Крива Река

Крива Река
Местоположба
Физички особености
Устие	Пчиња
Должина	75 км
Особености на сливот

Крива Река — најдолга (75 км), а по површина на сливот (1002 км²) најголема притока на реката Пчиња. Извира на Осоговските Планини, северно од Царев Врв (2085 м), на надморска височина од 1932 м, а во Пчиња се влева кај Клечевце, на надморска височина од 294 м. Од изворишниот дел до вливот на Киселичка Река (на 18 км од изворот), Крива Река првин тече кон север и северозапад, а потоа нагло го менува правецот и продолжува да тече кон југозапад.

Речна долина уреди

Долината на Крива Река е композитна, при што се сменуваат неколку клисурски делови (Жидиловско-Паланечка, Псачка, Маркова, Вакуфска Клисура) со ерозивни проширувања (Уземско, Трновечко, Средоречко) и котлини (Славишка, Кумановска). До село Опила, долината на Крива Река претежно е всечена во кристалести карпи (гнајсеви, микашисти, хлоритски, мусковитски шкрилци), а низводно до село Бељаковце главно е всечена низ терцијарни вулканити: андезити, игнимбрити, туфови, бречи и др. Од село Бељаковце до самиот влив во Пчиња, долината на Крива Река е всечена во еоцени (марински) седименти: песочници и плочести варовници.

Речен слив уреди

Сливот на Крива Река има неправилна правоаголна форма и зафаќа површина од 1002 км². Се протега во доминантен правец исток-североисток запад-југозапад, при што минималната должина на сливот (од врвот Руен, 2252 м) до вливот на Крива Река во Пчиња (294 м), изнесува 55 км, а максималната должина (по водотекот), изнесува 79 км. Сливот на Крива Река се одликува со мала пошуменост, особено во западните (палеовулкански) делови, како и на јужните падини на Герман и Билино. Обесшуменоста на сливот условува значително површинско истекување за време на врнежи, поради што најголем дел од водотеците имаат пороен карактер и доста променлив протек во годината. За да се подобри состојбата и да се намали ерозивноста, во втората половина на XX век се вршени пошумувања, но на релативно мала површина и без соодветна динамика. Затоа, добиените резултати битно не се одразуваат врз современата состојба.

Хидрографска мрежа уреди

Крива Река има развиена хидрографска мрежа, која ја чинат над 600 постојани, периодични и повремени водотеци со вкупна должина од околу 1400 км. Од тој број, 14 водотеци се подолги од 10 км, а од нив 11 се директни притоки на Крива Река и тоа: Киселичка Река, Габерска Река, Рашка Река, Ранковечка, Ветуничка Река, Дрзава (или Руѓинска Држава) и Живуша, кои се десни притоки и Дурачка Река, Кратовска Река, Повишница и Врлеј кои се леви притоки.

Галерија уреди

Лак на Крива Река во Кратовско
Поглед на Крива Река во Кратовско
Мовче на Крива Река во Кратовско
Мовче на Крива Река во Кратовско
Крива Река во Кратовско
Крива Река меѓу селата Узем и Костур
Крива Река меѓу селата Узем и Костур
Крива Река во Крива Паланка

Извори уреди

„Квалитет на површинските води во сливот на Крива Река“ Димитровска О., Милевски И. — Билтен за Физичка географија, Скопје, 2005