Зоолошка градина Битола

Зоолошка градина Битола — зоолошка градина во градот Битола, основана на 1 мај 1950 г. со помош на зоолошките градини од Скопје, Загреб, Белград и Суботица.

Зоолошка градина Битола
Влезот на зоолошката градина
Отворена	1950
Место	Битола, Македонија
Координати	41°00′52″N 21°20′29″E
Бр. на животни	200
Бр. на видови	40
Мреж. место	zoobitola.mk

Зоолошката градина во Битола има значајно место во сферата на општественото живеење, посебно во делот на образование на населението и заштита на одредени животински видови. Уште од своето основање во 1950, зоолошката константно ги подобрува условите за животните со цел да ги исполни европските стандарди, но тие сè уште не се исполнети. Во текот на 2004 година, вработените во Зоолошката градина во Битола започнале низa активности насочени кон подобрување на условите за живот на животните, како и афирмирање на образовниот карактер на градината.

Локација

Битолската зоолошка градина е сместена во прекрасна природа на падините на Тумбе Кафе и заради одликите на својот терен, градината има оригинален и нетипичен „ридско-планински” изглед.

Зоолошката има вкупна површина од околу 2 хектари, бројка што според модерните светски стандарди ја сместува во категоријата на мали зоолошки градини.

Реконструкција

Една од најголемите промени во целокупното работење на зоолошката градина во Битола се случи во текот на 2011 година. Имено, за првпат во историјата на работењето на оваа институција беше изработена техничка документација за нејзина комплетна реконструкција. Со ова, во суштина беше започнат процес кој целосно ќе го промени ликот на оваа институција. Техничката документација предвидува нови 26 живеалишта и останата комплементарна инфраструктура: образовен центар, пешачки патеки, видиковец, детски парк, ресторан, сервисна зона.

Истата година, Зоолошката градина Битола поднесе апликација за членство во Европската асоцијација на зоолошки градини и аквариуми. Благодарение на претходно преземените активности, на последната седница на Советот на ЕАЗА одржана на 26 април 2012 во Минхен, Германија со консензус беше донесена одлука на зоолошката градина во Битола да ѝ се додели статус „Зоолошка градина – кандидат за член во фаза на реконструкција”. Во 2014 година со средства од ИПА фондовите беа изградени 9 нови објекти кои ги исполнуваат стандардите на Европската асоцијација на зоолошки градини и аквариуми, беа изградени живеалишта за лисицата и ракунот, мечката, рисот, тигрите, лавовите, фарма, нилскиот коњ, мајмуните и беше изграден нов влез и билетарница .

Галерија

• 
  Фарамата во зоолошката
• 
  Макајски ара-папагал во зоолошката
• 
  Еден од четирите мечоци, кој скоро постана татко.
• 
  Истиот мечок. Неговото мече е првото новороденче во зоолошката во последните 20 години.
• 
  Еден од трите тигри во зоолошката.
• 
  Истиот тигар. Овој живее со неговиот партнер, додека пак другиот мажјак живее сам.
• 
  Два од многуте пауни во зоолошката.
• 
  Еден од десетиците мајмуни кои живеат во зоолошката. Овој е познат по тоа што краде од гостите.
• 
  Најголемиот мајмун во зоолошката. Исто така и најстариот.
• 
  Двата лава кои живеат во зоолошката.
• 
  Лавовите во нивниот кафез.

Надворешни врски

• Официјалното мрежно место на Битолската Зоолошка градина Архивирано на 9 декември 2013 г. (македонски)