Пределна архитектура

Пределна архитектура или пејзажна архитектура — засебна научна дисциплина која се занимава со проектирање на отворени јавни и приватни површини, знаменитости и структури. Целта е да се постигнат специфични социјални и естетски ефекти во животната средина Тоа подразбира систематска анализа на постојните социјални, еколошки и почвени состојби и процеси во пределот и осмислување интервенции кои ќе доведат до посакуваниот резултат. Професијата вклучува пределно уредување, просторно планирање, обновување и одржување на животната средина; планирање на паркови и рекреативни содржини и планирање на зелена инфраструктура. Покрај јавните површини, исто така се занимава со проектирање на приватни градини. Лицата кои се занимаваат со оваа професија се нарекуваат пределни архитекти.

Стауртхед во Вилтшир, Англија, дизајниран од страна на Хенри Хоар (1705-1785)

Во Македонија многу често за пределна архитектура погрешно се користи терминот хортикултура, кој всушност претставува растително производство.

Дефиниција

Ова е меѓудисциплинска наука, која вклучува аспекти на ботаника, хортикултура, ликовна уметност, архитектура, индустриски дизајн, педологија, животна средина, географија, и екологија. Големината на проектите во пределната архитектура значително се разликува, од создавање на јавни паркови, до планирање на кампуси, дизајн на приватни градини, дизајн на урбана инфраструктура, како и санација на деградирани предели како што се напуштени рудници или депонии. Обликување на пределот се состои од дизајн на цврсти елементи (поплочувања, потпорни ѕидови) и дизајн на меки елементи (вегетација).

Професија

Во многу земји, постојат професионални институции (комори), кои се состојат од членови на стручната заедница, со цел да се заштити и унапреди професијата. Меѓу другото, овие комори ја регулираат работата на пределните архитекти и издаваат овластувања за нивното професионално работење. Стандардите и легислативата според кои работат овие институции се разликува во зависност од земјата. Во некои земји, вклучувајќи ја и Македонија, има многу мало или никакво регулирање. Во Европа, Северна Америка, делови од Јужна Америка, Австралија и Нов Зеланд, пределната архитектура е регулирана професија.

Поврзано

• Животна средина
• Хортикултура