Миксобактерија

Миксобактерии
Плодно тело на Myxococcus xanthus
Научна класификација
Царство:	Бактерии
Колено:	Протеобактерии
Класа:	Делта протеобактерии
Ред:	Myxococcales
Фамилии & родови
Archangiaceae    Archangium Cystobacteraceae    Cystobacter    Melittangium    Stigmatella Myxoccaceae    Myxococcus    Angiococcus Polyangiaceae    Chondromyces    Nannocystis    Polyangium

Миксобактериите (Myxobacteria) се група на пупечки лизгачки бактерии кои сочинуваат единствен ред во групата на делта протеобактериите. Тие поседуваат уникатен тип на лизгачко движење. Вегетативните клетки се движат (лизгаат) заедно во вид на рој, а потоа се агрегираат и формираат многуклеточно плодно тело во кое се развиваат спорите. Миксобактериите имаат најсложено однесување и најсложен животен циклус од сите познати прокариоти. Тие се жители на почвата. Овие бактерии, заедно со лигавите мувли од еукариотите, се пример за паралелна (конвергентна) еволуција, бидејќи имаат слични животни циклуси во почвената средина.

Основни одлики

Вегетативните клетки на миксобактериите се типични Грам-негативни стапчиња кои се лизгаат по супстрат од типот на листови во распаѓање или животински измет, или, пак, колонии на други бактерии. Тие ги добиваат своите хранливи материи од супстратот, лизгајќи се по него и притоа оставајќи лигава трага која ја следат други миксобактерии. Доколку се потрошат хранливите извори, клетките испраќаат меѓусебен сигнал за агрегација, при што формираат рој од миксобактерии кои се преобразуваат во многуклеточно плодно тело кое содржи миксоспори, вид на дормантни (спиечки) клетки добиени од диференцирана вегетативна клетка. Кај видот Stigmatella, миксоспорите се спакувани во секундарни структури наречени цисти, кои се развиваат на врвот на плодното тело. Светлообоените плодни тела на миксобактериите (кои содржат милиони клетки и спори) може да се забележат и со голо око на листови во фаза на распаѓање или животински измет.