Св. Автоном

Свети Автоном - христијански свештеномаченик и светец.

Животопис

Свети Автоном, по потекло, бил од Италија, каде служел како епископ. За време на прогоните спроведувани од императорот Диоклецијан, тој се преселил во Сореос, во областа Витинија, Мала Азија. Во Сореос, св. Автоном ја подигнал црквата „Св. архангел Михаил“. Во Сореос, св. Автоном живеел во куќата на некој добар христијанин Корнелиј кого го посветил најпрвин за презвитер, а потоа и за епископ. Во близината на Сореос се наоѓало местото Лимна, населено со пагани, но св. Автоним, со своето проповедање на евангелието, успеал многумина да преобрати во христијанската вера. Меѓутоа, еден ден, паганите го нападнале храмот „Св. архангел Михаил“, убивајќи многу христијански верници, а настрадал и св. Автоном, кој бил убиен на олтарот.
За време на владеењето на царот Константин, некој царски благородник, со име Севиријан, подигнал храм на гробот на св. Автоном. Двесте години по смртта, св. Автоном му се јавил на некој војник со име Јован и тој ги откопал моштите на светецот, кои биле целосно недопрени. Потоа, многумина болни оздравиле од моштите на св. Автоном.