Крале Марко ја препознава татковата сабја

Марко Крале ја препознава татковата сабја (српски: Марко Краљевић познаје очину сабљу) е српска епска (јуначка) песна. Песната прв ја запишал Вук Караџиќ, кој ја слушнал од ајдукот Тешан Подруговиќ.

Содржина

Рано наутро, една Турчинка оди на реката Марица за да бели платно. Наеднаш, водата се заматува и таа здогледува во реката многу мртви војници. Еден јунак ја моли да му подаде платно за да доплива до брегот и таа го спасува. Непознатиот јунак, тешко ранет и убаво облечен, бара од девојката да го замоли нејзиниот брат Мустафа-ага да го прими во неговата куќа, а за возврат на двајцата ќе им даде три товари богатство. Девојката ја пренесува молбата и го моли својот брат да го поштеди јунакот, но тој го убива. По некое време, Мустафа-ага ѝ се приклучува на царската војска при што ја носи сабјата што ја зел од непознатиот јунак. Крале Марко ја препознава сабјата и го прашува агата како дошла во неговите раце, а Мустафа-ага му ја кажува вистината. Тогаш, Марко го убива агата, а веста за тој настан доаѓа до царот. Царот го повикува Марко кај себе, но кога го гледа разлутен, му дава стотина дукати, а Марко му кажува зошто е налутен.