Блатна ластовица
| Блатна ластовица | |
|---|---|
| |
| Научна класификација | |
| Царство: | Животни |
| Колено: | Хордови |
| Класа: | Птици |
| Ред: | Бекасови |
| Семејство: | Блатни ластовици |
| Род: | Блатна ластовица |
| Вид: | Обична блатна ластовица |
| Научен назив | |
| Glareola pratincola Linnaeus, 1766 | |
Обична блатна ластовица (науч. Glareola pratincola) — крајбрежна птица од семејството блатни ластовици. Необично за блатните птици, таа често лови инсекти во лет, слично на ластовиците со кои нема роднински врски, но имаат надворешна сличност. Секако, таа се храни и на земја.
Животната средина на блатната ластовица е отворената земја и често може да се види приквечер крај вода, ловејќи инсекти. Распространета е низ потоплите региони на Европа, југозападна Азија и Африка. Ја има и во Македонија. Таа е птица преселница која зимува во тропска Африка. Ретко може да се види посеверно од нејзиниот опсег.
Оваа птица е долга 24-28 см, со распон на крилјата од 60 до 70 см. Има кратки нозе, долги зашилени крилја, долга чаталеста опашка и краток клун, адаптиран за лов во воздух. Грбот и главата ѝ се кафеави, а крилјата со малку потемна нијанса и многу темни завршетоци. Стомакот е бел, но вратот се прелева во жолтеникава нијанса. Има впечатлив жолт круг под клунот обрабен со црна линија, кој започнува од клунот, под очите и завршува на грлото. Под крилјата е костенлива, но во лет изгледа темно.
Потребно е добро познавање за оваа птица да ја разликуваме од многу сличните блатни ластовици, како што е на пример црнокрилата блатна ластовица која може да живее на истиот простор и има, исто така, костенлива боја под крилјата, но опашката ѝ е пократка.
Блатните ластовици образуваат мали, не многу густи колонии. Гнездото претставува мала јамичка среде ниска и ретка тревна површина. Несaт 2-4 јајца. По испилувањето, малечките остануваат во гнездото само 2-3 дена, а потоа се кријат во околните растенија.
Блатната ластовица е еден од видовите на кои се однесува Договорот за заштита на африканско-евроазиските водни птици-преселници.
Наводи
уреди- ↑ BirdLife International (2012). „Glareola pratincola“. IUCN Red List. Version 2012.1. International Union for Conservation of Nature. Посетено на 16 July 2012.
Надворешни врски
уреди- Collared Pratincole videos, photos & sounds Архивирано на 3 март 2016 г. on the Internet Bird Collection
- Oiseaux Photos
- Glareola pratincola на Flickr: Field Guide Birds of the World
- Ageing and sexing (PDF; 1.4 MB) by Javier Blasco-Zumeta & Gerd-Michael Heinze Архивирано на 12 ноември 2013 г. (spanish)
| „Блатна ластовица“ на Ризницата ? |