Врапче камењарче

Врапче камењарче
Заштитен статус
Незагрозен  (МСЗП 3.1)
Научна класификација
Царство:	Животни
Колено:	Хордови
Класа:	Птици
Ред:	Врапчевидни
Семејство:	Врапчиња
Род:	Petronia
Вид:	Врапче камењарче
Научен назив
Petronia petronia (Linnaeus, 1766)

Врапчето камењарче (науч. Petronia petronia) е мала врапчевидна птица од семејството на врапчињата. Живее низ неплодните карпести ридови од Пиринејски Полуостров, северозападна Африка преку јужна Европа до Средна Азија. Го има и во Македонија. Тоа е претежно постојан жител, но азиските птици се селат понајуг или се движат подолу по планините. Редок скитник е на север од својот опсег.

Опис

Врапчето камењарче е малку поголемо од градското врапче, со должина 15 - 17 см. Нема полов диморфизам, мажјаците и женките се исти. Тие се претежно сивокафеави. Одозгора и крилјата им се прошарано кафеави, ододздола посветли со потемни линии, имаат белкава линија над окото, и препознатлива, но тешко забележлива лимонжолта точка на грлото, која кај мажјаците е посветла. На опашката има бели рабови. Пеењето му е гласно и зарипнато.

Поведение

Јајца

Живеалиштето на оваа птица се подножјата на планините и планинските падини, обично крај каменитите потоци и карпи. Летот му е пргав и брз, а на земја лесно се движи меѓу камењата. Се среќаваат и во градските средини каде им одговара средината и климата.

Вон сезоната на парење птиците се собираат во јата во потрага по храна.

Се хранат со семиња, но и со инсекти.

Размножување

За разлика од повеќето од врапчињата, камењарчето е полигамично и мажјакот има 3-4 женки. Гнездат во колонии, понекогаш и многу големи. Гнездата се вообичаени, топчести, со страничен влез, а ги поставуваат во пукнатините на карпите, меѓу камењата, во пештерите или дупките претходно направени од бреговите ластовички или пчеларките, дупките во дрвјата или на зградите. Гнездото е грубо, лабаво и големо, направено од гранчиња и суви тревки, послано со пердуви или меки тревки. Одозгора е секогаш покриено со надвиснат камен, гранка или дел од градбата на зграда. Несат 4-7 бели јајца со кафеави дамки.

Наводи

• Faun. Abh. 26: 63.

Надворешни врски

• Врапче камењарче на Птиците на Мадејра
• Фотографии на Oiseaux
• Возраст и пол од Javier Blasco-Zumeta & Gerd-Michael Heinze Архивирано на 12 ноември 2013 г. (PDF; 1.1 MB)