Средно народно училиште

Средните народни училишта се институции за образование на возрасни кои генерално не доделуваат академски дипломи, иако може да постојат одредени курсеви кои водат до таа цел. Најчесто ги има во нордиските земји како и во Германија, Швајцарија и Австрија. Концептот првично потекнува од данскиот писател, поет, филозоф и свештеник Нфс Грундвиг (1783–1872). Грундвиг бил инспириран од Извештајот на Маркиз де Кондорсе за општата организација на јавната настава кој бил напишан во 1792 година за време на Француската револуција. Револуцијата имала директно влијание врз народното образование во Франција. Во Соединетите Американски Држави, во Тајлер, Минесота е основано данско народно училиште наречено Данебод.

Христијанско народно средно училиште во Јамса, Финска

И покрај сличните имиња и донекаде сличните цели, институциите во Германија и Шведска се сосема различни од оние во Данска и Норвешка. Народните средни училишта во Германија и Шведска се всушност многу поблиску до институциите познати како folkeuniversitet во Норвешка и Данска, кои обезбедуваат образование за возрасни. Меѓутоа, за разлика од folkeuniversitet, народните средни училишта во Шведска не се поврзани со редовен универзитет. Финските центри за образование на возрасни наречени työväenopisto и kansalaisopisto (шведски: arbetarinstitut, буквално работнички институт) се исто така дел од традицијата за образование на возрасните.

Други земји, исто така, се инспирирани од концептот за популарноѕо образование на Грундвиг. Во Нигерија, САД и Индија, неколку училишта се изградени врз Грундвиговите принципи за образование.

Историја

Грундвиг, кој се смета за основач на средното народно училиште, добил инспирација за концептот од англиските интернати, но фокусот на Грундвиг не бил на формалното образование, туку на популарното. Идејата била да се даде на селанството и на другите луѓе од пониските редови од општеството повисоко образовно ниво преку личен развој; што Грундвиг го нарекол „жив збор“. Јазикот и историјата на татковината, нејзиното устројство и главните индустрии (земјоделството) заедно со народните песни треба да бидат водечки принципи за образование засновано врз христијанска рамка.

Првата народна гимназија е основана во 1844 година во Родинг, Данска . Училиштето во Родинг, сепак, истото било донекаде аристократско бидејќи воглавно биле запишани државни службеници и богати земјоделци.

Друг пионер на средното народно училиште бил професорот Кристен Колд . Неговиот, тогаш, крајно неортодоксен начин на настава им дал на средните народни училишта поширока демократска основа во споредба со првичниот религиозен фокус. Наставата се одвивала од ноември до март бидејќи учениците се занимавале со фарма до крајот на годината. Целта на Колд била учениците во зима редовно да се враќаат во училиштето за да го продолжат своето образование. На почетокот само млади мажи можеле да ги посетуваат курсевите, но во 1861 година младите жени добиле пристап до средните народни училишта кога наставата почнала да се нуди од мај до јули. Мажите сепак присуствувале само во текот на зимата.

Пробивот за идејата била Втората војна во Шлезвиг во 1864 година кога Данска морала да предаде голем дел од својата територија. Овој инцидент овозможил раст на нова данска свест и национализам заснован на просветлување на народот. Губењето на територијата на Данска за Прусија силно ја погодила данската национална свест, но имало група млади луѓе решени да имаат корист од катастрофалната војна, која станала катализатор за нов дански идентитет. Тие основале народни средни училишта низ целата земја и до 1867 година била отворена дваесет и една народна гимназија. Речиси сите што работеле во средните народни училишта биле чираци на Грундвиг. Во 1918 година, бројот на средни народни училишта во Данска достигнал 68.

Современите средни народни училишта значително се разликуваат. Некои сè уште имаат религиозен фокус, но повеќето од нив се секуларни. Училиштата сè уште се „грундвигиски“ средни народни училишта, што значи дека нивниот фокус е на просветителството, етиката, моралот и демократијата, иако тие не се изучуваат експлицитно. Грундвигиската филозофија е вградена во наставата во различни предмети, на пр. уметноста, гимнастиката како и новинарството. Повеќето од училиштата имаат област на експертиза, на пример спорт, музика, уметност или пишување . Бидејќи не се доделува диплома, наставата е послободна и понеформална отколку во обичните образовни институции. Повеќето скандинавски народни средни училишта се интернати каде што учениците живеат 2-6 месеци, а некои од нив нудат програми за цела година.

Филозофија

Грундвиг се борел за училиште со популарното образование како примарен фокус. Народното средношколско движење било чин против конзервативниот идеал и на образованието и на културата. Чин против идеалот за писменост и учењето на книги, употребата на јазик непознат за обичните луѓе и идеал за учење каде примарниот однос бил помеѓу поединецот и само книгата.

Движењето затоа започнало како спор со старото училиште. Грундвиг се борел за јавно образование како алтернатива на универзитетската елита. Народните средни училишта тебало да бидат за оние кои сакаат да учат воопшто и да им помогнат на луѓето да бидат дел од човечките односи како и општеството.

