Институт за биологија - Скопје

Институт за биологија — институт кој структурно е составен дел на Природно-математичкиот факултет во Скопје (единица на УКИМ). Тој е средиште на високообразовната настава, на научните и апликативните истражувања во областа на биологијата.

Институт за биологија

Основано	1946
Седиште	Скопје, Македонија
Вработени	49
Мреж. место	ib.pmf.ukim

Историја

Институтот за биологија (како Катедра или Институт за биологија) бил основан во 1946 година, со основањето на Природно-математичкиот оддел во рамките на Филозофскиот факултет во Скопје. До 1951 година теоретската и практичната настава била изведувана во зградата на тогашниот Природонаучен музеј во Скопје. Во учебната 1951/52 година, Природно-математичкиот факултет бил сместен во зградата во која се наоѓа и денес. Теоретската настава се изведувала во 1 амфитеатар и 2 предавални. Со развојот на научноистражувачката и наставната дејност на Институтот следувало и отворање и проширување на лаборатории за истражувања и изведување на практичната настава.

Во 1958 година, Природно-математичкиот оддел се одделил од Филозофскиот факултет и прераснал во одделен Природно-математички факултет. Институтот за биологија бил во состав на Природно-математичкиот факултет сè до 1976 година. Со универзитетските реформи, во 1976 година, Институтот за биологија бил трансформиран во самостоен Биолошки факултет во рамките на Универзитетскиот центар за биолошко-биотехнички науки при Универзитетот „Кирил и Методиј“ во Скопје. Во рамките на Катедрата за биологија, односно Институтот за биологија, во 1952 година започнало организирањето ботаничка градина, а во 1977 година таа се издвоила како самостојна работна единица во состав на Заводот за ботаника, од кога и датира името Завод за ботаника со Ботаничка градина. Од 1985 година, со процесите на рационализација во високото образование, петте самостојни факултети (Математички, Факултет за физика, Хемиски, Биолошки и Географски) одново се обединиле во Природно-математичкиот факултет.

Основоположници на наставната и научната дејност на Институтот за биологија се наставници од повеќе универзитетски центри: д-р Синиша Станковиќ, д-р Милутин Радовановиќ, д-р Сима Гроздановиќ, д-р Стева Јаковлевиќ итн. Свој придонес во едукацијата на кадри на Институтот дале и многу професори од факултетите во Скопје што одржувале настава по предметите физика, хемија, математика, биостатистика, педагогија, психологија и методика. Наставната дејност на Институтот за биологија (тогаш Катедра за биологија) почнала со тројца наставници што ја изведувале целокупната активност во врска со организацијата и изведувањето на наставата (практичната и теоретската).

Денес, на Институтот за биологија се вработени 49 лица. Во наставно-научно и во соработничко звање работат: 17 редовни професори, 6 вонредни професори, 7 доценти и 2 асистенти. Исто така, во наставата учествуваат и надворешни соработници од други институти при Факултетот, како и од други факултети. Во работата на Институтот учествуваат и 12 технички соработници, 1 технички секретар, 1 библиотекар, 2 лаборанти и 1 лице помошен персонал од Ботаничката градина. За изведување на студиите по биологија, Институтот располага со амфитеатри (2), предавални (2), лаборатории за изведување на практичната настава (8) и лаборатории за научноистражувачка работа (14). Во рамките на Институтот се наоѓаат и дополнителни простории за наставно-научна работа: ботаничка градина, аквариум, лаборатории за одгледување на експериментални животни, клима-комора за одгледување на растителни култури, инсектариум, хербариум, херпетолошка збирка, миколошка збирка, компјутерска училница и библиотека.

Организација

Според научната и наставната област на интерес, наставничкиот и соработничкиот кадар на Институтот е организиран во заводи:

• Ботанички завод со ботаничка градина
• Завод за молекуларна биологија, генетика и микробиологија
• Завод за цитологија, хистологија и ембриологија
• Завод за експериментална физиологија и биохемија
• Завод за зоологија.

Организациска структура

• Завод за ботаника со ботаничка градина
  • Одделение за физиологија и биохемија на растенијата
  • Одделение за екологија на растенијата
  • Одделение за хидробиологија, систематика и биотехнологија на алгите
  • Одделение за систематика и филогенија на вишите растенија и фитогеографија со фитоценологија
  • Одделение за микологија
• Завод за цитологија, хистологија и ембриологија
• Завод за зоологија
  • Катедра за анимална екологија
  • Катедра за систематика и филогенија на безрбетници
  • Катедра за споредбена анатомија
• Одделение за зоологија на ’рбетните животни, биогеографија и валоризација на природните екосистеми
• Завод за експериментална физиологија и биохемија
  • Одделение за општа физиологија и имунологија
  • Одделение за анимална физиологија
  • Одделение за експериментална биохемија
• Завод за молекуларна биологија, генетика и микробиологија
  • Катедра за молекуларна биологијa
  • Катедра за генетика
  • Катедра за микробиологија и микробна биотехнологија