Сензација (филм од 2006)

Сензација (англиски: Scoop) - американски филм од 2006 година, во режија на Вуди Ален. Главните улоги ги толкуваат: Скарлет Јохансон, Хју Џекмен, Вуди Ален, Ијан Мекшејн итн.

Содржина

По смртта, новинарот Џо Стомбел (го игра Мекшејн) се наоѓа во еден чамец, заедно со други умрени луѓе. Една жена му кажува дека била отруена од богатиот аристократ Питер Лајман (го игра Џекмен), кој е сериски убиец. Во тоа време, Лондон го потресува аферата за серискиот убиец со тарот-карти, кој убива проститутки. За време на една претстава на магионичарот Сид Вотерман или „Сплендини“ (го игра Ален), една девојка, Американката Сондра Пренски (ја игра Јохансон), инаку студентка по новинарство која е во посета на Лондон, се јавуав како доброволец за трикот со дематеријализација. Таа влегува во кутијата и таму ѝ се прикажува духот на Стомбел, кој ја убедува дека може да направи сензација ако прва ја објави веста за милионерот-убиец Питер Лајман.

Така, Сондра и магионичарот започнуваат истрага, со цел да соберат докази против Лајман. Најпрвин, Сондра се запознава со него и лажно се претставува како ќерка на магионичарот кого го претставува како богат бизнисмен од САД. Таа и магионичарот се поканети на забава на имотот на Лајман и тогаш Сондра започнува да се вљубува во него. Набргу, тие започнуваат љубовна врска, но истовремено ја проверуваат неговата куќа во потрага по докази. Бидејќи доаѓаат до одредени сомнителни укажувања, тие се обраќаат до весникот „Обсервер“ кому му ја нудат сензационалната приказна, но тогаш дознаваат дека серискиот убиец е уапсен од полицијата.

Притоа, Сондра прави грешка и на Лајман му кажува дека го следела, мислејќи дека е сериски убиец. Истовремено, магионичарот оди во станот на една од убиените проститутки, по што доаѓа до несоборливи докази дека неа ја убил Лајман. Оттука, тој вози кон имотот на Лајман за да ја предупреди Сондра, но умира во сообраќајна несреќа. За тоа време, Сондра мислејќи дека не знае да плива, Лајман ја турка Сондра во езерото, со намера да ја убие, а потоа се јавува во полицијата и пријавува дека неговата девојка несреќно се удавила. Кога доаѓа полицијата, се појавува Сондра жива и здрава, кажувајќи му на Лајман дека е одлична пливачка.