварени голем број контакти со реномирани научни институции од странство. Бил и претседател на организациониот комитет на Третиот конгрес на математичарите на Македонија, како и уредник и рецензент во повќе списанија. Раководител беше на два научни проекти „Апроксимации во реална и комплексна област и НP простори“ и учесник во проект раководен од проф. д-р Драган Димитровски. Има објавено учебник по математичка анализа за физичари, како и 32 научни труда во домашни и во странски списанија.