Бранислав Велешки
Георги Атанасов Левков, со псевдоним Бранислав Велешки — револуционер од Македонија, деец на бугарското националноослободително движење, добротворен член на Бугарското книжевно друштво (1869).
Левков е роден во 1834 година во велешкото село Карабуниште, тогаш во Отоманската империја. Како дете живее кај браќата Миладиновци во Кукуш. Во 1862 година се приклучува на Првата бугарска легија стационирана во Белград. Се зближува со бугарскиот преродбеник и револуционер Георги Раковски и е негов телохранител до неговата смрт. Раковски му го доделува псевдонимот Бранислав Велешки.
По 1867 година се населува во Букурешт, учествува во Бугарскиот револуционерен централен комитет и ја поддржува издавачката дејност на познатиот бугарски поет Љубен Каравелов. Од 1869 до 1870 година и повторно во 1875 година учествува во редакцијата на весникот „Тапан“, бугарски сатирично-хумористичен весник издаван во Букурешт, а во 1869 година е негов формален главен уредник. Се занимава и со самостојно издаваштво, соработува со кругот на бугарскиот револуционер и писател Христо Ботев.[1]
Во 1876 година е доброволец во Српско-турската војна. Во 1877 година се приклучува на Четвртата дружина на Бугарското ополчение во Руско-турската војна, учествувајќи во ослободувањето на Бугарија.[2] Во борбите кај Шипка е ранет од куршум, но закрепнува.[3] Куршумот му останува во градите до крајот на животот.[4]
По 1878 година живее во Пловдив, тогаш главен град на новосоздадената Источна Румелија, автономна област на Отоманската империја, каде што работи како поштар. Учествува во подготовката и спроведувањето на соединувањето на Кнежевство Бугарија и Источна Румелија во 1885 година. Член е на Пловдивското поборничко-ополченско друштво, кое има за цел да го зачува споменот на загинатите за слободата на Бугарија и да организира морална и материјална поддршка за живите ополченци и поборници.[5] Активист е на пловдивското македонско-одринско друштво.[6]
Левков умира на 17 мај 1919 година во Пловдив.
Наводи уреди
- ↑ Енциклопедия България. Том 1, София, Издателство на БАН, 1978.
- ↑ Македонцитѣ въ културно-политическия животъ на България: Анкета отъ Изпълнителния комитетъ на Македонскитѣ братства (PDF). София: Книгоиздателство Ал. Паскалевъ и С-ие, Държавна печатница. 1918. стр. 36.
- ↑ Опълченци от Македония, посетен на 24 октомври 2007 г.
- ↑ „Бранислав Велешки, телохранителят на Раковски“. Blitz.bg (бугарски).
- ↑ Информациски бюлетин[мртва врска]посетен на 24 октомври 2007 г.
- ↑ Райчевски, Георги. Пловдивска енциклопедия, Трето преработено и допълнено издание, 2004, стр. 61.