Ако умрам Македонијо

„Ако умрам Македонијо“ — македонска народна песна, музика и аранжман Милан Завков, текст Томислав Которчевиќ. Песната првпат била изведена во 1997 година од Билјан Стојаноски на фестивалот на нови родољубиви и патриотски македонски песни Гоце Фест 1997 во Скопје.^[1] Таа е една од песните кои оставиле белег на фестивалот и се силно врежани во алеите на македонската патриотска музика.^[2]

Текст

Ако умрам, еј Македонци,

ова срце закопајте го,

таму долу на сред Солунско,

па да никне ѕвоно големо,

што ќе бие и раскажува:

тука земја е македонска!

Македонијо, на нас душата

ни е горе на врв Пирина,

срце долу – на сред Солуна,

крвта – бистра вода Вардарска.

Ако умрам Македонијо,

пуста душа нека полета

таму горе, меѓу облаци,

да се стори сокол Пирински,

глас да пушти и раскажува:

тука земја е македонска!

Македонијо, на нас душата

ни е горе на врв Пирина,

срце долу – на сред Солуна,

крвта – бистра вода Вардарска.

Ако умрам, еј Македонци,

од кај Вруток да ме пуштите,

па да тргнам, да си поминам,

да ја видам, да ја исплачам,

таа малку што ни остана –

света земја, македонска.

Македонијо, на нас душата

ни е горе на врв Пирина,

срце долу – на сред Солуна,

крвта – бистра вода Вардарска.

Ако умрам Македонијо!