Газела (мост во Скопје)

Газела претставува пешачки мост кој ја премостува реката Вардар и ги поврзува населбите Карпош 4 и Злокуќани во главниот град на Македонија, Скопје. Мостот е дело на архитектот Јован Стефановски - Жан.

Газела
Носи	пешаци
Преминува	Вардар
Место	Скопје, Македонија
Особености
Вкуп. должина	114,50 m
Ширина	3,60 m
Историја
Отворен	2004
Местоположба

Камен-темелникот за мостот бил поставен на 7 јуни 2003 година, а свеченото пуштање во употреба се случило на 8 октомври 2004 година. Широчината на мостот е 3,60 m, а вкупната должина 114,50 m. Апсолутната висинска кота на горната пешачка површина изнесува 255,15 m. Мостот е изведен како комбинација од армиран бетон и челик. Конструктивниот систем на објектот претставува целина од армиранобетонски темели, монтажни подни плочи, челични лачни решеткасти носачи, столбови и греди, со што распонот статички и сеизмички е лесно совладлив. Мостот бил целосна инвестиција на Општина Карпош вредна околу 500.000 евра. Во неговата изградба биле вклучени „Сајон проект", „Геоинг", „Гранит", „Факом инженеринг" и „Гранит електрика".

Криминалитет

Откако мостот се пуштил во употреба, тој станал главна врска преку која се вршело пренос на предмети стекнати од кражби. Податоците од полициските билтени покажале дека од 2004 година откако мостот бил пуштен во употреба, криминалитетот и кражбите билр зголемени за 51 отсто. Од тие причини, Локалниот совет за превенција на Општина Карпош во кој покрај членови од Општина Карпош, имало и претставници на МВР, ОБСЕ и граѓани донеле едногласна одлука за воведување на времена забрана за минување по мостот во вечерните часови што важела од 1 декември 2004. Мостот бил затворен од 20 до 6 часот наутро. Поради тоа на мостот биле ставени и железни врати.

Поврзано

• Мостови во Скопје;