Драгица Најческа

Драгица Најческа — македонски поет, раскажувач, романописец и писател за деца.

Животопис

Драгица Најческа е родена во Прилеп во 1933 година. Дипломира на Правниот факултет во Скопје, а од 1959 до 1969 година работи како асистент не Економскиот факултет при Универзитетот „Св. Кирил и Методиј“ во Скопје. Потоа го напушта ова работно место и започнува да се занимава со новинарство, работејќи како новинар и уредник во повеќе весници и списанија сè до своето пензионирање. Најческа се зафаќа за писателската работа уште како средношколка. Нејзиниот прв расказ е објавен во списанието „Иднина“ во 1950 година, по што следи објавување на повеќе раскази за возрасни и за деца во македонските и бившо-југословенските весници и списанија. Член е на ДПМ од 1969 година. Автор е на книгите: „Пеперуга со натопени крилја“ (роман, 1969), „Друга мајка“ (роман за деца и млади, 1979), „Раскази“ (1979), „Неспокој“ (поезија, 1988), „Крстопати“ (роман, 1995), „За глувчето, мачките, за мечките, рипчињата, зајачињата, лисичињата и ... дечињата“ (раскази за најмалите, 1997), „Омраза - длабоко“ (роман, 1998), „Доживотна јамка“ (роман, 2004), „Вратете ми го сонот“ (поезија, 2005), „Избрани дела“ (2011). Рецензенти на делата на Најческа низ нејзиното повеќедецениско творештво се Блаже Конески, Петар Ширилов, Михаил Ренџов, Славка Манева, Михо Атанасовски, д-р Томе Саздов, д-р Георги Сталев, д-р Диме Бошков, д-р Елена Колева. Романот „Пеперуга со натопени крилја“ е прв роман на жена-автор во Македонија. Романот „Омраза-длабоко“ трипати е прогласуван за една од десетте најчитани книги во Градската библиотека „Браќа Миладиновци“. Минатата година, издавачката куќа „Парабола“ од Москва овој роман го објави на руски јазик.