Долама

Долама (турски: dolama) е машка горна облека со ракави. Најчесто била изработувана од бела клашна, а дополнително украсена со црни гајтани по шавовите. Ја носело машкото мијачко население од дебарскиот регион.

Долама носена како дел од празничната носија од Струшки Дримкол

Преден поглед

Заден поглед

Долга е до под колена и се одликува со повеќе клиње. На страните има нашиено џебови, а долу цепови. За разлика од предниците и ракавите, кои се украсени со црни гајтани и бикме, сите рабови се опточени со зелена оптока. Празничната зетовска облека дополнително е орнаментирана со вез и со пулови, на лактите на ракавите со мотивот колчаци , а на предниците со мотивите петлиња и криваче.

Во некои региони (Кумановско) се среќава долама што по кројот е слична на елекот, само што има ракави. Таа била изработена од бела клашна и е долга до појасот, а на градите се преклопувала. Подоцна, во почетокот на XX в., во некои региони на Македонија започнала да се изработува од киткајка и да се полни со памук.

Галерија

• 
  Маж носејки долама од с. Јабланица, Дебарски Дримкол
• 
  Зет носејки долама од с. Дренок, Голо Брдо
• 
  Машка носија (десно) од Мала река, каде составен дел над сите облеки е доламата

Поврзано

• Кафтан