Прекуморска заедница
Прекуморска заедница (француски: collectivité d'outre-mer или COM) — првостепена административна единица на Франција налик на регионот, но со изевсен степен на втономија. Овој статус го имаат некои поранешни колонии и други прекуморски владенија, стекнат со уставната реформа од 2003 г. Ваквата единица се разликува од прекуморските департмани и региони, кои имаат исти права како оние во Метрополска Франција.
Како составен дел од Франција, прекуморските заедници имаат свои претставници во Националното собрание, Сенатот и Економско-социјалниот совет. Од нив, само Свети Мартин е во Европската Унија и гласа на европските парламентарни избори. Во паричен поглед, прекуморски заедници во Тихиот Океан го употребуваат тихоокеанскиот франк (XPF), кој е курсно врзан за еврото, додека пак атлантските заедници го користат самото евро.
Денес постојат пет прекуморски заедници на Франција:
- Француска Полинезија — тихоокеанска територија на Франција сочинета од голем број острови. Станала прекуморска заедница во 2003 г. По законот од 2004 г. се нарекува „прекуморска земја во состав на Републиката“ (pays d'outre-mer au sein de la République или POM), но правно останува со тој статус. Француска Полинезија има голем степен на автономија, со свој симболичен претседател и свое собрание.
- Валис и Футуна — три мали острови во Тихиот Океан. Имаат виш управник и територијално собрание.
- Свети Мартин — северната половина на истоимениот остров во архипелагот Мали Антили. Го стекнал овој статус со неговото отцепување од прекуморскиот департман Гваделуп во 2007 г. Има територијален и извршен совет. Останал дел од Европската Унија и по отцепувањето.
- Свети Вартоломеј — остров во Малите Антили. Се отцепил од прекуморскиот департман Гваделуп во 2007 г. Има територијален и извршен совет. Со отцепувањето ја напуштил Европската Унија.
- Свети Петар и Микелон — група острови во Атлантскиот Океан недалеку од Њуфаундленд, Канада. Има територијален совет. Претставува последен остаток од некогашното колонијално поткралство Нова Франција.
Поранешни прекуморски заедници и територии уреди
- Мајот бил прекуморска заедница од 1976 до 2011 г., кога станал прекуморски департман.[1]
- Нова Каледонија од 1946 г. имала статус на прекуморска територија, но во 1999 г. добила посебен статус согласно Нумејската спогодба од претходната година. Со неа е воведено новокаледонско државјанство и постепено отстапување на надлежностите од француската држава.
Поврзано уреди
Наводи уреди
- ↑ Benoît Hopquin (31 March 2011). „Mayotte accède à son statut de département dans la confusion“. Le Monde. Посетено на 31 March 2011.
Надворешни врски уреди
| „Прекуморска заедница“ на Ризницата ? |