АТП Умаг познат уште како Отвореното тениско првенство на Хрватска (моментално спонзориран од Сина лагуна) е тениски турнир во машка конкуренција кој се одржува во Умаг, Хрватска. Турнирот се игра на земјена подлога а на распоред е во текот на летото, најчесто кон крајот на јули и е дел од АТП серијата 250 на АТП турнејата.
Турнирот започнал да се одржува во 1990 година под името Отворено тениско првенство на Југославија и оттогаш се одржува секоја година. Карлос Моја бил победник на турнирот рекордни пет пати; тој, исто така, го освоил турнирот трипати последователно, а последен пат триумфирал во 2007 година. Во 2016 година, централниот терен бил наречен по хрватскиот тенисер Горан Иванишевиќ.