Требенишко кале

Требенишко кале — археолошко наоѓалиште во селото Требеништа, Општина Дебрца. Претставува утврдена населба од бронзеното, железното, хеленистичкото и римското време.

На југоисточната страна над селото се издига висок рид со надморска височина од 1.080 м, со кој практично завршува Вишовска Планина. Врвот му е зарамнет и на него се гледаат остатоци од ѕидови на тврдина, градена од кршен камен и варов малтер, на кои се распознаваат неколку фази на градба и интервенции. По целата површина на населбата се забележуваат фрагменти од керамички садови од различна временска и културна провениенција. Оние во средиштето се од неолитското, бронзеното и железното време, а оние по падините од јужната и западната страна од хеленистичкото и римското време. На понискиот дел од јужната падина се наоѓа некропола на која со ископувањата во 1953/54 година биле откриени и истражени 17 гробни целости, а на повисокиот дел од истата падина била пронајдена римска некропола. Наодите се чуваат во Заводот и музеј во Охрид.

Поврзано

• Алистрати — средновековна црква и некропола;
• Дере - Кај Чешмата — населба од бронзеното време;
• Забрдо — населба од железното време, населба и некропола од хеленистичкото и римското време и населба од раниот Среден век;
• Св. Мартинија — старохристијански сакрален објект;
• Црква — раносредновековна некропола;
• Црквиште — средновековна црква;
• Требеништа — античка некропола;
• Требеништа;
• Список на археолошки наоѓалишта во Дебрца;
• Список на средновековни некрополи во Македонија.