РК Пелистер

Не го поистоветувајте со клубот Еурофарм Пелистер кој во минатото го носел името Еурофарм Работник.

РК Еурофарм Пелистер 2, познат и по старото име РК Пелистер - ракометен клуб од Битола, Република Македонија. Клубот е основан 1955 година и моментално се натпреварува во Супер Лигата.

РК Еурофарм Пелистер 2
Целосен назив	Ракометен Клуб Еурофарм Пелистер 2
Основан	1955 (1955)
Игралиште	Спортска сала Боро Чурлевски
Приемност	3,500
Лига	Супер Лига на Македонија
2021/22	4. место
Бои
Клупски бои
Дресови
Домашен Гостински

Историја

Клубот е основан во 1955 година. Клубот тогаш се натпреварувал во Републичката лига. Во 1960 година, била формирана Втората сојузна лига на Југославија во која преку квалификации во Зрењанин, Пелистер станал член на лигата, што било првпат екипа од Битола да има претставник на сојузен ранг. За овој успех на битолскиот клуб, еден од најзаслужните бил голманот Боне Трајковски. Потоа, Втората сојузна лига била расформирна и Пелистер повторно играл во Републичката лига која повторно станал втор ранг на квалитет, заедно со РК Работник. Во 1967 година, двете екипи кадарно се здружиле под заедничко име РК Пелагонија, кој четири години по ред бил првак на Републичката лига. Во 1971 година, екипата постигнала голем успех и го освоила првото место во лигата и за првпат Битола добила свој претставник во Првата сојузна лига. Еден од поистакнатите играчи заслужни за таквиот успех бил голманот Боне Трајковски.

Сè до осумдесеттите години на 20. век клубот се натпреварувал во понизок ранг, а од сезоната 1983/84 станал стандарден член Првата сојузна лига. Пелистер во 1986 година станал првиот македонски клуб кој играл во некое европско натпреварување, играјќи против Атлетико Мадрид. Првиот значаен резултат го имал во сезоната 1985/86 кога го освоил третото место во Првата лига. Наредните две сезони биле најуспешни во дотогашната историја на клубот, Пелистер во сезоната 1986/87. и 1987/88. го освоил второто место, двапати зад тогашната доминантна шабачка Металопластика. Како второпласиран од сезоната 1987/89, во сезоната 1988/89 Пелистер играл во ЕХФ Купот, и го остварил својот дотогаш најдобар резултат, стигнувајќи до четвртфинале, каде во двомечот бил поразен од источногерманскиот Форвертс (35:38).

Откако, во 1992 година, се формирала Супер лигата на Македонија, Пелистер станал најуспешен клуб освојувајќи пет титули од вкупно осум одиграни сезони. Исто така, во тој период освои и четири трофеи на Националниот куп, 1994, 1996, 1998 и 1999 година. Носејќи го името Пелистер Еврокар поради спонзорски причини, во сезоната 1995/96, стигнал до полуфиналето во Европскиот куп на победници, каде за противник го имал германскиот Лемго. Во првиот меч на гости Пелистер бил поразен со 25:23, но во реваншот победата од 24:23 не била доволна, па Лемго отишол понатаму и на крајот го освоил трофејот.

Најголемиот успех во европските натпреварувања бил остварен во сезоната 2001/02, кога Пелистер играл во финалето на ЕХФ Челенџ купот. Во низа паднале рускиот Зилант Казан, францускиот Париз Сен - Жермен, грчкиот ГАЦ Кукуш, и на крајот во полуфиналето данскиот Фредериксберг после седмерци (61:60 вкупен резултат). Во финалето Пелистер бил поразен од данскиот Скјерн. Пелистер имал дури седум гола предност од првиот меч дома (27:20), но во реваншот бил поразен со убедливи 34:17.

Сезоната 2004/05 била последната сезона во која клубот бил првак на првенството откако во полуфиналето го поразил Вардар со 2-1 во победи, и со истиот резултат го победил Металург во финалето.

Платформа за ракометна Битола

Компанијата Еурофарм, сопственикот на РК Еурофарм Работник, во јули 2019 година дала понуда, т.н. Платформа за ракометна Битола, до Општина Битола односно сопственикот на РК Пелистер. Платформата гласела Еурофарм да откупи 75 проценти од РК Пелистер, а Оштина Битола да откупи 25 проценти од РК Еурофарм Работник. Потоа клубот Еурофарм Работник да го добие името Еурофарм Пелистер, а првичниот Пелистер да го смени името во Еурофарм Пелистер 2. Еурофарм Работник се изјаснил дека правниот статус на РК Пелистер нема да биде згаснат и дека во иднина може да се одвои под ново сопствеништво. На 29 ноември 2019 година, Еурофарм и Општина Битола официјално се договориле и се потпишале за остварување на платформата.

Историја на клупското име

• 1995-1996: РК Пелистер Еврокар
• 2004-2005: РК Пелистер Кометал
• 2008-2014: РК Пелистер 08
• 2014-2020: РК Пелистер
• 2020-....: РК Еурофарм Пелистер 2

Успеси

Национални

• Супер Лига :

Првак (6): 1992/93, 1993/94, 1995/96, 1997/98, 1999/00, 2004/05.

• Куп на Македонија :

Првак (5): 1994, 1996, 1998, 1999, 2005.

• Македонска републичка ракометна лига :

Првак (6):1968, 1969, 1970, 1971, 1979, 1981.

Меѓународни

• ЕХФ куп на победници :

Полуфинале (1): 1995/96.

• ЕХФ Челенџ куп :

Финалист (1): 2001/02.

• ЕХФ куп :

Четвртфинале (1): 1988/89.

• Меѓународен ракометен турнир во Добој :

Освојувач (2): 1996, 1997.

Состав

Состав за сезоната 2022–23

Голмани 01 Мартин Јовановски Василије Пичурица Десни крила 24 Никола Стоилевски 44 Ненад Белистојановски 88 Димитриј Блажевски Леви крила 22 Иван Димитровски 33 Петар Атанасијевиќ Андреј Марковски Пивоти 20 Антонио Николовски 99 Филип Арсеновски Васко Мартиновски Трајче Мицевски

Леви бекови 10 Кристијан Митревски 34 Емилијан Ѓорговски Христијан Ристевски Средни бекови 23 Стефан Талевски Мартин Ивановски Филип Гуцевски Мартин Табакоски Десни бекови 07 Андре Буторац 11 Симон Мирчески 13 Павле Петровиќ

Стручен штаб

• Главен тренер: Александар Јовиќ
• Помошник тренер: Александар Жарков
• Тренер на голмани: Зоран Атанасовски
• Кондициски тренер: Васко Димитровски
• Физиотерапевт: Петар Мицевски

Поврзано

• РК Еурофарм Работник

Надворешни врски

• Официјална страница на клубот Архивирано на 26 април 2012 г.
• Профил Архивирано на 5 април 2012 г. на страницата на ЕХФ