Поскура

Поскура, просфора или панагија — обредно лепче од квасено пресно тесто, симбол на Телото Христово, што служи за причестување во православната црква.

Поскура

Подготовка на поскура

Има повеќе начини за подготовка на поскура, ерусалимски, светогорски, а може да се разликува и од манастир до манастир.

Подготовка според Македонската православна црква

За време на правењето на просфората тој што ја прави треба да се моли со Исусовата молитва.

Состојки

• 5 шолји брашно
• 2 шолји млака вода
• 1 лажичка сол
• 1 коцка свеж квасец

Подготовка

Квасецот се раствора во половина шолја млака вода, исто како при месење на обичен леб. Во длабок сад се става брашното и во него се прави мала дупка за солта. Убаво се меша со брашното и се додава растворениот квасец. Полека се додава преостанатата вода, а потоа се меси подолго време така што да биде доволно цврсто.

Начин на обликување

Поскурен печат

За обликување на поскурата неопходен е печат.

Тестото се дели на 5 еднакви дела и од секој дел се прави по една поскура. Се размесува топката тесто, се посолува брашно на местото каде што се меси и потоа со сучење низ дланките се извлекува нагоре. Потоа тестото се истенчува на половината со сучење со малите прсти и се добиваат две споени, но посебни половини. Со внатрешниот дел од дланката овие половини се сплескуваат во форма на диск со што поправилна кружна форма. Потоа се превртува поскурата и се измазнува долниот дел, повторно се посолува брашно, се превртува поскурата, се мазни горната површина со дланката и внимателно се удира печатот.

Печење

Во посебен плех посипан со малку брашно се редат поскурите и се печат во претходно загреана рерна, на 150^оС околу еден час.