Долно Градиште (Филиповци)

Долно Градиште — градиште од доцноантичкиот период во атарот на селото Филиповци, Македонија. Помеѓу Туралевски Дол и Крива Река, на висок планински гребен се наоѓа долго и тесно плато со димензии од 150 на 70 метри, на кое има остатоци од бедем што го оградувал градиштето. Зачувани се само темелите градени од камен и варов малер. Во внатрешноста на тврдината, на повеќе места се гледаат контури на помали објекти. По површината се среќаваат фрагменти од керамички садови, питоси и покривни ќерамиди. Градиштето е делумно оштетено со вадење на градежен материјал од бедемот и објектите. На јужното подножје на ридот, кај месноста Герани се откриени повеќе гробови во кои се пронајдени неколку керамички садови и неколку монети. Наодите се чуваат во Музејот на Македонија.

Поврзано

• Свети Илија — населба и црква од доцноантичко време и старохристијанско време;
• До Селото — некропола од доцноантичко време;
• Филиповци;
• Список на археолошки наоѓалишта во Кратовско.