Чифлик (Опила)

Чифлик или Бабунци — археолошко наоѓалиште во кривопаланечкото село Опила. Претставува средновековна црква и некропола.

Опис

Во маалото Бабунци, на десниот брег на Крива Река и во непосредната близина на наоѓалиштето градиште, при орањето на нивите и изградбата на куќите и други помошни објекти се откриени гробови од градени плочи, со богати наоди. Во 1984/85 и 1987 година Музејот на Македонија извршил заштитни археолошки ископувања со кој се откриени и истражени 57 гроба. Повеќето од гробовите се од типот циста, неколку со слободно вкопување и неколку од тегули - тип „на две води“. Гробните прилози ги сочинуваат: белезици, токи, обетки, прстени, алки и др. изработени од бронза, железо и сребро, како и неколку керамички садови. Во 1995 година, поради загрозеност поради поставувањето на трасата на железничката пруга Куманово — Деве Баир, Републичкиот завод за заштита на спомениците на културата извришил заштитни ископувања. Откриени биле нови 466 гроба, со приближно исти гробни конструкции, но со различна временска припадност. Кај средновековните гробови од X до XI век е карактеристично тоа што имаат обележување со врежан крст. Што се однесува до гробните прилози во гробовите од железното време (VIII до VII век п.н.е), најдени се керамички садови, белезици и висулници во облик на латинската буква v; во гробовите во втората половина на VI век: обетки, прстени, фибули, токи, појасни гарнитури, крстови, оружје и монети; во средновековните гробови: обетки, прстени украсувани со филигран, ѓердани, белезици и друг накит. Од сите овие ископувања, и од самата обзервација на просторот, сосема е сигурно дека се работи за голема некропола (повеќе од 1000 гробови), со широк временски распон на погребување. Наодите се чуваат во Музејот на Македонија во Скопје.

Поврзано

• Градеж — населба од доцноантичкото време;
• Градиште — градиште од доцноантичкото време;
• Мал Трг — градиште од доцноантичкото време;
• Пашина Падина — населба од доцноантичкото време;
• Селиште — населба од доцноантичкото време;
• Чифлаџиште — населба од доцноантичкото време;
• Опила;
• Список на археолошки наоѓалишта во Кривопаланечко;
• Список на средновековни некрополи во Македонија.