Јован Бошковски

Јован Бошковски (Скопје, 25 декември 1920 - Ерџелија, 10 ноември 1968) — македонски писател, книжевен и филмски критичар, преведувач и сценарист.

Јован Бошковски
Роден/а	25 декември 1920 Скопје, Македонија
Починат/а	10 ноември 1968 Ерџелија, Македонија
Занимање	Писател

Животопис

Бошковски е роден во Скопје, во печалбарско семејство. Уште како дете бил принуден да работи, школувајќи се во вечерните училишта. Бил член на Сојузот на комунистите на Македонија од 1945 година. Работел како уредник во „Нова Македонија“, во списанијата „Нов ден“, „Современост“ и „Разгледи“ и во издавачката куќа „Македонска книга“, а кратко време работел и во Радио Скопје и во Македонскиот народен театар.

Творештво

Неговата збирка „Растрел“ (1947) е прва македонска книга раскази. Други негови познати дела се: „Бегалци“ (раскази, 1949), „Блокада“, „Луѓе и птици“ (раскази, 1955) и „Солунските атентатори“ (роман, 1962). Темите за своите раскази најчесто ги црпи од поновото македонско минато и од современиот живот, залагајќи се за психолошки третман на ликовите. Некои од неговите дела се преведени на повеќе јазици, како: словенечки, српскохрватски, албански, унгарски, полски, украински, руски и горнолужички.

Пишувал и сценарија за играни и за документарни филмови. Неговото прво филмско сценарио е за документарниот филм „Жито за народот“ (1947). Автор е на сценаријата за филмовите „Солунските атентатори“ и „Под исто небо“, а се појавува и како соработник на сценаријата за филмовите „Мементо“ и „Републиката во пламен“.