Антон Мирчев - Пешкоски

Антон Мирчев - Пешовски (Тресонче, Дебарско; 1890 - Москва, 1942) — македонски комунист, учесник во Октомвриската револуција.

Животопис

Антон (Доне) Мирчев (Мирчин) - Пешкоски е роден во Тресонче во маалото Пешковци и бил брат на учителот Крсте Мирчески. Во 1906 година заминал во Русија. Станал член на Македонската колонија во Петроград и бил потписник на неколку нејзини акти во списанието „Македонски голос“ (1914). Од 1914 година учествува во повеќе напредни групи во Русија. Во 1916 година во една полициска провала е затворен и протеран во Сибир. Потоа се враќа во Петроград и во 1917 година станува член на Македонскиот револуционерен комитет во Петроград. По избувнувањето на Октомвриската револуција зема учество во неа и учествува во нападот на Зимскиот дворец. За време на револуцијата бил член на петроградскиот револуционерен комитет и соработувал со Владимир Илич Ленин и Кристијан Раковски.^{[се бара извор]} Назначен е за еден од раководителите на монополот за шпиритус и член на контролната петорка за снабдувањето и исхраната на градот.

Кога во јануари 1918 година во Петроград е формирана групата на балкански комунисти, тој, заедно со Михаил Антонов, Владимир Каваев и Елена Каваева, зема активно учество во нејзината работа. Во 1918 година станува член на Руската комунистичка партија (болшевици). Потоа се вклучува во Првиот интернационален баталјон на Црвената армија за борба против контрареволуционерите и интервенционистите.

Доне станал и функционер во Комунистичката интернационала, како и министер во владата на Украина, составена по Октомвриската револуција од 1918 година.^{[се бара извор]}

Во 1920 година како комунистички емисар ја посетува Југославија и Бугарија. По враќањето во Русија, завршува инженерство. Испратен е во Сибир каде работел на обновата и изградбата на Магнитогорск.

Постојат две верзии за неговата смрт во 1942 година. Според првата Доне Мирчев починал во болница во Москва болен од туберкулоза. Според втората, тој мистериозно исчезнал една ноќ во 1942 година во Москва кога германските војски биле пред портите на главниот советски град.