Димитар Арсов

Академик проф. д-р Димитар Тодоров Арсов (Крива Паланка, 28 септември 1908 - Скопје, 2 јули 1974) – специјалист, интернист, ревматолог, редовен професор на Медицински факултет, академик.

Димитар Арсов
Роден	28 септември 1908 Крива Паланка, Македонија
Починал	2 јули 1974 Скопје, СР Македонија
Националност	Македонец
Занимање	специјалист, интернист, ревматолог, професор на Медицински факултет

Животопис

Арсон е роден во Крива Паланка на 28 септември 1908 година. Основно образование завршил во родниот град, а матурирал во Куманово (1926), студирал во Париз, Франција (1926–1932) и докторирал на Сорбона (1936). Од 1932 г. е асистент во клиниките на Универзитетот во Париз. Од 1939 до 1941 г. е хонорарен лекар на Интерното одделение во Железничката и во Армиската болница во Скопје, лекар на Интерното одделение и шеф на Градното одделение при Државната болница во Скопје (1941–1944) и шеф на Интерното одделение при Земската болница во Скопје (1944–1947). Во 1947 година е избран за асистент, потоа за доцент (1950) и вонреден професор (1957), а во 1958 година за редовен професор на Катедрата за интерна медицина на Медицински факултет во Скопје.

Научна дејност

Од 1952 година бил управник на Интерната клиника при Медицински факултет во Скопје (до неговата смрт). Две години истовремено бил и в.д. управник на Инфективната клиника во Скопје. За редовен член на МАНУ бил избран на 18 август 1967 година, како прв редовен член од областа на медицинските науки. Бил член на:

• Association des medicine de langue française;
• Друштвото на кардиолозите на Југославија,
• Европско кардиолошко друштво;
• Интернационалното кардиолошко друштво
• Друштвото на ревматолозите на Југославија;
• Европското ревматолошко друштво;
• Интернационалното ревматолошко друштво;
• Долгогодишен претседател на Интернистичката секција при МЛД;
• Претседател на Ревматолошката секција при истото друштво;
• Управата на Здружението на кардиолозите на Југославија; и
• Здружението на ендокринолозите на Југославија.

Награди и признанија

Добил плакети од:

• Светското хематолошко друштво во Париз;
• Универзитетот и Градското собрание на Безансон (Франција).

Промовиран е за:

• Doctor honoris causa на Универзитетот во Безансон (Франција) (1961).

Објавени научни дела

Објавил над 200 научни и стручни трудови, соопштенија и дискусии во македонски, југословенски и странски списанија, на симпозиуми и конгреси. Автор е на повеќе учебници. Во нив воведува низа стручни изрази, кои влегуваат во македонската стручна терминологија, а ги карактеризираат основните пропедевтички поими во интерната медицина. Со истражувањата навлегува во сите подрачја од интерната медицина.

Во неговите изучувања видно место заземаат социјалните болести; клиниката на пегавиот тифус, маларијата и нејзините последици во годините пред Војната и во првите години потоа, до ерадикацијата на оваа ендемска болест од Македонија; калаазарот кај возрасните – болест во период кога се сметало дека кај нас се јавува само како паразитоза во детската возраст; хепатитот во првите негови манифестации во Македонија како епидемична болест; истражувал за дијабетесот кај нас; за проблемите на зголемениот крвен притисок и срцевите болести; за проблемот на уролитијазата во Македонија; за проблемот на потхранетоста; за желудочните и цревните болести во нашата патологија; за современото лекување и дијагностицирање на болестите на крвта; на миокардниот инфаркт и на хипертиреозата.

Оригинален придонес е неговата студија за интравенската примена на адреналинот во лекувањето на ревматската треска и ревматскиот ендокардит.

Во последните години од животот своето внимание особено го свртува врз ревматските заболувања воведувајќи нови дијагностички методи и модерна терапија. Бил уредник и член на редакциите:

• „Македонски медицински преглед“;
• „Acta medica Iugoslavica“;
• „Bulletin Scientifique“;
• „Прилози“ (МАНУ).

Преку дневниот печат објавил бројни написи за актуелните прашања од областа на медицината.

Во својата активност ги соединил квалитетите на врвен здравствен работник, лекар специјалист интернист, педагог и научник. Тој е творец на модерната интерна медицина кај нас. Како врвен педагог, професор по интерна медицина на Медицински факултет. Учествувал во додипломската и подипломската настава.

Библиографија

• Преглед на заразните болести. Учебник за студенти по медицина, Скопје, 1961;
• Преглед на внатрешните болести. Ревматични болести. Учебник за студенти по медицина, кн. I, Скопје, 1963;
• Елементарна интерна медицина за студенти по стоматологија, Скопје, 1964;
• Внатрешни болести. Учебник за средните медицински училишта, Скопје, 1967.

Останато

Здравствениот дом во Крива Паланка го носи неговото име - Јавната здравствена установа (ЈЗУ) Здравствен дом „Проф. д-р Димитар Арсов“ - Крива Паланка.