30 дена темнина

„30 дена темнина“
	Плакатот на филмот
Режисер	Дејвид Слејд
Продуцент	Сем Рејми; Роберт Таперт;
Главни улоги	Џош Хартнет; Мелиса Џорџ; Дени Хјустон; Бен Фостер; Марк Бун Помладиот;
Музика	Брајан Рејтцел
Кинематографија	Џо Вилемс
Монтажа	Арт Џонс
Дистрибутер	Sony Pictures Releasing
Премиера	19 октомври 2007 г.
Времетраење	114 минути
Земја	САД
Јазик	англиски; + македонски (титла);
Буџет	30 милиони долари
Бруто заработка	75,5 милиони долари

30 дена темнина (англиски: 30 Days Of Night, буквално: 30 ноќни дена) — американски филм на ужасите заснован на истоимената серија стрипови. Режисер на филмот е Дејвид Слејд, а главните улоги ги толкуваат Џош Хартнет, Мелиса Џорџ и Дени Хјустон. Дејството се одвива во мал град во Алјаска, кој на почетокот на 30-дневната поларна ноќ е нападнат од банда крвожедни вампири.^[2]^[3]

Филмот, со буџет од 30 милиони долари, бил прикажан на 19 октомври 2007 г. во САД и на 1 ноември во Обединетото Кралство. За шест недели од прикажувањето, трилерот заработил 75 милиони долари. На 5 октомври 2010 г., продолжението на филмот, „30 дена темнина: Мрачни времиња“, било објавено, а минисерија со наслов „30 дена темнина: Крвави траги“ била објавена во 2007 г. на FEARnet.com.

Содржина

Разоткривачко предупредување: Следат подробности што го разоткриваат дејството и/или заплетот.

Ебен Олесон е шериф во градот Бароу во Алјаска и поминува низ тешки времиња со неговата сопруга Стела. Двајцата се на работ на развод по бројните несогласувања и Стела се подготвува да го напушти Бароу, пред почетокот на периодот од 30-дневната поларна ноќ во кои ќе бидат прекинати сите врски со градот. Но поради сообраќајка таа не се качува во последниот авион и е принудена да го чека следниот, за 30 дена.

Истата вечер во градот почнуваат да се случуваат морничави работи. Сите кучиња се убиени, а таинствен странец се заканува дека „тие“ ќе дојдат и ќе ги убијат сите мештани на градот. Наскоро нападот навистина започнува и чудовишни убиства се случуваат на секој агол од градот. Додека Ебен сфаќа дека всушност се работи за вампири, со него ќе останат само Стела, неговиот помал брат Џејк и група од околу 10 други луѓе, кои се и единствените преживеани од градот. Во обид да најдат подобро засолниште, вампирите ги напаѓаат и убиваат еден по еден.

Преполовената група успева да стигне до 30-тиот ден, но кога Стела е во опасност, Ебен си вбризгува крв од друг вампир за да ја спаси. Џејк, Стела, Гејл Робинс (малото девојче што Стела го спасила) и уште 2 мештани на градот, Луси Ајкос и Дениз, остануваат единствените преживеани од колежот во Бароу, додека Ебен, на изгрејсонце, се претвора во пепел во рацете на Стела.