Емилија Тодорова

Емилија Тодорова — македонска и австралиска поетеса и прозаистка.

Емилија Тодорова

Животопис

Емилија Тодорова, родена во Скопје, од 1989 г. живее во Сиднеј, Австралија, каде што работела на извршни и сениорски лидерски позиции во федералниот јавен сектор со одговорности кои, меѓудругото, опфаќале: стратешко деловно планирање и управување со промени; управување со човечки, финансиски и физички ресурси; обука на лидери и кадровски развој; развој на организациската култура; раководење со односите со релевантните чинители во јавниот, невладиниот и приватниот сектор; услуги и ангажирање на заедниците на Првите народи (домородното население) и на мултикултурните заедници; подобрување на услугите и искуството на клиентите, министерска и омбудсманска кореспонденција и управување со вонредни состојби.

Паралелно со нејзината примарна професија во јавниот сектор, неколку години била ангажирана и на Катедрата за современи јазици на Универзитетот Маквори и како двојазичен консултант.

Презентирала на повеќе национални и меѓународни конференции, меѓу кои и Меѓународната конференција за ангажман на заедницата (Бризбејн 2006), Националната конференција за бездомништво (Сиднеј 2006), Националната конференција за социјално претприемништво (Мелбурн 2005), ХII Светски фестивал на младината и студентите (Москва 1985), I Фестивал на младината на Медитеранот (Валенсија 1982) и т.н.

За исклучителни достигнувања во својата кариера добитник е на повеќе австралиски признанија.

Творештво

Со новинарско и креативно пишување се занимавала уште пред заминувањето од Македонија. Соработувала со „Студентски збор“ и Третата програма на Радио Скопје, а била и еден од основачите и заменик-уредник на младинското списание за популарна наука „Активус“.

Учествувала на поголем број поетски манифестации во Македонија и поранешна Југославија, меѓу кои и „Млада Струга“, „Мајски поетски средби“, „Горданино пролеќе“, „Бранково коло“ и т.н.

Наградувана е повеќепати за поезија и кратки книжевни форми во поранешна Југославија, Македонија, Австралија и САД.

Објавувала песни во весници и периодика („Омладинске новине", "Повод", "Стремеж", "Балкански книжевен гласник", „Везилка“ и т.н.), а застапена е и во неколку македонски и меѓународни поетски избори и антологии.

Активно твори на македонски и англиски јазик.

Преведува од англиски, српски и бугарски јазик.

Награди и признанија

• Награда „Стојан Христов“ (2022) при Струшките вечери на поезијата - за збирката поезија „Гравитација" (ISBN - 978-608-4722-25-0, Агенција за иселеништво, Скопје 2022)
• Откупна награда на конкурсот за краток расказ на весникот „Нова Македонија“ - за расказот „Големиот чекор“ (2022)
• Прва награда на национален конкурс на Оптус (Optus) во Австралија за креативен маркетинг (2020)
• Орден за општествени заслуги (2006) – доделен од Гувернерот на Австралија
• Златен медал на Федерацијата на Советите на етничките заедници на Австралија (FECCA) за унапредување на мултикултурните односи (2005)
• Награда за Денот на Австралија (2004) - за извонреден придонес во градењето меѓусекторски партнерства
• „Горданино пролеќе“ (1985) - избор во десетте најдобри млади поети на Југославија
• „Мајски поетски средби” (1984, 1985) – две  први и една трета награда
• „Бранково коло“ (1985) - откупна награда за циклус песни

Застапена е во следните книги:

• Избор „Скопски вознеси" Феникс, Скопје 2023
• Избор „Современи кратки книжевни форми" ИНАКУ,  Скопје 2021
• Избор „Песни за Скопје" Феникс, Скопје 2021
• Зборник „Coбирање: Песни од ХХI Светски поетски конгрес“, Сиднеј 2003
• Зборник со љубовна поезија „Коти на копнежи и страст", Сиднеј 2003
• Зборник поезија „Поетски иселенички меридијани", Скопје 1996
• Антологија „Македонска поезија во Австралија", Сиднеј 1996