Чарлс Едвард Андерсон Бери (англ:Charles Edward Anderson Berry; Сент Луис 18 октомври 1926 г – Сент Чарлс 18 март 2017 година) - американски пејач, текстописец и гитарист кој беше пионер на рокенролот. Наречен „Татко на рокенролот“, тој го усовршил и развил ритамот и блузот во основните елементи кои го карактеризираат рокенролот со песните како што се „Мајбелин“ (Maybellene) (1955), „Рол над Бетовен“ (Roll Over Beethoven) (1956), „Рокенрол музика“ (Rock and Roll Music) (1957) и „Џони Би Гуд“ ( Johnny B. Goode) (1958).[1] Чак Бери пишувал стихови кои се однесуваат на тинејџерскиот живот и конзумеризмот, а развивал музички стил кој содржи соло на гитара и шоуменство. Бери имал големо влијание врз рок музиката потоа.[2]

Чак Бери
Чак Бери во 1957
Роден(а)Чарлс Едвард Андерсон Бери
октомври 18, 1926(1926-10-18)
Сент Луис, Мисури, САД
Починал(а)март 18, 2017(2017-03-18) (возр. 90)
блиску Венцвил во Мисури, САД
ПочивалиштеСент Луис
Занимање
  • Пејач-текстописец
  • музичар
СопружникТемета Сагс (в. 1948)
Деца4
Страница
chuckberry.com

Чак Бери е роден во црнечко семејство од средна класа во Сент Луис, и уште од најрана возраст пројавил интерес за музика. Својот прв јавен настап го имал во средното училиште Самнер. Како средношколец бил осуден за вооружен грабеж и бил испратен во поправен дом, каде што бил задржан од 1944 до 1947 година. По ослободувањето, Бери стапил во брак и работел во фабрика за склопување на автомобили. На почетокот од 1953 година Бери започнал да настапува со триото Џони Џонсон. Во мај 1955, го напуштил триото и заминал за Чикаго каде што се сретнал со Мади Вотерс, кој му предложил да стапи во контакт со Леонард Чес, основачот на продукциската куќа Чес Рекордс. Со Чес Рекордс, тој ја снимил „Мајбелин“ - негова адаптација на изворната кантри песна „Ајда Ред“ (Ida Red); Мајбелин била продадена во над милион примероци, и се нашла на прво место на топ листата за ритам и блуз на списанието Билборд.[3]

Веќе кон крајот на пеесетите години, Бери бил музичка ѕвезда, и зад себе имал неколку хитови, филмски настапи и доходовни турнеи. Во Сент Луис основал свој ноќен клуб - Berry's Club Bandstand.[4] Во јануари 1962 година бил осуден на три години затвор за трговија со бело робје - превезол 14-годишно девојче преку државните граници. [5] [6] По ослободувањето во 1963 година, Бери снимил уште неколку успешни песни, меѓу кои „Баш и немам каде да одам“ (No Particular Place to Go), „Никогаш не се знае“ (You Never Can Tell) и „Надин“ (Nadine). Сепак, овие песни не го повториле успехот ниту го имале влијанието на неговите песни од 1950-тите, а до почетокот на 1970-тите бил претежно баран како изведувач на носталгични песни, и ги свирел своите поранешни песни со локални бендови со различен квалитет.[7] Во 1972 година со песната „Мојот Дингалинг“ (My Ding-a-Ling) се искачил на врвот на топ листите, тоа била единствена негова песна на прво место на топ листите. Во 1979 година бил осуден на четиримесечна затворска казна и општествено корисна работа, поради даночно затајување.

Бери бил во првата група од музичари кои биле поставени во Рокенрол куќата на славните при нејзиното отворање во 1986 година; било наведено дека тој „ја поставил основата не само на рокенрол звукот, туку и на рокенрол ставот“.[8] Бери се наоѓа на неколку листи за „најдобрите на сите времиња“ на списанието Ролинг Стоун; тој беше рангиран на петтото место на листата на 100 најдобри изведувачи на сите времиња во 2004 и 2011 година.[9] На листата од 500-те песни кои го обликуваа рокенролот од Рокенрол куќата на славните има три песни на Бери: „Џони Би Гуд“, „Мајбелин“ и „Рокенрол музика“.[10] „Џони Би Гуд“ е единствената рокенрол песна од Чак Бери која ја има на Златната плоча на Војаџер.[11]

НаводиУреди

  1. Kalhan Rosenblatt (March 18, 2017). „Chuck Berry, father of rock 'n' roll, dies at 90“. NBC News. Архивирано од изворникот на May 22, 2019. Посетено на April 27, 2019.
  2. Campbell, M. (ed.) (2008). Popular Music in America: And the Beat Goes On. 3rd ed. Cengage Learning. pp. 168–169.
  3. Frederick, Jennifer (March 18, 2017). „Chuck Berry, a Founding Father of Rock 'n' Roll, Dies at 90“. Billboard. Архивирано од изворникот на March 27, 2017. Посетено на March 27, 2017.
  4. „Chuck Berry, a rock 'n' roll originator, dies at age 90“. The Salt Lake Tribune. Associated Press. March 18, 2017. Архивирано од изворникот на March 27, 2017. Посетено на March 27, 2017.
  5. „295 F.2d 192“. ftp.resource.org. Архивирано од изворникот на October 13, 2010. Посетено на June 4, 2010.
  6. Pegg (2003).
  7. „Chuck Berry“. Britannica Online Encyclopedia. Архивирано од изворникот June 4, 2020. Посетено на February 21, 2010.
  8. „Chuck Berry“. The Rock and Roll Hall of Fame and Museum. Архивирано од изворникот на March 19, 2017. Посетено на June 21, 2014.
  9. „The Immortals: The First Fifty“. Rolling Stone (946). Архивирано од изворникот на June 21, 2008.
  10. „Experience the Music: One Hit Wonders and the Songs That Shaped Rock and Roll“. Архивирано од изворникот на May 9, 2012. Посетено на December 15, 2012.
  11. „Voyager Interstellar Mission: The Golden Record“. Jet Propulsion Laboratory. Архивирано од изворникот на July 27, 2013. Посетено на July 6, 2015.

Надворешни врскиУреди