Дупјачка таблица

Дупјачка таблица — дрвена таблица со врежани натписи од 5202 (± 123) г. пр.н.е. Нејзината старост е утврдена со радиојаглеродно датирање и претставува многу рано сведоштво за писменоста на подрачјето на Македонија. Откриена е во 1993 г. во неолитската населба на брегот на Костурското Езеро кај селото Дупјак, Костурско, Егејска Македонија и напишана е на сè уште недешифрирано писмо.

A: врежани знаци од Дупјачката таблица. B: примероци од натписи на линеарното писмо А. C: примероци од знаци на други палеоевропски глинени таблици.

Модел на таблицата

Откривање

Самата езерска населба е откриена зимата 1932 г. кога нивото на водата се смалило, откривајќи ги остатоците. Во 1935 г. Антониос Керамопулос направил првичен увид. Ископувањата почнале во 1992 г. предводени од Георгиос Хурмузијадис, професор по праисториска археологија на Солунскиот универзитет. Местото било населено мошне долго време, од средниот неолит (5600–5000 г. пр.н.е.) па сè до крајот на неолитот (3000 г. пр.н.е.). Ископани се разни предмети како керамика, дрвени градежни елементи, остатоци од дрвени структурни елементи, семки, коски, фигурини, накит, свиралки и дрвена таблица со непознати писмовидни знаци од обете страни.

Откриената таблица е претставена во февруари 1994 г. на симпозиум во Солунскиот универзитет. Наодите од наоѓалиштето се неформално опишани во напис од 2000 г. и од Хормузијадис во 2002 г.

Самата таблица е делумно оштетена кога била изложена на свеж воздух, извадена од бескислордната средина во која лежела многу долго време. Потоа била конзервирана ѝ се уште се изучува.

Поврзано

• Неолитот во Македонија
• Винчанско писмо
• Дупјачка неолитска населба

Надворешни врски

• „Анаскама“ — стручно списание на археолозите што работат во Дупјак (грчки)