Јованче Поп Антов
Јованче Поп Антов (4 јануари 1882 во Ваташа — 28 јуни 1906 во Ваташа) — македонски револуционер, член на ТМОРО.[1]
| Јованче Поп Антов | ||
| ||
| Роден | 4 јануари 1882 година Ваташа | |
|---|---|---|
| Починал | 28 јуни 1906 година Ваташа Убиен од турскиот таен комитет. | |
| Националност | Македонец | |
Животопис
уредиТој бил најмал од браќата Поп Антови. Основно училиште завршил во Ваташа, а прогимназија во Прилеп, каде како учител работел неговиот брат Тодор. Контактите на неговиот брат со видни македонски револуционери му овозможиле уште рано да ја осознае идеата на македонската револуционерна орrанизација и да ги прифати нејзините принципи. По завршување на прогимназијата се запишал на Педагошкото училиште во Скопје. Јованче иако палав со немирен дух го сакал својот позив и веднаш по завршувањето на училиштето од страна на црковно-училишната општина е поставен за учител во Кавадарци. Набргу станал член на ТМОРО, а во 1904 година поради неговата револуционерна дејност за да не биде уапсен се илегализирал и се вклучил во револуционерната чета на војводата Добри Даскалов.[1]
Јованче Поп Антов особено се активирал во чистење на теренот во Тиквешијата од врховистичките банди. Во една таква акција против врховистичкиот војвода Јован Радњански бил тешко ранет и приморан два месеца да помине на лекување. Бидејќи раната се комплицирала користејќи ги врските на постарите браќа бил испратен во Солун, каде останал се до конечното излекување. По враќањето во Ваташа станал раководител на месната организација, а извесен период бил и раководител на месната ваташка чета.[1]
| „ | ...Говорот му беше силен и се наметнуваше. Беше голем идеалист и огнен патриот. Нашето спасение е - велеше само во автономна Македонија. | “ |
— Христо Поп Антов (негов брат), [2] | ||
На 28 јуни 1906 година Јованче Поп Антов бил убиен пред селската кафана среде бел ден од страна на еден Турчин член на т.н. "Тајни турски комитети", чија што цел била ликвидирање на сите значајни личности на организацијата, кои биле потенцијална опасност за егзистенцијата на турското население во Тиквешијата.[1][3]
Поврзано
уредиНаводи
уреди- ↑ 1,0 1,1 1,2 1,3 Камчевски, Петре (2012). Ваташа. Кавадарци: Музеј-Галерија Кавадарци. стр. 425. ISBN 978-608-4621-04-1.
- ↑ Поп Антов, Христо (2006). Спомени. Скопје. стр. 341.
- ↑ „Нa денешен ден во Кавадарци“. www.rtk.mk. Посетено на 2024-07-06.