Народните средни училишта се промениле природно – некои, но и радикално – со текот на времето, но многу од основните идеи на Грундвиг за средното народно училиште сè уште можат да се приметат во начинот на кој тие се водат денес. Денешното средно народно училиште е ангажирано во сложена модерна реалност и под влијание на националните, меѓународни и глобални прашања.

Еден од главните концепти што денес сè уште се среќава во средните народни училишта е „доживотното учење “. Училиштата треба да се едуцираат доживотно. Тие треба да фрлат светлина врз основните прашања околу животот на луѓето и како поединци и како членови во општеството.

За Грундвиг идеалот бил да им се даде на студентите чувство на заедничко најдобро и фокусирање на животот каков што тој навистина е. Затоа, Grundtvig никогаш не поставувл насоки за идните училишта или детален опис за тоа како тие треба да се водат. Тој изјавил дека народните гимназии треба да се уредуваат и развиваат според животот каков што е и училиштата да не се полагаат бидејќи образованието и просветувањето биле доволна награда.

Суштински елемент бил и е животот во училиштата. Народната гимназија станувала тоа што е благодарение на поединците од кои е направена. Учењето се одвивало низ општествените позиции и разлики - наставникот учи од ученикот и обратно во жива размена и меѓусебно учење. За Грундвиг, дијалогот меѓу разликите бил суштински - идеалот бил луѓето да научат да се носат со разликите меѓу себе пред да може да се реализира просветлувањето.

Одлики

Карактерот на нсредните народни училишта се разликува во зависност од земјата каде се наоѓа, но обично институциите ги имаат следниве заеднички одлики:

• Голем избор на предмети
• Нема завршни испити
• Фокус на само-развој
• Педагошка слобода
• Курсевите кои траат од неколку месеци до една година, со такси по курс
• Без numerus clausus (приемни испити)

Особено во земјите од негерманско говорно подрачје, народните средни училишта можат да бидат интернати или воглавно да нудат курсеви за луѓе на возраст од 18-30 години.

Европа

Покрај нордиските земји и Германија има и средни народни училишта во Швајцарија, Австрија и Франција.

Данска

Народна гимназија Грундвиг

Првото средно народно училиште е основано во Родинг, Данска, во 1844 година. Започнало на иницијатива на Кристен Колд, која бил следбеник на Грундвиг. Училиштето било инспирирано од потребата да се образуваат оние кои немале доволно среќа да имаат образование како сиромашните, или селаните, кои не можеле да одвојат време или пари за да присуствуваат на универзитет. Меѓу другите стари народни средни училишта во Данска се средните народни училишта како Теструп (основано 1866 година), Асков Хојсколе (основано 1865 година) и Ри Хојсколе (основано 1892 година) во Јитланд ; Народната гимназија Валекилде во Зеланд (основана 1865 година), и Родкилде Хојсколе на Мон (основана 1866 година). Меѓународниот народен колеџ во Хелсингор, уникатен меѓу данските народни средни училишта по тоа што е најинтернационален во Данска, со настава на англиски јазик, а посетуваат наставници и студенти од земји од целиот свет.

Во Данска има околу 70 средни народни училишта. Главните предмети на наставата варираат од креативните уметности како музика, уметност, дизајн, пишување, до интелектуални курсеви како религија, филозофија, литература и психологија. Некои училишта имаат дури и курсеви кои се специјализирани за спорт. Школарината варира, но обично е околу 1300 дански круни неделно, вклучувајќи пансион и сместување.

Во поновата историја, глобализацијата има сè поважно влијание врз данските училишта. Многу курсеви се отворени за странци, како и за Данци, а многу курсеви вклучуваат патување или доброволен престој во други земји како дел од наставната програма.

Финска

Во 1889 година, Софија Хагман го започнала првото средно народно училиште во Финска во Кангасала. Јавните, приватните, секуларните и религиозните средни народни училишта се вообичаени во Финска, а има и работнички средни училишта, кои се управувани од работничкото движење. Во Финска има 184 средни народни училишта, со годишно посетување курсеви од 650.000, во 2 милиони часови часови, што е значителен број за земја со 5,5 милиони жители. За разлика од финското јавно образование, има школарина, такси по курс и по лекција. Најчести предмети се занаетчиски вештини, музика, јазици, физичко образование, визуелни уметности, театар и танц.

Франција

Во 1866 година, за време на Втората империја, Жан Меке ја основал Ligue de l'enseignement („Наставна лига“), која била посветена на популарната настава. По расколот меѓу анархистите и марксистите на Хашкиот конгрес во 1872 година, народното образование останало важен дел од работничкото движење, особено во анархосиндикалистичкото движење кое со Фернан Пелутие формирало различни центри Bourses du travail, каде работниците се собрале и разговарале за политика и науки. Законите на Жил Фери кои биле донесени во 1880-тите го воспоставиле бесплатното, секуларно, задолжително јавно образование како еден од основните принципи на Третата република. Покрај тоа, многу учители биле силни поддржувачи на Алфред Драјфус за време на аферата Драјфус во 1890-тите. Потоа, некои наставници организирале бесплатни едукативни предавања на хуманистички теми со цел да се борат против ширењето на антисемитизмот во Франција.

