Голубарница

Голубарница (позната и како Голубарник или Орле) — пештера во Поречието, во близина на селото Белица. Долга е околу 100 метри, и е една од поубавите пештери во реонот на селото. Во неа има многу процепи и недостапни места. Во оваа пештера е изворишниот дел на реката Белешница. Позната е по специфичните лилјаци, уникатниот бисер и загадочниот човечки череп.

Голубарница
Поглед од внатрешноста кон отворот на пештерата
Место	Белица, Порече
Координати	41°40′25″N 21°19′0″E
Должина	100 м

Местоположба

Пештерата се наоѓа на ридот Дафпат, а од селото Белица е оддалечена околу 1,6 км на исток. До Гулабарница може да се дојде по одлично обележана патека, притоа одејќи со средно темпо од околу еден час. Отворот на пештерата има јужна експозиција и се наоѓа на надморска височина од 868 метри, височина која е за околу 300 метри повисока од селото Белица.

Знаменитости

Лилјаците од Голубарник

Оваа пештера е дом на неколку вида на лилјаци, од кои се мал потковичар (Rhinolophus hipposideros), јужен потковичар (Rhinolophus euriale), мехелиев потковичар (Rhinolophus mehelyi) и долгокрилест лилјак (Miniopterus schreibersii). Лилјаците ја користат пештерата како место за презимување (хибернација), одгледување на младите и засолниште во топлиот период на годината. Заради овој факт, во 2012 година во оваа пештера треба да се одржи манифестацијата „Ноќ на лилјаците“, која е традиционална и во Европа се одржува од седумдесеттите години.

Бисерот од Голубарница

За време на едно екпедитивно истражување на СД „Пеони“ бил пронајден многу редок примерок на пештерски бисер, стар илјадници години. Спелеолозите тврдат дека бисерот е уникатен карцитен феномен и дека досега во Македонија е единствен со толкава големина.

Черепот од Голубарник

Човечки череп во процеп во пештерата Голубарница

СД „Пеони“ откриле остатоци од човечки череп и коски од екстремитети. За черепот и коските спелеолозите претпоставуваат дека се многу стари, а можеби и остатоци од праисторискиот човек. Черепот случајно го открил еден од членовите на друштвото осветлувајќи еден процеп во пештерата. До отворот каде што има череп на човек може да се влезе од друга страна. Досега на територијата на Европа најстарите човечки остатоци датираат од 200.000 до 800.000 години пред нашата ера. Во Македонија сè уште не е откриен толку стар човечки остаток, па ова кога би излегло вистинито би бил најстариот откриен предок.

Спелеолошки парк

До Министерството за животна средина од страна на спелеолошкото друштво „Пеони“ било поднесено барање местото Белица да биде прогласено за спелеолошки парк. Барањето се однесувало на три пештери од овој реон и тоа: Голубарник, Лапарник и Момичек, кои треба да бидат заштитени со законот за природни реткости и убавини.

Галерија

• 
  Местоположбата на отворот на пештерата
• 
  Железната врата на отворот на пештерата
• 
  Таваницата на пештерата
• 
  Сталактити од пештерската таваница
• 
  Внатрешноста на пештерата
• 
  Пештерски облици и украси во внатрешноста на пештерата
• 
  Пештерски облици и украси во внатрешноста на пештерата
• 
  Пештерски облици и украси во внатрешноста на пештерата
• 
  Пештерски облици и украси во внатрешноста на пештерата
• 
  Пештерски облици и украси во внатрешноста на пештерата
• 
  Пештерски облици и украси во внатрешноста на пештерата
• 
  Пештерски сливови во пештерата Гулабарница
• 
  Пештерско прозорче во пештерата Гулабарница
• 
  Масивен сталактит во пештерата Гулабарница
• 
  Пештерски столбови (сталагњати) - Гулабарница
• 
  Сталагмит во пештерата Гулабарница

Надворешни врски

• Голубарница на Ризницата ^?
• Во пештерата Голубарник, Горна Белица
• Гулабарница (Голубарница) - Беличката мистериозна пештера