Шкембе-чорба

Шкембе-чорба или чкембе-чорба – јадење кое често се среќава во балканската, македонската, бугарската, грчката, турската и источноевропската кујна. Се приготвува од добро сварено и ситно исечкано телешко или јагнешко шкембе. На чорбата ѝ се додаваат зачини – лук, киселина, лут црвен пипер или лути пиперки. Популарна е како средство против мамурлак.

Шкембе-чорба

Шкембе-чорба
Дел од оброкот	главен оброк
Регион	Балкан и Источна Европа
Температура на послужување	топло
Главни состојки	шкембе

Рецепт

Потребни состојки:

• Шкембе (1,5 килограм)
• Морков (4-5 )
• Компир (2 )
• Лук (2 чешниња)
• Целер (1 парче)
• Магдонос (1 китка)
• Црвен пипер (1 кафена лажица)
• Сол (1 кафена лажица)
• Сув зачин (1 кафена лажица)
• Црн пипер (1 кафена лажица)
• Лаворов лист (1-2 )
• Брашно (1 супена лажица)

Шкембето добро се мие и се става во тенџере. Се тура 1-2 литри вода и тенџерето се става на оган за да зоврие содржината. Шкембето треба да се вари додека не омекне. По желба може да се додаде јунешка коска да се вари заедно со шкембето. Кога шкембето е сварено, се вади од тенџерето и се става настрана.

Во друго тенџере со малку масло се пропржуваат морковите, лукот и целерот исечкан на коцки.

Вареното шкембе се сече на ленти или коцки и се додава во тенџерето. Се пропржува, па се додава течноста од варењето (процедена), зачините и исечканиот компир и се остава да се вари.

Се подготвува запршка од масло, брашно и црвен пипер. Се додава во тенџерето и се остава да се вари уште 1-2 минути.

Толчен лук се меша со магдонос и оцет и може да се додаде во готовата чорба.

Поврзано

• Шкембе