Латродектизам

Латродектизам (англиски: Latrodectism) е клинички синдром на труење предизвикан од невротоксичниот отров латротоксин (latrotoxin), што може да биде инјектиран при каснување од кој било пајак што припаѓа на родот Latrodectus, во фамилијата Theridiidae.

Латродектизам
Црна вдовица (Latrodectus mactans), предизвикувач на латродектизам
Специјалност	Ургентна медицина

Најпознати членови на родот Latrodectus се пајакот "црна вдовица" (L. mactans), австралискиот "црвеногрбен пајак" (L. hasselti), "кафеавата вдовица" (L. geometricus), "европската црна вдовица" (L. tredecimguttatus) и "катипо пајакот" (L. katipo).

Труење

Отровот се шири брзо низ целото тело и дејствува така што предизвикува ослободување на невротрансмитери на ацетилхолин, норадреналин, и гама-аминомаслена киселина. Ослободувањето на овие невротрансмитери доведува до клинички манифестации на труење.

Симптоми

Симптомите се појавуваат во три главни фази: фаза на егзацербација, фаза на дисипација и резидуална фаза.

Фаза на егзацербација (влошување)

Во текот на првите 24 часа по каснувањето се појавува:

• Силна болка во мускулните групи во околината на местото на каснување.
• Мускулни грчеви, пред сè во пределот на стомакот, грбот и бутовите.
• Главоболка, вртоглавица, треперење, саливација (зголемено лачење плунка), дијапореза (прекумерно потење), гадење и повраќање.
• Анксиозност, замор, несоница.
• Лакримација (солзење во очите).
• Миграторна артралгија (болки во зглобовите).
• Тахикардија (забрзано срцебиење), брадикардија (многу бавно отчукување на срцето), немир, хипертензија (покачен крвен притисок), тахипнеја (хипервентилација).

Во некои ретки и екстремни случаи, можат да настанат тешки компликации:

• Спонтан абортус, предвремено породување
• Пријапизам
• Акутна ренална инсуфициенција (престанок на функцијата на бубрезите).
• Миокардитис, рабдомиолиза, парализа.
• Шок, кома и смрт.

Симптоми што можат да се појават на раната или во близина на раната:

• Исип, слаб еритем (црвенило на кожата), пилоерекција (гускина кожа).
• Лесен едем (оток поради вишок на течност).
• Лезија или блага инфекција (ретко).

Фаза на дисипација

Во текот на првите 1-3 дена по каснувањето:

• симптомите почнуваат да се намалуваат.

Резидуална фаза

Во текот на следните неколку недели или месеци:

• мускулни грчеви, трнење, нервоза и слабост. Постои потенцијален ризик од парализа.

Смртност

Иако е познато дека имало тешки симптоми, како што се шок и кома, случаите на смрт поради латродектизам се ретки. Малите деца се чини дека се изложени на најголем ризик од смртоносното каснување, што веројатно се должи на нивната помала телесна маса.

Надворешни врски

Класификација	П · Р · П МКБ-10: T63.3 МКБ-9-CM: 989.5 MeSH: bites / diagnosis spider bites / diagnosis
Надворешни извори	eMedicine: derm/599

• e-Medicine: Black Widow Spider Bite Treatment Article