Стадион Никола Мантов

Стадионот Никола Мантов е фудбалски стадион во Кочани со капацитет од околу 4.000 гледачи. На него играат екипите на ФК “Осогово“ и ФК “Кочани“.

Стадион “Никола Мантов“
Поглед кон источната трибина
Поглед кон источната трибина
Место Кочани, Македонија
Отворен 1952
Проширен 1980 (источна трибина)
1994 (западна трибина)
Сопственик Општина Кочани
Оператор ФК Осогово
Подлога трева
Игра ФК Осогово, ФК Кочани
Гледачи 4.000

Општи податоциУреди

Стадионот е сместен во јужниот дел на Кочани, има две иградени трибини: источна со 2.750 места за седење (во употреба од 1980 г.) и западна со околу 1.250 места за седење. Од 1994 година, околу една третина од западната трибина е покриена.

Во подтрибинскиот простор на источната трибина е сместен ресторан со капацитет од 340 места, во чиј состав работи и мотел со 22 двокреветни соби. Во склоп на западната трибина се клубски простории, соблекувални, бањи, канцеларии, сала за состаноци, прес сала, сала за стрелиште и други помошни простории. Во продолжение на главниот терен за игра, на јужната страна, се протега и помошен терен за тренинзи.

ИсторијаУреди

Изградба и проширувањеУреди

Стадионот бил отворен во 1952 година, односно за сезоната 1952/53. Тогаш била изградена старата западна трибина со капацитет од 800 седишта. Во 1962 година, фудбалскиот терен добил свој дренажен систем. Поради застареност на западната трибина, во 1980 година била изградена источната трибина со околу 2.750 места за седење. Во 1994 година, била изградена сосема нова западна трибина со околу 1,250 места.[1]

Име на стадионотУреди

Во 1973 година, ФК Осогово играл во тогашната Македонска републичка лига (трето ниво на натпреварување во поранешна Југославија). Таа сезона, во рамките на 34-то коло, на 1 јули 1973 година, “осоговци“ биле домаќини на средбата со ФК “ФАС 11 Октомври“ од Скопје.

 
Поглед кон западната трибина

Во 10-та минута од првото полувреме, при резултат 1:0 за домаќините, како последица од срцев удар, на теренот како покосен паднал 23-годишниот фудбалер на “Осогово“, Никола Мантов - Мендиз. Младиот играч, студент на втора година на Машинскиот факултет во Битола, веднаш бил префрлен во болницата во Кочани, но лекарите можеле само да ја констатираат смртта. Главниот судија Ратко Ѓорѓиоски од Прилеп веднаш го прекинал натпреварот, а присутните 2.000 гледачи по соопштувањето на жалната вест, со насолзени очи го напуштиле стадионот.[1]

 
Никола Мантов

Во својата кратка фудбалска кариера Мантов одиграл 59 првенствени и уште толку куп натпревари, играјќи на позициите лев бек и лево крило. Постигнал повеќе голови, а за целиот период на активно играње фудбал добил само еден жолт картон.[2]

Во знак на сеќавање на овој играч, стадионот го добил неговото име и тоа бил единствениот стадион во Македонија кој воопшто носи име на еден фудбалер, сè до промената на името Градскиот стадион Велес во Стадион Зоран Паунов во јуни 2019 година.

Официјализирањето на името на стадионот било направено на седница на Советот на Општина Кочани.[3][4], одржана на 30 април 2014 година, на која советниците од сите политички партии гласаа едногласно за предлогот.

Меѓународни натпревариУреди

датум натпреварување противник резултат публика
Македонија (1994 – ...)
7 септември 1994 УЕФА квалификации U21   Данска 5–3 [5] 6,000
12 април 1995 пријателски   Бугарија 0–0 [6] 7,000

НаводиУреди

  1. 1,0 1,1 „Стадион“. fkosogovo.com преку web.archive.org. Посетено на 24 септември 2019.
  2. “80 години фудбал во Кочани“, м-р Методиј Хаџипаунов, 2005 г.
  3. „Советот руши рекорди, усвои 50-тина точки за неполни два часа“. kanal8.mk преку web.archive.org. 30 април 2014. Посетено на 24 септември 2019.
  4. Градскиот стадион се именува во „Никола Мантов“, интернет портал Комарец
  5. Од Данска во Кочани во 1994 до Шкотска во Скопје во 2016! - www.gol.mk
  6. Пријателски натпревари- www.makfudbal.com