Малокорапска Стена
| Малокорапска Стена | |
|---|---|
 | |
| Висина | 2.725 м |
| Место |  Македонија/ Албанија
|
| Венец | Кораб |
| Прво освојување | непознато |
Малокорапска Стена (познат и како Мала Корапска Врата) — врв во средишниот дел на главниот срт на протегање на планината Кораб во Македонија. Неговата височина изнесува 2.725 метри.
Местоположба
уредиСе наоѓа во средишниот дел на планината Кораб на главниот срт на протегање, во најнепосредната близина, веднаш наспроти врвот Мал Кораб. На самиот тесен и карпест срт на врвот се протега и линијата на границата меѓу Македонија и Албанија. Според местоположбата врвот Малокорапска Стена се наоѓа на координатите 41°46'28" северна географска широчина и 20°32'03" источна географска должина[1]. Поточно, врвот Малокорапска Стена е сместен непосредно на север над долината на Длабока Река и познатиот Корапски водопад, при што непосредно на југ (во правец на долината) преку седло со камењар-сипар тој е веднаш директно поврзан со понискиот врв Мал Кораб (2683 м.), додека на североисток е поврзан со превојот Мала Корапска Врата (2478 м.), а кон запад со стрмен процеп со сипари се спушта кон висорамнина на албанска територија. Се одликува со величествен изглед, поради стрмниот и совршено вертикален карпест, стеновит блок кој ја сочинува неговата источна страна, додека на јужната падина има остар процеп кој го оделува од Мал Кораб и сипарот од камења, а на северната падина каде неговата северна и североисточна падина стрмно се спуштаат до преслапот Мала Корапска Врата, поради што е забележителен и видлив и од многу големи далечини[1]. Искачувањето на врвот Малокорапска Стена е многу тешко и опасно поради многу тешкопристапниот стрмен терен со големи процепи, карпи и ронливи сипари со раздробени камења на трите страни, при што искачувањето е единствено можно од североисточната страна од кај превојот Мала Корапска Врата[1]. Поради тежината и опасноста овој врв е исклучително многу ретко искачуван од планинарите.
Име
уредиНа речиси сите географски карти врвот воопшто не е обележан и именуван. Поради непосредната близина до превојот Мала Корапска Врата, голем број на планинари, алпинисти и посетители врвот го именуваат и тој е познат исто така како Мала Корапска Врата. Сепак, бидејќи самиот врв претставува огромна стена[2] (карпа, ѕид) во непосредната близина на врвот Мал Кораб, најсоодветно именување на овој врв би било „Малокорапска Стена“. Поради забележителниот изглед кој го има Малокорапска Стена со својот изразито карпест и стеновит изглед заедно со непосредно блискиот карпест врв Мал Кораб, нивниот заеднички гребен има налик на кораб, односно брод кој плови, поради што тој е така нарекуван од месните жители и овчари и воедно така именувана и е добиено името на целата планина[3].
Галерија
уреди-
Поглед на врвот Малокорапска Стена од исток -
Поглед на Мал Кораб (лево) и Малокорапска Стена (Мала Корапска Врата) (десно) -
Поглед на врвот Малокорапска Стена, од југ од Мал Кораб -
Поглед на Малокорапска Стена со Голем Кораб во позадината (десно) -
Поглед на Малокорапска Стена, од североисток од превојот Мала Корапска Врата -
Глетка Малокорапска Стена (десно) и Мал Кораб со Малокорапското Езеро во подножјето -
Поглед на Мал Кораб (лево) и Малокорапска Стена (десно) -
Поглед на Мал Кораб (лево) и Малокорапска Стена (десно) над долината на Длабока Река
Наводи
уреди- ↑ 1,0 1,1 1,2 Шаревски, Марио (2020). „Општ географски преглед на планината Кораб и нејзините (не)истражени врвови, езера и предели“. Записи за Кораб: 33–35. ISBN 978-608-66336-1-5. Архивирано од изворникот на 2020-08-11. Посетено на 2020-08-24.
- ↑ „Стена“. ДИГИТАЛЕН РЕЧНИК НА МАКЕДОНСКИОТ ЈАЗИК. Посетено на 24 септември 2019.
- ↑ Според кажување на овчар од Албанија. Забележале Марио Шаревски, Зоран Тодоровски, Крумислав Јововски, Васко Кически на 27.07.2019