Колибри - книжевен прилог

„Колибри“ – книжевен прилог за деца

Историјат

„Колибри“ е единствениот прилог за деца во македонскиот дневен печат. Прилогот се печати секој вторник и е достапен како додаток на весникот „Нова Македонија“. Првиот број на „Колибри“ се објави во 1958 година, благодарение на идејниот творец, поетесата Евгенија Шуплинова и на поетите Перо Миленкоски и Наум Попески. По нивните стапки чекори сегашниот уредник на „Колибри“, Марија Таушанска Анастасовска.

„Колибри“ сè уште лета благодарение и на поддршката, своевремено, на првите луѓе на НИП „Нова Македонија“ и денес, на весникот „Нова Македонија“.

Активности и соработници

• „Колибри“ е хроничар на сите активности поврзани со децата. Секогаш е во нивните училишта, работилници, на спортските терени, фестивали, акции. Во „Колибри“ се објавуваат вести за нови книги за деца, за млади таленти, за успеси на учениците и на сите кои се грижат за нив. Голем број од нив земаат активно учество во создавањето на содржината на „Колибри“.
• За финалната подготовката и доставата на прилогот се грижат и фотографите, техничките уредници, лекторите, дистрибутерите. Сите тие работат тимски и придонесуваат „Колибри“ да стигне навреме во детските раце и да предизвика насмевка на нивните лица.

• Во текот на годините, со свои раскази и песни, во „Колибри“ како соработници се појавиле голем број македонски писатели и поети, почнувајќи од Васил Мукаетов, преку Стојан Тарапуза, потоа Киро Донев, Владе Димовски, Велко Неделковски, Мишо Китаноски, Бистрица Миркуловска, Горјан Петревски, Славка Арсова, Вера Андон, Вера Симовска, Татјана Гогоска, Јадранка Клисарова, Ванчо Полазаревски, Трајче Кацаров, Владо Јаневски, Филип Димкоски, Андреј Јанков и многу други.

• Освен книжевните содржини, во „Колибри“ има простор и за ликовните активности и за стрипот. Така на пример, на страниците на „Колибри“, секој вторник се објавуваат стрип епизоди од „Палавковците Влатко и Емче“ на писателот и стрип автор Владо Јаневски, претходно тука редовно се објавуваше стрип серијалот „Марсо Марсоски“ на младата сликарка Славица Танеска.

• Тимот на „Колибри“ ги следи активностите и на детскиот литературен фестивал „Ракатки“, на ликовниот „Малиот битолски Монмартр“, а исто така долги години се дружи и со Ивица Маринковиќ, за пошироката јавност познат како Ивце Пивце.