Бистерна (Прдејци)

Бистерна — археолошко наоѓалиште во гевгелиското село Прдејци. На 500 м северозападно од селото, во плантажите на „Вино-југ“ од Гевгелија, на површина од околу 2 хектара се откриени делови од овални јами со пречник од 1.5 - 2m и длабочина од 0.80 - 1.20m, во кои се најдени фрагменти од керамички тави со груба фактура и рачно работење, како и камени и кремени орудија. На поголем дел од наоѓалиштето се среќаваат фрагменти од керамички садови, питоси, тегули и имбрекси, архитектонска пластика, а најден е и дел од надгробна стела. Исто така, пронајдени се и траги од објекти градени од кршен камен и тегули, поврзани со варов малтер, мозаични подови, ќерамички тубулуси и суспензури. Во долниот дел на плантажата е откриена и поголема еднокорабна црква со траги од фрескоживопис. Масивните ѕидови на објектот се градени од кршен камен и варов малтер.

Наоѓалиштето е прогласено за културно наследство на Македонија. Наодите се чуваат во Музејот во Гевгелија.

Поврзано

• Ветка Црква — сакрален објект од римското време;
• Колник — старохристијанска базилика;
• Прдејци;
• Список на археолошки наоѓалишта во Гевгелиско;
• Список на средновековни некрополи во Македонија;

Надворешни врски

• Бистерна (Прдејци) на Ризницата ^?