Список на предавања, Université populaire - град Villeurbanne - 1936 година

Во поново време, по претседателските избори во 1981 година, министерот за образование Ален Савари ја поддржал иницијативата на Жан Леви да се создаде државно средно училиште кое ќе дава бакалауреат, но ќе биде организирано врз принципите на самоуправување на работниците (или „автогестија“). Ова средно училиште го добило името Lycée autogéré de Paris (LAP). ЛАП бил експлицитно инспириран од средното училиште Витрув, кое било отворено во 1962 година во 20-тиот арондисман на Париз (и сè уште е активно), Експерименталното средно училиште во Осло, кое било отворено во 1967 година во Норвешка, и Експерименталното средно училиште Сен Назаир, кое било отворено шест месеци пред ЛАП. Теоретските влијанија ги вклучуваат делата на Селестин Фреине, Рејмонд Фонвије, Фернан Ори и други теоретичари на институционалната педагогија, институционалната анализа (особено Рене Лорау) и институционалните психотерапевтски движења.

Германија, Швајцарија и Австрија

Лого на здружението на германските средни народни училишта

Volkshochschule Диселдорф 2016 година

Volkshochschule Krems an der Donau

Средните народни училишта во Германија, Швајцарија и Австрија обично се финансираат на локално ниво и обезбедуваат некредитни курсеви за возрасни во:

• општо образование
• стручно образование
• политичко образование
• Германскиот како втор јазик (особено за имигрантите)
• курсеви за интеграција (особено за новодојдените бегалци)
• разни странски јазици
• различни форми на уметност
• информациска технологија
• здравствено образование
• подготвителни часови за училишни испити (особено за Абитур или матура)

Овој тип на народна гимназија моментално е најраспространет во Германија. Бидејќи нудат подготвителни часови за училишни испити, во Германија овие училишта функционираат и како еквивалент на средните училишта за возрасни во други земји. Германија има и средни народни училишта кои се интернати, наречени Heimvolkshochschulen .

Норвешка

Првото средно народно училиште во Норвешка, Сагатун, било основано во 1864 година. Од 2012 година, имало 77 средни народни училишта распространети низ целата земја, од кои триесет билехристијански училишта. Средните народни училишта даваат можности за општо образование, пред сè за младите. Овие училишта се разликуваат од пониските средни училишта, високите средни училишта и високото образование. Сите студенти се подобни за нормална финансиска помош. Некои средни народни училишта се поврзани со некаква организација, но голем број од нив се во сопственост на фондација, а некои се во сопственост на округот. Повеќето курсеви траат една година, но неколку училишта даваат курс за втора година. Вообичаените опции за курсеви вклучуваат вештини на отворено, вештини за користење на земјиште, уметност како фотографија или сликарство, музика како џез или рок, норвешки јазик или култура и вештини за патување.

Шведска

Првите средни народни училишта во Шведска се основани во 1868 година. Првото училиште било отворено само за мажи, но веќе во 1870 година, првото средно народно училиште за жени било основано од страна Фредрик Пајкул.

Почнувајќи од 2008 година, има околу 150 средни народни училишта низ целата земја, од кои повеќето се наоѓаат на село, често во оддалечените области. Школарината е бесплатна, а студентите имаат право на нормална финансиска помош за трошоци како што се сместување и други училишни трошоци. Студентите можат или да учат за општа квалификација, што ги прави подобни да студираат на универзитет, или специфичен предмет како што се уметност, занаетчиство, филм, театар, музика или дизајн за да стекнат практично искуство.

Некои училишта, на пример Södra Vätterbygdens Folkhögskola во близина на Јеншепинг, соработуваат со училишта во други земји и имаат програма за размена на студенти.

Нигерија

Во 1998 година, Движењето Грундвиг од Нигерија предводено од д-р Качи Озумба Снр. го основал меѓународното средно училиште „Грундвиг“, независно средно училиште за сообразување, изградено врз принципите за образование на Грундвиг.

Соединети Држави

Американците Џон К. Кембел и Олив Дејм Кембел помогнале да се создаде народна гимназија во руралните Апалачија врз основа на набљудувањата на европските средни народни училишта. Народното училиште Џон К. Кембел било отворено во 1925 година во Брастаун, Северна Каролина, и истото сè уште нуди часови. Студентите можат да научат американски традиционални уметности и занаети, вклучително и ковачство, керамика, готвење, накит, танц и музика.

Мајлс Хортон, кој е ко-основач на Народната школа Хајлендер, фокусирана на граѓанските права во Њу Маркет, Тенеси во 1932 година, исто така бил инспириран од данското народно средношколско движење, како што може да се прочита во неговата автобиографија Долгите дестинации .