Големо Пелистерско Езеро

Големо Пелистерско Езеро познато и само како Големо Езеро — поледничко езеро кое се наоѓа во изворишниот дел на Езерска Река, лева притока на реката Сапунчица, источно од врвот Вртешка, на надморска висина од 2.218 м. Езерото е во рамките на Националниот парк Пелистер. Настанато е со заемно дејство на ерозивните и акумулативните леднички процеси, во преиздлабениот дел на циркот, кој од јужната и источната страна е заграден со моренски бедем, чија должина изнесува 320 м. Во правец југозапад-североисток езерото е долго 228 м, а најголемата ширина во правец ЈИ–СЗ изнесува 196 м. Вкупната должина на езерскиот брег изнесува 785,25 м, а во овие рамки тоа зафаќа површина од 42.000 м². Најголемата длабочина при највисокиот водостој изнесува 17,2 м, додека при најнизок водостој таа е 13,8 м, односно просечната длабочина при среден водостој е 15,5 м според што тоа е трето по длабочина природно езеро, а најдлабоко планинско езеро во Македонија. Во базенот на ова езеро се акумулираат вкупно 185.374 м³ вода.. До езерото води добро обележана планинарска патека со почеток од с.Нижеполе кај месноста Лак Поток и ски-лифтот, преку пределот Дебел Рид, а исто така може да се стигне пеш или со теренско возило од хотелот „Молика“ преку месноста Јоргов Камен и Малото Пелистерско Езеро. Од планинарскиот дом крај Големото Пелистерско Езеро започнува и води директна добро обележана планинарска патека кон селото Брајчино во Преспа.

Големо Пелистерско Езеро
Површина	42.000 м2
Должина	228 м
Ширина	196 м
Обем	785,25 м
Длабочина	17.2 м
Надморска висина	2.218 м
Планина	Баба (Пелистер)
Големо Пелистерско Езеро на Ризницата

Галерија

• 
  Глетка од Големото Езеро со планинарскиот дом во позадината
• 
  Големото Езеро од гребенот Чавкарник од север
• 
  Глетка од Големото Езеро
• 
  Големото Езеро

Поврзано

• Пелистерски очи
• Национален парк Пелистер