Беласица
За други значења видете Беласица (појаснување)
| Беласица | |
| планина | |
 Поглед кон врвот Радомир
| |
| Регион | Балкан |
|---|---|
| Се граничи со |  Македонија Бугарија Грција
|
| Координати | 41°20′N 22°57′E / 41.333° СГШ; 22.950° ИГД |
| Највисока точка | Радомир |
| - височина | 2.029 м |
Беласица — планина во југоисточниот дел на географскиот регион Македонија и е поделена меѓу државите Македонија (35%), Грција (45%) и Бугарија (20%). Во Македонија, оваа планина почива во близина на Струмица. Има напореднички правец на протегање исток - запад и должина од над 70 км. Спаѓа во групата најстари планини не само во Република Македонија, туку и на Балканскиот Полуостров. Настанала за време на создавањето на Родопските Планини. Подоцна е разорена а повторно е издигната за време на најмладото алпско набирање. Според морфолошката структура, планината е изразит хорст со мошне стрмни падини кои се спуштаат на северната и јужната страна.[1]
Од соседните планини Беласица е одделена со долините на реката Вардар на запад, Струма на исток, Струмичката Котлина на север и Дојранската и Серската Котлина на југ. Според висичината, таа спаѓа во групата високи планини. Наjвисок врв е Радомир (Калабак) - 2.029 метри, наречен по царот Гаврил Радомир, син на царот Самуил. На врвот Тумба се наоѓа тромеѓата меѓу Македонија, Бугарија и Грција (поточно Вардарска, Пиринска и Егејска Македонија). Тука е поставен граничен камен во вид на пирамида, што ја означува тромеѓата помеѓу овие три држави. Беласица е богата со шуми и на неа се среќаваат дабот, буката, борот, елата, јасенот и др.[2]
Но, таа е уште побогата со планински пасишта на кои во летниот период доаѓааат бројни стада на пасење. Само највисоките врвови на Беласица се голи и каменити. Во подножјето на Беласица извираат многубројни термални и минерални извори. Меѓу нив најпознат е изворот во с. Банско. Водата од овој извор е лековита, минерална и сулфурна со температура од 75 °С. Според температурата на водата овој извор е најтоплиот во Македонија. Исто така, Беласица е богата со рудни богатства, но сѐ уште ништо не се експлоатира. На падините на Беласица се наоѓа еден од најубавите водопади во Македонија - Смоларскиот Водопад.[3]
Од 2001 година секоја година, во август, се организира меѓународен планинарски поход за искачување на врвот Тумба (Тромеѓа) под наслов „Балкан без граници“. Походот започнува од селото Смоларе, преку планинарскиот дом „Шарена чешма“, сè до тромеѓето.[4]
Историја
уредиПланината е позната како местото кајшто се одиграла значајната Беласичка битка (1014), кајшто се судрила војската на Самоиловото Царство со византиската војска на Василиј II.
Галерија
уреди-
Карта на Беласица и Огражден. -
Глетка од северните падини на Беласица -
Врвовите Самаркајасен (БоТра) и Висока Чука на сртот на Беласица кон запад -
Врвовите Сечена Скала, Самар, Тумба и Радомир на сртот на Беласица кон исток -
Глетка на Дојранското Езеро од врвот БоТра (Самаркајасен) на сртот на Беласица -
Северните падини на Беласица -
Врвот Василева Чука на северните падини на Беласица -
Поглед на Струмичкото Поле од падините на Беласица -
Бачило на Беласица -
Врвот Сечена Скала
Поврзано
уреди- Беласичка битка
- ФК Беласица
- Беласица (Пиринско) — село во Петричко, со изворно име Елешница
Наводи
уреди- ↑ А. Стојмилов, Физичка географија на Република Македонија, ПМФ, Скопје, 2003.
- ↑ Д. Манаковиќ, Т. Андоновски, Релјефни одлики на Источна Македонија, „Географски разгледи“, кн. 17, Скопје, 1979
- ↑ Благоевъ, Т. А. Бѣласица. София, 1925.
- ↑ Александар Матески, „Беласица“, Стопанство и бизнис, година 18, број 213, март 2016, стр. 106-107.
Надворешни врски
уреди| „Беласица“ на Ризницата ? |
- Слики од Беласица во текот на зимата Архивирано на 13 февруари 2009 г.
- Особености и историја на планината Беласица - Портал на Општина Ново Село
- Портал на Беласица и регионот Архивирано на 18 септември 2011 г. (бугарски)
- За водопадите на Беласица - Портал „ИГЕО“
- Документарна емисија за Беласица на Миленко Неделковски