Јужен Поларник

Јужен Поларник (Јужен Поларен Круг или Антарктички Круг) — еден од петте главни напоредници на картата на светот. Ова е замислениот обрач што минува на географска ширина од 66° 33′ 44″ (или 66,5622°) јужно од екваторот.

Јужниот Поларник на карта на светот. Карта на Антарктикот со Јужниот Поларник (сино).

Опис

Подрачјето јужно од Јужниот Поларник се нарекува Антарктик, а подрачјето веднаш на север е јужниот умерен појас. Еквивалентниот напоредник на северната полутопка се нарекува Северен Поларник (Арктички Круг).

Секое место јужно од Јужниот Поларник има барем по еден ден во годината со 24-часовна дневна светлина и уште еден со 24-часовна ноќ. Во првиот случај сонцето цел ден не заоѓа, а во вториот цел ден воопшто не изгрева. На поларникот ова се случува точно по еднаш годишно, и тоа во декемврискиот и јунскиот сонцестој. Ова се должи на тоа што Земјината оска е наклонета за 23,5 степени во однос на еклиптиката (рамнината по која Земјата се врти околу сонцето). За време на јужниот зимски сонцестој, јужната полутопка е најмногу навалена наназад и со тоа најдалеку од Сонцето. Подрачјето на постојан мрак ја достигнува својата северна граница. При јужниот летен сонцестој, јужната полутопка е во најголема мера навалена кон Сонцето, па така подрачјето на постојан мрак ја достигнува својата северна граница.

Јавувањето на поларниот ден и ноќ се должи и на неколку други фактори, од кои најважни е атмосферското прекршување на светлината, надморската височина на набљудувачот, привиденијата и фактот дека сонцето е топка, а не точка. Привиденијата на Антарктикот се уште поспектакуларни од оние на Акрктикот. Таков пример е низата од привидни залези и изгреви, додека сонцето сето време е всушност под хоризонтот.

Поларникот полека се поместува поради постепената промена на наклонетоста на Земјината оска.

Места

Почнувајќи од нултиот меридијан, па на исток, Јужниот Поларник минува низ:

Координати	Земја, територија, море	Белешки
66°34′S 0°0′E	Јужен Океан	северно од Земјата на Кралицата Мод и Ендербиевата Земја
66°34′S 50°32′E	Антарктик – Ендербиева Земја	полага право Австралија
66°34′S 57°19′E	Јужен Океан	северно од Ејмериевата Ледена Плоча
66°34′S 82°6′E	Антарктик	полага право Австралија
66°34′S 89°14′E	Јужен Океан
66°34′S 91°29′E	Антарктик	полага право Австралија
66°34′S 92°21′E	Јужен Океан
66°34′S 93°52′E	Антарктик	полага право Австралија
66°34′S 107°45′E	Јужен Океан	заливот Вансен
66°34′S 110°12′E	Антарктик – Вилксова Земја	полага право Австралија
66°34′S 116°35′E	Јужен Океан
66°34′S 121°31′E	Антарктик – Вилксова Земја	полага право Австралија
66°34′S 127°9′E	Јужен Океан
66°34′S 129°38′E	Антарктик – Вилксова Земја	полага право Австралија
66°34′S 136°0′E	Антарктик – Аделина Земја	полага право Франција
66°34′S 138°56′E	Јужен Океан
66°34′S 162°44′E	архипелагот Балени – островот Борадел	полага право Нов Зеланд
66°34′S 162°45′E	Јужен Океан	минува веднаш јужно од островот Аделаида (полагаат право Аргентина, Чиле и Обединето Кралство)
66°34′S 65°44′W	Антарктик – Антарктички Полуостров, Греамова Земја и Ларсеновата Ледена Плоча	полагаат право Аргентина, Чиле и Обединето Кралство
66°34′S 60°21′W	Јужен Океан	минува низ Веделовото Море, па во неименуван дел од океанот

Поврзано

• Северен Поларник
• Екватор
• Сонцестој
• Осен наклон
• Јужен Повратник

Надворешни врски

• Јужен Поларник — официјална страница (англиски)