Јонче Христовски
Јонче Христовски (Битола, 1931[1] — Скопје, 15 април 2000) — истакнат македонски пејач, текстописец и композитор на песни во народен дух, исклучително популарен естраден уметник[2], кој славата на македонскиот мелос ја пронесувал низ целиот свет. Создал сопствен интерпретативен стил, препознатлив и комуникативен со публиката. Најзапаметени меѓу народот ќе останат неговите сценски настапи со фрлање на палтото на земја, бакнување на земјата и боемскиот мераклиски начин на живот отсликан во неговите изведби на песните. Неговите песни изобилуваат со изворен македонски народен звук и ритмика и силен македонски патриотски дух на љубов кон Македонија, но и кон животот, песната, љубовта.
| Јонче Христовски | ||
| ||
| Роден | 1931 Битола, Македонија | |
|---|---|---|
| Починал | 15 април 2000 Скопје, Македонија | |
| Националност | Македонец | |
Се прославил со својата песна „Македонско девојче“[2] (1964), чии препеани верзии се појавиле на англиски, германски, дански, италијански, руски, српски, француски и шпански јазик. Впечатливи му биле и изведбите на песните: „Животе мој“, „Ај засвирете ми чалгии“, „Запеј песна Македонко“ и многу други во извонредно богатиот репертоар. Како најзапаметени и највпечатливи негови песни кои сè до денес се своевидни химни меѓу македонскиот народ, со огромна популарност се песните „Едно име имаме“, „Ако умрам ил загинам“, „Ој, Вардаре македонски“, „И ние сме деца на Македонија“', „Мој роден крај“, „Куќа имам на Пелистер“ и многу други. Член бил на ансамблот „Танец“ (пејач и играорец), каде како кореограф изработил и создал кореографии за неколку ора, меѓу кои и Калајџиското Оро. Како одговорен за народната музика во ТВ Скопје, ја иницирал серијата „Распеани градови“ (1974), еден од најзначајните проекти на ТВС.
Јонче Христовски бил женет и татко на две ќерки. Неговата сопруга трагично го загубила животот во катастрофалниот Скопски земјотрес 1963 година и токму на неа и за љубовта кон неа, Јонче Христовски ја посветил и напишал една од своите најпознати песни „Животе мој“. Во 2002 година во Скопје е основан ансамбл за народни песни и игри кој го носи неговото име[3], a македонско културно уметничко друштво со неговото име постои и во Германија.
Творештво
уредиЈонче Христовски напишал голем број песни, кои ги изведувале бројни пејачи:
- Крчма отвори моме
- Македонско девојче (заедно со Виолета Томовска)
- Машка клетва ќе ти дадам моме[4]
- Малку сакам ич не дават[5]
- Ах љубов, пак љубов (заедно со Драги Митев)
- Љуби, љуби лудо младо (заедно со Драги Митев)[6]
- Ој, Вардаре македонски (заедно со Виолета Томовска)
- Неќум сакам (со Кочо Петровски)[7]
Наводи
уреди- ↑ „Јонче Христовски“. Архивирано од изворникот на 2011-05-30. Посетено на 2012-03-26.
- ↑ 2,0 2,1 Јонче Христовски
- ↑ „Ансамбл „Јонче Христовски"“. Архивирано од изворникот на 2017-05-28. Посетено на 2012-03-26.
- ↑ Mile Todorovski, PGP RTB, EP 12735.
- ↑ Duet Kuculova-Andreevski, RTB, EP 12756.
- ↑ Duetot Miteva-Uzunov, Ah ljubov, pak ljubov, RTB, SF 13 111.
- ↑ Duet: Tomovska-Mančevski, Ah ljubov, pak ljubov, RTB, EP 12758.
Надворешни врски
уреди- Македонско девојче
- Дискографија на Јонче Христовски Архивирано на 9 јуни 2020 г. евидентирана од ВБУ Музички Регистар.